Ձեր վստահելի աղբյուրը

Արագածոտնի մարզի Կանչի հիմնական դպրոցի տնօրեն Հարություն Մխիթարյանը վերջին օրերին դպրոցում միայն դասերով չէ, որ զբաղված է: Տնօրենը մաշված ու խարխուլ պատուհաններին ապակի է գցում ու ցելոֆաններ փակցնում… ձմեռը շատ մոտ է:

Մի կերպ փորձում ենք փակել, դե փտած են պատուհանները, հազիվ հարմարեցնում ենք, ապակին եմ գցում, հետո էլ ցելոֆաններով կփակեմ, որ գոնե քամին ներս չմտնի: Ահավոր վիճակում ենք»,- Panorama.am-ին դպրոցի պայմաններն է ներկայացնում տնօրենը:

Դպրոցի` 1979 թվականին կառուցված ու վերջին անգամ խորհրդային տարիներին վերանորոգված շենքի պատուհանների ճեղքերից քամին հանգիստ ներսուդուրս է անում, տանիքը մաշվածության և սաստիկ բքերի պատճառով կիսաքանդ է եղել, անձրևների ժամանակ կաթում է:

«Եթե հնարավոր լիներ ինչ-որ կերպ վերանորոգում արվեր: Դա շատ կարևոր է: Գոնե տանիքը փակվի, քամիները քշել են, ահավոր է կաթում: Միայն դասարանների առաստաղն ենք մի կերպ փակել, բայց միջանցքում անընդհատ կաթոցներ են: Դե ես եմ վերանորոգում անում: Սպորտ դահլիճը չենք օգտագործում, անհնար է, այդ հատվածի թիթեղները տանում եմ դասարանների տանիքին եմ փակում»,- պատմում է Հարություն Մխիթարյանը:

Դպրոցում 10 դասասենյակ ունեն, բայց քանի որ աշակերտները շատ քիչ են, միայն 5-ն են օգտագործում: Մյուս սենյակները փակել են: Հատակը լավ վիճակում է, գույքը հին է, բայց աշակերտներին բավարարում է: Սենյակները նավթի վառարանով են տաքացնում:

Կանչի հիմնական դպրոցում 23 աշակերտ է սովորում: Այս տարի առաջին դասարան ընդունվել է 2 երեխա: Դասերը կոպլեկտավորած են պարապում, ընդհանուր չորս ու կես դասարան ունեն: Դպրոցում կա 9 ուսուցիչ: Բոլորը մասնագետներ են, մի մասը գալիս են հարևան գյուղից, պարապում են ու գնում: Միայն եզդիերենի ուսուցիչն է, որ միջնակարգ կրթությամբ է:

Դպրոցը փոքրամասնության չէ, հայկական է համարվում: Եզդիերենն էլ` բացի դպրոցի հայեցողությամբ տրված ժամերից, նաև պարապում են խմբակի շրջանակներում: «Երեխաները ամբողջությամբ կարողանում են իրենց լեզվին տիրապետել»,- ասում է տնօրենը:

Գյուղում բացի եզդիներից նաև հայ մի քանի ընտանիքներ կան: Նախկինում Կանչն ամբողջությամբ եզդիական է եղել: Գյուղն ունի 160 բնակիչ: Դպրոցի տնօրենի խոսքով` վերջին շրջանում արտագաղթն է մեծացել, նախկինում 100 աշակերտ ունեին, գնալով թիվը կտրուկ պակասում է: Սոցիալական պայմաններն էլ շատ վատ են, բայց փորձում են հարմարվել:

«Ճանապարհները քանդված վիճակում են, խմելու ջրի խնդիր կա: Անասնապահությամբ են հիմնականում զբաղվում: Բայց նախնադարյան պայմաններ են, գոլերով են անասուններին ջրում: Հողի մեջ տրակտորով փորել են, ջուրը լցվում է, բայց դե ձմռանը այդ ջուրն էլ սառչում է: Մարդիկ փորձում են հարմարվել, մենք պետք է այստեղ հարմարվենք, ապրենք: Ամբողջ հանրապետությունում է այս վիճակը… գյուղում էլ իսկապես շատ վատ պայմաններ են»,- ասում է Հարություն Մխիթարյանը:

Դպրոցի տնօրենը նաև շեշտում է, որ իրենք լավատես են, երիտասարդություն կա, և Կանչն ապագա ունի:

Գյուղական դպրոցների մասին շարքի նախորդ պատմությունները՝

Քանդված հատակ, փտած դռներ, առաստաղից երևացող գերաններ և մութ դասասենյակներ. Կուտականի դպրոցը

Դպրոցը՝ նախկին կոլխոզի շենքում. Սալվարդում ընդամենը 15 աշակերտ կա

«Կոմպլեկտավորած դասարանում ուսման որակի հերն անիծվում է». Դպրոցի տնօրենը զենքերը վայր չի դնում

Պատուհանից այն կողմ` ցելոֆաններ երկնքի փոխարեն. Սորիկի աշակերտների երազանքն ու իրականությունը

Դպրոցը՝ վթարային շենքում. Դաշտադեմում մի քանի օրից ընդամենը ինը աշակերտ կմնա

Քայքայված պատեր ու ծակ լուսամուտներ. Վաղատինի դպրոցը

Յոթ աշակերտով դպրոցը, Աճարկուտում քիմիայի լաբորանտն արդեն 15 տարի հայոց լեզու է դասավանդում