Ձեր վստահելի աղբյուրը

«Քննչական կոմիտեի մասին» ՀՀ օրենքի նախագիծը և հարակից օրենսդրական փաթեթը արդարադատության նախարարությունը դեկտեմբերի 16-ին ուղարկել է կառավարություն և առաջիկա նիստերից մեկում կդրվեն քննարկման: Օրինագիծը կառավարության կողմից հավանության արժանանալու դեպքում կուղարկվի խորհրդարան և կդրվի շրջանառության մեջ:

Նշենք, որ կառավարություն ներկայացնելուց առաջ օրենքի նախագծի շուրջ մասնագիտական քննարկումներ էին ծավալվել, որին ներգրավվել էին նաև ԵՄ փորձագետներ: Այժմ էլ Հայաստանում է գտնվում ԵՄ մեկ այլ փորձագետ, որի հետ քննարկվում են կոմիտեի կառուցվածքի, քննիչների որակավորումը բարձրացնելու վերաբերյալ հարցերը, առանձին քննչական գործողությունների համար նախատեսված սենյակներին ուղղված պահանջները (օրինակ` ճանաչման, առերես հարցաքննությունների, անչափահասների հարցաքննությունների համար նախատեսված հատուկ քննասենյակների ստեղծում), Մարդու իրավունքների պաշտպանի և փաստաբանական համայնքի հետ փոխգործակցության և հետադարձ կապի ապահովման մեխանիզմները:

Մինչ օրինագիծը կառավարությունում կքննարկվի, ներկայացնենք նախագծի մի քանի կարևորագույն դրույթներ, մասնավորապես, «ՀՀ Քննչական կոմիտեի մասին» օրենքի նախագծի հոդված 24-ը սահմանում է քննչական կոմիտեում պաշտոնի նշանակելը և պաշտոնից ազատելը: Ըստ այդմ, քննչական կոմիտեի նախագահին նշանակում է Հայաստանի Հանրապետության Նախագահը՝ ՀՀ վարչապետի ներկայացմամբ: Նույն հոդվածով, քննչական կոմիտեի նախագահի տեղակալներին քննչական կոմիտեի նախագահի ներկայացմամբ նշանակում է Հայաստանի Հանրապետության Նախագահը:

Քննչական կոմիտեում աշխատանքի անցնելու համար պետք է ուսումնառության անցնել Արդարադատության ակադեմիայում ի տարբերություն ներկայումս տիրող վիճակի, երբ իրավաբանական կրթություն ունեցող ցանկացած անձ կարող է նշանակվել քննիչ:

Այսպես, ըստ օրենքի նախագծի, քննչական կոմիտեի կենտրոնական մարմնի գլխավոր վարչության (վարչությունների, բաժինների), Երևան քաղաքի քննչական վարչության, Երևան քաղաքի վարչական շրջանների քննչական բաժինների, մարզային քննչական վարչության, մարզային քննչական բաժնի, զինվորական տարածքային քննչական բաժնի կազմում գործող քննչիներին պաշտոնի է նշանակում քննչական կոմիտեի նախագահը քննչական կոմիտեի ծառայողների թեկնածությունների ցուցակում ընդգրկված այն անձանց թվից, որոնք, ավարտելով ուսումնառությունը արդարադատության ակադեմիայում, հաջողությամբ հանձնել են որակավորման քննությունը ազատված են եղել արդարադատության ակադեմիայում ուսումնառությունից:

Ինչպես են վարձատրվելու նոր ստեղծվելիք քննչական կոմիտեի ծառայողները:

Հոդված 41-ը սահմանում է քննչական կոմիտեի ծառայողի վարձատրությունը` քննչական կոմիտեի ծառայողների վարձատրության, այդ թվում հիմնական և լրացուցիչ աշխատավարձի հաշվարկների և չափերի հետ կապված հարաբերությունները կարգավորվում են Պետական պաշտոններ զբաղեցնող անձանց վարձատրության մասին Հայաստանի Հանրապետության օրենքով:

Սակայն մինչև «Պետական պաշտոններ զբաղեցնող անձանց վարձատրության մասին» Հայաստանի Հանրապետության օրենքով քննչական կոմիտեի ծառայողների համար սահմանված վարձատրության համակարգի գործելը քննիչների վարձատրության համար անցումային փուլ է սահմանված նախագծի 53-րդ հոդվածով: Ըստ այդմ, քննչական կոմիտեի ծառայողի աշխատավարձը բաղկացած է պաշտոնային դրույքաչափից, կոչումների հավելավճարներից և օրենքով նախատեսված այլ վճարներից: Քննչական կոմիտեի նախագահի պաշտոնային դրույքաչափը հավասար է Հայասանի Հանրապետության հատուկ քննչական ծառայության պետի պաշտոնային դրույքաչափին։

Բարձրագույն պաշտոնի 2-րդ ենթախմբի պաշտոնի պաշտոնային դրույքաչափը կազմում է քննչական կոմիտեի նախագահի պաշտոնային դրույքաչափի 90.52 %-ը։
Բարձրագույն պաշտոնի 3-րդ ենթախմբի պաշտոնի պաշտոնային դրույքաչափը կազմում է քննչական կոմիտեի նախագահի պաշտոնային դրույքաչափի 80.79%-ը:
Գլխավոր պաշտոնի 1-ին ենթախմբի պաշտոնի պաշտոնային դրույքաչափը կազմում է քննչական կոմիտեի նախագահի պաշտոնային դրույքաչափի 75.99%-ը:
Գլխավոր պաշտոնի 2-րդ ենթախմբի պաշտոնի պաշտոնային դրույքաչափը կազմում է քննչական կոմիտեի նախագահի պաշտոնային դրույքաչափի 71.19%-ը։
Գլխավոր պաշտոնի 3-րդ ենթախմբի պաշտոնի պաշտոնային դրույքաչափը կազմում է քննչական կոմիտեի նախագահի պաշտոնային դրույքաչափի 66.39%-ը։
Առաջատար պաշտոնի 1-ին ենթախմբի պաշտոնի պաշտոնային դրույքաչափը կազմում է քննչական կոմիտեի նախագահի պաշտոնային դրույքաչափի 61.59%-ը:
Առաջատար պաշտոնի 2-րդ ենթախմբի պաշտոնի պաշտոնային դրույքաչափը կազմում է քննչական կոմիտեի նախագահի պաշտոնային դրույքաչափի 56.79%-ը։ 11. Առաջատար պաշտոնի 3-րդ ենթախմբի պաշտոնի պաշտոնային դրույքաչափը կազմում է քննչական կոմիտեի նախագահի պաշտոնային դրույքաչափի 51.99%-ը։
Կրտսեր պաշտոնի պաշտոնային դրույքաչափը կազմում է քննչական կոմիտեի նախագահի պաշտոնային դրույքաչափի 47.18%-ը։

Քննչական կոմիտեի պետի պաշտոնային դրույքաչափից ելնելով` դասային աստիճանների համար սահմանվում են հետևյալ չափերով հավելավճարներ. 1) արդարադատության գեներալ-լեյտենանտ՝ 80 տոկոսով. 2) արդարադատության գեներալ-մայոր՝ 75 տոկոսով. 3) արդարադատության գնդապետ՝ 65 տոկոսով. 4) արդարադատության փոխգնդապետ՝ 60 տոկոսով. 5) արդարադատության մայոր՝ 55 տոկոսով. 6) արդարադատության կապիտան՝ 50 տոկոսով. 7) արդարադատության ավագ լեյտենանտ՝ 45 տոկոսով. արդարադատության լեյտենանտ՝ 40 տոկոսով:

Կոչում ունեցող քննչական կոմիտեի ծառայողն ստանում է հավելավճար` դատախազի, դատավորի, քննիչի և հետաքննիչի պաշտոնում աշխատած յուրաքանչյուր տարվա համար` իրենց շնորհված կոչման նկատմամբ սահմանված հավելավճարի առավելագույն չափի 4-ական տոկոսի չափով: Բոլոր դեպքերում կոչման համար տրվող հավելավճարը չի կարող գերազանցել պաշտոնային դրույքաչափը:
Քննչական կոմիտեի ծառայության պաշտոնի նշանակված դատավորների, դատախազների, քննիչների կամ հետաքննիչների նախկին ծառայության կամ աշխատանքի ժամկետը հաշվի է առնվում նրանց աշխատավարձը հաշվարկելիս: Օրենքի նախագծով նախատեսվում է, որ քննիչների աշխատավարձերը պետք է բարձրանան, սակայն դրան զուգահեռ խստացվում են նրանց նկատմամբ պահանջները:

Հիշեցնենք Սերժ Սարգսյանը կարգադրություն էր ստորագրել միասնական քննչական մարմնի կազմավորման իրավական ապահովման հանձնաժողով ստեղծելու մասին: Աղվան Հովսեփյանը նշանակվել էր Միասնական քննչական մարմնի կազմավորման իրավական ապահովման հանձնաժողովի նախագահ (համաձայնությամբ):

Հարակից հրապարակումներ`

Հանրությանն է ներկայացվել «Միասնական քննչական կոմիտեի» մասին օրենքի նախագիծը

Միասնական քննչական մարմին` առանց ՊԵԿ քննչական ծառայության (տեսանյութ)

Վաղ, թե ուշ բոլոր քննչական ծառայությունները կլինեն մեկ մարմնի կազմում. Գևորգ Դանիելյան (տեսանյութ)

Հիմնական պատճառը գերատեսչական անկախությունն էր, որ միասնական քննչական մարմին է ստեղծվում. Ղազինյան (տեսանյութ)

Նոր ստեղծվելիք քննչական կոմիտեի ծառայողը պետք է ունենա արտաքին և ներքին անկախություն. Արթուր Ղամբարյան (տեսանյութ)