Ադրբեջանցի քննիչներն Իրանի քաղաքացուն կտտանքների են ենթարկել
«Ադրբեջանցի քննիչները խոստովանական ցուցմունք կորզելու նպատակով Իրանի քաղաքացի Բահրամ Ֆեյզիին կտտանքների են ենթարկել»,-այդ մասին իրանական «ՖԱՐՍ» լրատվական գործակալության հաղորդմամբ՝ հայտարարել է Ֆեյզիի կինը:
Հիշեցնենք, որ իրանական «ԻՌՆԱ» լրատվական գործակալության հաղորդմամբ՝ Բաքվի կարևորագույն գործերով դատարանը վերջերս ԻԻՀ քաղաքացի Բահրամ Ֆեյզիին Իսրայելի դեսպանության վրա հարձակման փորձ և Իրանի համար լրտեսություն կատարելու մեղադրանքով դատապարտել է 15 տարվա ազատազրկման:
Իրանական աղբյուրի հաղորդմամբ՝ Բահրամ Ֆեյզիի կինը՝ Այսել Ֆեյզին, որն Ադրբեջանի քաղաքացի է, անդրադառնալով ամուսնու հետ կատարվածին, մասնավորապես հայտարարել է. «Ամուսինս անմեղ է. Ինձ երկու անգամ տարել են Ադրբեջանի ազգային անվտանգության նախարարություն և սպառնացել. Բահրամին քննիչները ստիպել են, որպեսզի նա իրենց ներկայացրած մեղադրանքներն ընդունի»:
«Բահրամը իր անմեղությունը ապացուցելու նպատակով 26 օր հացադուլ է հայտարարել. Նույնիսկ մի անգամ վայրենի կտտանքների պատճառով երակներն է կտրել, այժմ նրա վիճակը լավ չէ»,-նշել է Ադրբեջանում ազատազրկման մեջ գտնվող Իրանի քաղաքացու կինը:
Հավելենք, որ Իրանի արտաքին գերատեսչության պաշտոնական ներկայացույցիչ Մարզիե Աֆխամը, վերջերս անդրադառնալով վերոնշյալ միջադեպին, մասնավորապես նշել էր. «Ֆեյզիի գործով Իրանը հյուպատոսական քննությունն է իրականացրել. Նրան անհիմն են ձերբակալել. Միջադեպի առնչությամբ բանակցություններ վարելու նպատակով Թեհրանում Ադրբեջանի դեսպանը հրավիրվել է ԱԳՆ. Հանդիպման ընթացքում մենք շեշտել ենք, որ Բահրամ Ֆեյզին անհիմն է ձերբակալվել և անհապաղ պետք է նրա համար ազատ պայմաններ ապահովեն»:
Նշենք, որ վերջերս Ադրբեջանի անվտանգության ուժերը Բաքվում Իսրայելի դեսպանության առջևից անցնելու համար ձերբակալել էին Իրանի մեկ այլ քաղաքացու՝ Հասան Ֆարաջիին: Իրանի ԱԳՆ-ի և Ադրբեջանում ԻԻՀ դեսպանության հետևողական ջանքերի արդյունքում Ֆարաջին վերջերս ազատ արձակվեց:
Իրանա-ադրբեջանական հարաբերությունների վերաբերյալ վերլուծություն`
Իրան-Ադրբեջան հարաբերությունները 2013թ. Ապրանքաշրջանառության նվազում, սահմանային բախումներ, «մշակութային պատերազմ»