«Կյանք առանց սահմանների»` ուշադրություն է հրավիրվում դեպի հաշմանդամություն
Հայաստանում ԱՄՆ դեսպանատունը և Նորարար փորձառական արվեստի կենտրոնը ներկայացնում են «Կյանք առանց սահմանների» խմբակային ցուցահանդեսը: Ցուցահանդեսը բացվելու է այսօր ՆՓԱԿ-ում: Ասուլիսում ասաց ՀՀ-ում ԱՄՆ դեսպանատան մշակութային հարցերով պատասխանատու Նենսի Վանհորնը:
Նա տեղեկացրեց, որ «Կյանք առանց սահմանների» արշավը ԱՄՆ պետքարտուղարության ծրագրերից մեկն է, որի նպատակն է մեծացնել իրազեկությունը հաշմանդամության խնդիրների վերաբերյալ, շեշտադրել բազմազանության և ներառական հասարակության հիմնարար ամերիկյան արժեքները: «Կյանք առանց սահմանների» արշավի շրջանակներում Հայաստանում ԱՄՆ դեսպանատունն ուշադրություն է հրավիրում դեպի հաշմանդամություն:
Ասուլիսին ներկա ՀՀ-ում ԱՄՆ արտակարգ և լիազոր դեսպան Ջոն Հեֆերնն ասաց, որ ֆիզիկական հասանելիության խնդիրներն ընդհանուր գաղափար է և միայն այն մարդկանց չի վերաբերում, որոնք ունենք հաշմանդամություն:
«Ամեն ինչ՝ շենքերը, շինությունները, համակարգիչները, սարքավորումները պետք է մշակված լինեն այնպես, որ կարողանան գործածել բոլորը: Ինչ որ պահի բոլորս էլ սահմանափակումներ ունենալու ենք, շրջապատող առարկաներն այնպիսին պետք է լինեն, որ բոլորը կարողանան օգտվել: Այս ամենն իրականություն դարձնելու համար երկար ճանապարհ կա անելու: ԱՄՆ-ում այդ ուղղությամբ աշխատում ենք, անելիքներ դեռ կան»,- ասաց դեսպանը:
Փետրվարի 24-26-ը ԱՄՆ դեսպանատունը հյուրընկալում է պարաօլիմպիական խաղերին 9 անգամ մասնակցած, այդ խաղերում ութ ոսկե մեդալների արժանացած և Բոստոնի վեց մարաթոնների հաղթող Քենդըս Քեյբլին: 21 տարեկանում ողնաշարի վնասվածք ստանալուց հետո նա ստիպված էր սպորտում ինքնադրսևորման նոր ուղիներ գտնել: Հայաստանում գտնվելու ընթացքում նա հանդիպումներ կունենա պետական պաշտոնյաների, համայնքների առաջնորդների, մանկավարժների և հաշմանդամություն ունեցողների հարցերով զբաղվող ակտիվիստների հետ:
«Սպորտն ու արվեստն այն ոլորտներն են, որտեղ սահմանափակումներ չեն ընդունվում, չեն ճանաչվում: Երբ ես 21 տարեկանում ողնաշարի վնասվածք ստացա, ինձ թվաց, թե կյանքս ավարտվեց, որևէ հաստատությունում եմ անցկացնելու մնացած ողջ կյանքս: Իմ ընտանիքի, մտերիմների օգնությամբ կարողացա դպրոց հաճախել, իմ տեղը կարողացա գտնել սպորտում: Հաշմանդամությունը փորձություն է, կարող է ցանկացած մարդու հետ տեղի ունենալ»,- ասաց Ք. Քեյբլինը:
ՆՓԱԿ-ի այսօրվա ցուցահանդեսում, ՆՓԱԿ -ի գեղարվեստական ղեկավար Արփա Հակոբյանի տեղեկացմամբ, ներկայացվելու են հայ նկարիչների, այդ թվում նաև հաշմանդամություն ունեցող ստեղծագործողների աշխատանքներ (29 նկարիչ): Բացման միջոցառմանը հանդես է գալու նաև «Փարոս» երգչախումբը: Ցուցահանդեսը ներկայացնում է, թե ինչպես հաշմանադամություն ունեցող անձինք լիարժեք կերպով կարող են ինտեգրվել առօրյա տարբեր զբաղմունքներում, որոնք շատերիս համար սովորական բան են համարվում: Ցուցահանդեսը բաց է լինելու երկու շաբաթ:
Փետրվարի 26-ին «Կյանք առանց սահմանների» արշավի շրջանակներում «Արինա Արարատյան» պարի թատրոնի տնօրեն, պարուսույց Արինա Արարատյանը ներկայացնելու է «Աղջիկը լուսնի վրա» ինքնատիպ պարային բեմադրությունը: Արինա Արարատյանն ասաց, որ ներկայացման միջոցով ցույց են տալիս, որ արվեստը հասանելի է բոլորին: Ըստ նրա, ներկայացմամբ ի ցույց է դրվում, թե ինչպես հաշմանդամություն ունեցող անձինք կարող են լիարժեք ինտեգրվել առօրյա կյանքում:
«Բոլոր տեղերում էլ մարտահրավներ կան: Պետք է ճիշտ ուղղությամբ առաջ ընթանալ»,- ասաց դեսպան Ջ. Հեֆերնը:
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում