Ձեր վստահելի աղբյուրը

Այսօր Մեծ Բրիտանիայից Երևան ժամանած հանրահայտ դերասան Փեթար Միլուշևսկիի «Գեղեցիկը» մոնոներկայացմամբ տրվելու է «Արմմոնո» միջազգային թատերական 12-րդ փառատոնի մեկնարկը: Այս մասին ասուլիսում հայտարարեց փառատոնի տնօրեն Մարիաննա Մխիթարյանը:

Փառատոնի հինգ օրերի ընթացքում ցուցադրվելու է 17 ներկայացում Մեծ Բրիտանիայից, Լեհաստանից, Լիտվայից, Ռուսաստանից հրավիրված դերասանների մասնակցությամբ: Փառատոնին մասնակցում են նաև հայ դերասաններ՝ ՀՀ վաստակավոր արտիստ Ռոբերտ Հակոբյանը «Զրույց գիշերին», Զարուհի Խաչատրյանը «Խարույկ լուսաբացին», Արա Գևորգյանը «Ծխախոտի վնասի մասին», Յուրի Իգիթխանյանը «Ամիսը գյուղում. Իսլաև», Վարազդատ Փանոյանը «Դորիան Գրեյ» և Մարի Գրիգորյանը «Քուչակն ու Մարին» մոնոներկայացումներով:

«Արմմոնո-դեբյուտ» ծրագրում (2013 թ. նորամուծությունն է) հանդես կգան մոնոներկայացման ժանրում իրենց առաջին քայլերն անող երիտասարդ դերասաններ Նարեկ Հարությունյանը, Մորենա Ֆուեգոն և Հարություն Գալֆայանը:

Փառատոնի տնօրենն ասած, որ այս տարվա նորամուծությունն է «Արմմոնո-տրիումֆ» ծրագիրը. ներկայացվելու են նախորդ տարվա հաջողություն ունեցած ներկայացումները: 2013 թ. աչքի են ընկել ՀՀ վաստակավոր արտիստներ Մուրադ Ջանիբեկյանի «Խոստովանություն» և Նարինե Գրիգորյանի «Դզին-Բանա-ստեղծագործություն» մոնոներկայացումները:

Փառատոնին ներկա են լինելու նաև մոնոներկայացումների միջազգային փառատոների տնօրեններ: Փառատոնի շրջանակներում անցկացվելու են վարպետության դասեր:

Ասուլիսին ներկա մշակույթի նախարարության ժամանակակից արվեստի վարչության գլխավոր մասնագետ Վարդան Գրիգորյանն ասաց, որ Հայաստանի մշակութային կյանքում «Արմմոնո» փառատոնն արդեն կայացած է, ինչի խոսուն վկայությունն այն է, որ այս տարի անցկացվում է 12-րդ անգամ, թատերական կյանքում ճանաչում է ձեռք բերել: Նա վստահություն հայտնեց, որ այս տարվա ծրագիրը ևս մեծ ոգևորությամբ կընդունվի հայ հանդիսատեսի կողմից, չբացառելով, որ կլինեն նաև քննադատություններ: