Ձեր վստահելի աղբյուրը

Հայաստանի պատմամշակութային արժեք ներկայացնող վայրերը վարձակալության տվող Պատմամշակութային արգելոց-թանգարանների և պատմական միջավայրի պահպանության ծառայությունում խրատվել են և որոշել են փոփոխություն կատարել վարձակալության համար անհրաժեշտ պայմանագրերում:

Պատմամշակութային արգելոց-թանգարանների և պատմական միջավայրի պահպանության ծառայության տնօրեն Վլադիմիր Պողոսյանը Panorama.am-ի թղթակցի հետ զրույցում տեղեկացրեց, որ շուտով մշակույթի նախարար Հասմիկ Պողոսյանին կներկայացնի ծրագիր` առաջարկելով վարձակալության պայմանագրի կետերի թվից հանել խնջույքների, կերուխումի անցկացումը:

«Ես արդեն նախարարին առաջարկով գրություն եմ պատրաստել, որ մենք նման կորպորատիվ միջոցառումներ, որ վերջում գեղարվեստական մաս էլ է լինում, բացառենք: Միջոցառում ինքնին կլինի, բայց ուղղակի չի լինի հացկերույթ ասեմ, ճաշկերույթ ասեմ: Խնջույքը բացառենք, բայց թող գան միջոցառում անեն», -մեզ հետ զրույցում հայտարարեց Վլադիմիր Պողոսյանը:

Պաշտոնյան ինքն էլ հասկացել է, որ խնջույքներն ու կերուխումը պատմամշակութային հուշարձանի ֆոնին «լավ չի դիտվում, տգեղ է», բայց ոչինչ անել չի կարող` «Օրենքն է այդպես թելադրում»: Սակայն օրենքը չի խանգարի, որ վարձակալության պայմանագրերում փոփոխությունների առաջարկ կներկայացնի նախարարին: Իսկ այդ առաջարկի վերաբերյալ մշակույթի նախարարի տրամադրության մասին ասաց, որ ոչինչ չի կարող ասել:

«Դեռ նոր պետք է ներկայացնեմ, կարծում եմ կքննարկվի ու կհամաձայնի», -հավելեց պաշտոնյան:

Բացի այդ, հասկացել են նաև, որ կատարվածը կարող է գցել հուշարձանների հեղինակությունը միջազգային ասպարեզում: Մեր դիտարկմանն ի պատասխան, պարոն Պողոսյանն այսպես արձագանքեց. «Բա ես ձեզ որ ասում եմ, թե նախարարին նման առաջարկ եմ ներկայացրել, ուրեմն դա նշանակում է, որ եթե պայմանագիր կնքողը ես եմ, ապա այսուհետ նման ձևի պայմանագիր չեմ կնքի: Մենք տեսնում ենք, որ դա իսկապես վատ է անդրադառնում և ընդունում ենք դա»:

Այսինքն` կատարվածից դասեր քաղել եք հարցին, Պողոսյանը դրական պատասխան տվեց:

Պետական բյուջեից պատմամշակութային հուշարձանների պահպանության նպատակով Պողոսյանի ղեկավարած ծառայությունը գումարներ գրեթե չի ստանում:

«Վերականգնման համար գումար տրամադրում է պետությունը, բայց դրանք այնքան փոքր գումարներ են, որ չի բավականացնում», -փոխանցեց Վլադիմիր Հակոբյանը:

Հետևաբար, հուշարձանների պահպանության համար գումարները ծառայությունը «վաստակում է»` դրանք միջոցառումներ կամ գիտական աշխատանքներ իրականացնելու նպատակով վարձակալության տալու դեպքում:

Ընդհանուր առմամբ, Պատմամշակութային արգելոց-թանգարանների և պատմական միջավայրի պահպանության ծառայության իրավասությամբ կա շուրջ 17 պատմամշակութային հուշարձան` Գառնի պատմամշակութային արգելոց-թանգարանը, Գլաձորի համալսարանը, Մեծամոր պատմահնագիտական արգելոց-թանգարանը, Զվարթնոց պատմամշակութային արգելոց-թանգարանը, Զորաց քարեր բնակատեղին, Լոռի բերդ արգելոցը և այլն:

Օրինակ, 2013 թվականին Գառնի պատմամշակութային արգելոց-թանգարանը վարձակալել են 7 անգամ, իսկ «Զվարթնոց»-ը` 6 անգամ: Ստացվող գումարները կարող են ուղղվել ոչ միայն դրանց, այլ նաև մյուս հուշարձան-արգելոցների պահպանության համար:

«Մեզ մոտ օրինակ, գալիս են մարդիկ, որ ցանկություն են հայտնում գիտաժողով անցկացնել Զվարթնոցի տարածքում ու գումարը տրամադրում են և վարձակալում», -հավելեց Պողոսյանը:

Ինչ վերաբերում է Զվարթնոց տաճարում անցկացված միջոցառմանը ու դրան հաջորդած դժգոհություններին, որոնք վերաբերում էին տաճարի տարածքում կիսամերկ մարդկանց ներկայությանը, Վլադիմիր Պողոսյանը ասաց. «Դժգոհության ալիքը ոչ թե բարձրացավ նրանից, որ մենք թույլ ենք տվել այդտեղ միջոցառում անցկացնել, այլ նրանից, որ հաջորդ օրը սոցցանցերում հայտնվում են լուսանկարներ, որտեղ տեխնիկական աշխատանքներ իրականացնող մարդիկ, արև եղանակին իրենց մի փոքր փնթի են պահել հագուկապի մասով և, այո, այդ վրդովմունքը արդարացի վրդովմունք է: Այդ պատճառով էլ համապատասխան մասնաճյուղի տնօրենը շատ խիստ նկատողություն է ստացել` վերջին նախազգուշացումով»:

Նշենք, որ Գառնի պատմամշակութային արգելոց-թանգարանում հունիսի 18-ին Կենտրոնական բանկը կորպորատիվ խնջույք էր կազմակերպել, որի համար երեկոյան ժամը 18:00-ին փակվել են թանգարանի դռները այցելուների համար. Գառնու տաճարում խնջույք կազմակերպելու համար Կենտրոնական բանկը վճարել էր 1 մլն 120 հազար դրամ:

Ի դեպ, ճիշտ է, ինչպես պաշտոնյան է պնդում, պատմամշակութային արժեքների պահպանության համար գումարներ պետբյուջեից չեն տրամադրվում, սակայն փոխարենը Նունե Եսայանին վերջին համերգի համար մշակույթի նախարարությունը պահուստային ֆոնդից փոխանցել էր շուրջ 54 մլն դրամ գումար: Հասարակության համար թերևս առավել ընդունելի կլիներ այդ գումարներն ուղղել պատմական արժեք ներկայացնող հուշարձանների վերականգնմանն ու պահպանմանը և ոչ թե գումար «վաստակել» սրբավայրերում տարատեսակ բնույթի խնջույքներ ու հավաքույթներ կազմակերպելու միջոցով:

Հ. Գ. Հրապարակումը պատրաստ էր, երբ Մշակույթի նախարարությունից տեղեկացրին, հաշվի առնելով, որ «Զվարթնոց» պատմամշակութային արգելոց-թանգարանի տարածքում կազմակերպված միջոցառումների ընթացքում պատշաճ չեն վերահսկվել պայմանագրերում կնքված կետերը՝ ՀՀ մշակույթի նախարար Հ. Պողոսյանի հրամանով «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրեն Վ. Պողոսյանին հայտարարվել է խիստ նկատողություն: «Զվարթնոց» պատմամշակութային արգելոց-թանգարանի մասնաճյուղի վարիչ Վ. Գրիգորյանը ազատվել է զբաղեցրած պաշտոնից:

Տեսանյութը` սոցցանցից:

Հարակից հրապարակումներ`
Սոցցանցերը մշակույթի նախարարությանը հուշում են իր տեղը
Տեր Ասողիկ. Սրբազան Հայաստանում դատապարտելի է տարաբնույթ միջոցառումների կազմակերպմամբ սրբավայրերի նվաստացումը
Խնջույք հուշարձանների տարածքում` «չնվաստացնելով» այն