Ձեր վստահելի աղբյուրը

Աֆրիկյանների ակումբի շենքի տարածքը կառուցապատողին հանձնելու մասին քաղաքապետարանի համապատասխան որոշումը վիճարկող երկրորդ հայցն է ներկայացվել Վարչական դատարան: «Պահպանենք Աֆրիկյանների ակումբի շենքը» քաղաքացիական նախաձեռնության անունից Հայաստանի հելսինկյան կոմիտեի և «Ուրբանլաբ Երևան» ՀԿ-ի երկրորդ հայցը դատարանը վարույթ ընդունելու կամ մերժելու ժամանակ ունի մինչև հունիսի 8-ը: Այս մասին Panorama.am-ի թղթակցին հայտնեց Հայաստանի հելսինկյան կոմիտեի փաստաբան Ռոբերտ Ռևազյանը:

Հիշեցնենք, որ կառավարության որոշումը, ըստ որի Աֆրիկյանների ակումբի շենքը ենթակա է տեղափոխման, Վարչական դատարանը մերժել էր վիճարկել: Քաղաքապետարանի մասով դատարանին ներկայացված երկրորդ պահանջն էլ վերադարձվել էր:

Հայցում երկու պահանջ կար՝ առ ոչինչ ճանաչել Աֆրիկյանների շենքը տեղափոխելու վերաբերյալ կառավարության համապատասխան որոշումն ու առ ոչինչ ճանաչել շենքի տարածքը կառուցապատողին հատկացնելու մասին քաղաքապետարանի համապատասխան որոշումը:

«Կառավարության որոշումը վիճարկելու մերժումը հիմնավորվել էր այն բանով, որ այդ հարցը ենթական չէ Վարչական դատարանի քննությանը»,- ասաց Ռոբերտ Ռևազյանը:

Հայցի՝ Երևանի քաղաքապետարանի որոշումն առ ոչինչ ճանաչելու մասը հետ է վերադարձվել պատճառաբանությամբ, որ ներկայացված երկու պահանջները քննության տարբեր ընթացակարգեր են պահանջում:

«Կոնկրետ այն ընթացակարգով, որով քննվել է կառավարության որոշումն առ ոչինչ ճանաչելու մասը վարույթ ընդունելու հարցը, այդ կազմով չի կարող քննվել քաղաքապետարանի որոշումը վիճարկող մասը վարույթ ընդունելու հարցը»,- մանրամասնեց փաստաբանը:

Նախորդ հայցի հետ նաև միջնորդություն էր ներկայացվել՝ շենքի ապամոնտաժումն անմիջապես դադարեցնելու մասին: Այս անգամ ևս միջնորդությունն առկա է, իսկ Ռոբերտ Ռևազյանը կարծում է, որ այն ընդունելու կամ մերժելու որոշումը դատարանը կկայացնի գործը վարույթ ընդունելու կամ չընդունելու որոշման հետ միասին:

Հիշեցնենք, որ շենքի ապամոնտաժման հարցով նիստ էր անցկացրել նաև Հանրային խորհրդի Պատմական-ազգային արժեքների, հուշարձանների պահպանության, պատկանելության և օգտագործման խնդիրների ենթահանձնաժողովը: Որոշում է ընդունվել դիմել ՀՀ Մշակույթի նախարարությանը, Քաղաքաշինության նախարարությանը, Երևանի քաղաքապետարանին` հետևյալ առաջարկություններով.

1. Դադարեցնել Տերյան 11 հասցեում գտնվող Աֆրիկյանների բնակելի տան ապամոնտաժումը:
2. Անհապաղ կերպով քայլեր ձեռնարկել շենքի մնացած մասի կոնսերվացման ուղղությամբ փրկելու համար այն հետագա քայքայումից:
3. Քանդված մասի քարերը, որոնք տարվել են այլ տեղ, հետ բերել և նույն տեղում (նույն տարածքում) վերականգնել Աֆրիկյանների տան (ակումբի) ամբողջականությունը:
4. Ապահովել հուշարձանի ամբողոջական (այդ թվում և ներքին տարածության) պահպանությունն ու ինտեգրումը քաղաքի այդ հատվածում իրականացվող քաղաքաշինական ծրագրերին:
5. Բոլոր քաղաքաշինական ծրագրերում հաշվի առնել այս շինության գեղարվեստական ու ճարտարապետական արժեքն ու ապահովել դրա շրջակայքում նույն ժամանակաշրջանին թվագրվող շինությունների պահպանումը։

Առաջարկել է նաև համապատասխան քննարկման ներկայացնել և չեղյալ համարել «Հին Երևան» նախագիծը, որում էլ նախատեսվում է վերակառուցել Աֆրիկյանների շենքը, կամ այն ընդունել որպես նոր տիպի թաղամասի նախագիծ ու կառուցել Երևան քաղաքի որևէ ծայրամասում:

Երևանի Տերյան 11 (13) հասցեում գտնվող Աֆրիկյանների տունը 19-րդ դարի վերջի 20-րդ դարի սկզբի երևանյան ճարտարապետության լավագույն նմուշներից է։ Այն ներառված է Երևան քաղաքի պատմության և մշակույթի անշարժ հուշարձանների ցանկում՝ որպես հանրապետական նշանակության հուշարձան (թիվ 204): ՀՀ կառավարության 7.10.2004-ի 1616-Ն որոշման հավելված 2-ում էլ շենքը 14 հուշարձանների հետ հայտնվել է տեղափոխման ենթակաների ցանկում:

Հարակից հրապարակումներ`

Վարչական դատարանը մերժել է վարույթ ընդունել Աֆրիկյանների ակումբի վերաբերյալ հայցը

Աֆրիկյանների շենքի ֆասադի զգալի մասն արդեն չկա (Տեսանյութ)

Նախարարությունը փորձում է պարզաբանել Աֆրիկյանների շենքի «քանդումն ու տեղափոխումը»

Դատարանը դեռ վարույթ չի ընդունել Աֆրիկյանների շենքի գործով հայցը