Ինձ առաջադրված մեղադրանքները հերյուրանք են, կեղտոտ ու սև PR. Խադիջա Իսմայիլովա
Ձերբակալված ադրբեջանցի լրագրող Խադիջա Իսմայիլովան այսօր մեկուսարանից զանգահարել է «Ազատություն ռադիոկայանի» ադրբեջանական մասնաճյուղի իր գործընկերներին: Խոսելով իր ձերբակալության մասին` նա նշել է, թե ինքը գիտեր, որ իշխանությունները վաղ թե ուշ տեղի կտան: Այս մասին հաղորդում է ադրբեջանական «Թուրան» լրատվական գործակալությունը:
Համաձայն աղբյուրի տվյալների՝ լրագրողը վստահեցրել է, թե ինքը սպասում էր, որ իշխանությունների նյարդերը չեն դիմանա, և դա պատահեց: «Իմ դեմ առաջադրված մեղադրանքները հերյուրանք են, դրանք կեղտոտ և սև PR են: Չնայած այդ ամենին` ես ուժեղ եմ: Գիտեմ՝ ձեզ համար նույնպես հեշտ չէ: Բայց մի՛ հուսահատվեք: Շարունակե՛ք աշխատել: Շատ կարևոր է, որպեսզի յուրաքանչյուրը շարունակի իր աշխատանքը: Գործընկերներից ակնկալում ենք նոր հետաքննություններ, իսկ իրավապաշտպաններից՝ նոր նախաձեռնություններ: Աշխատանքը պետք է շարունակվի» ,- ասել է Իսմայիլովան:
«Ես խորապես անհանգստացած եմ Իսմայիլովայի ձերբակալման առնչությամբ, որը ենթարկվել է անողոք հետապնդումների Ադրբեջանի կառավարության կողմից իր երկրում կոռուպցիայի դեպքերը մերկացնելու փորձերի ու քաղբանտարկյալների իրավունքների պաշտպանության ոլորտում իր աշխատանքի համար»,- միևնույն ժամանակ ահա նման հայտարարությամբ է հանդես եկել ԱՄՆ Կոնգրեսի Հելսինկյան կոմիտեի նախագահ Բենջամին Կարդինը: Հայտարարությունը հրապարակվել է նրա պաշտոնական կայքում:
Ինչպես նշված է նյութում, Իսմայիլովայի դեմ ներկայիս մեղադրանքները տարօրինակ են և թվում է` ունեն լոկ մեկ նպատակ` լռեցնել Ադրբեջանում քննադատական հերթական ձայնը, որոնք առանց այլ էլ քիչ են մնացել:
«Իսմայիլովան պետք է որ ելույթ ունենար Հելսինկյան կոմիտեի առջև 2014-ի նոյեմբերի 19-ին, սակայն նրան, իշխանությունների որոշմամբ, երկրից դուրս չթողեցին: Իսմայիլովայի դեմ ներկայիս մեղադրանքներն ինքնասպանության դրդելու հարցում հետապնդումների սրման հետևանք են, որոնց նա ենթարկվում է կառավարության կողմից արդեն շուրջ մի քանի տարի»,- հայտարարել է Հելսինկյան կոմիտեի նախագահը:
Նրա խոսքերով` Ադրբեջանը` որպես ԵԱՀԿ անդամ, ստանձնել է պարտավորություն մարդու, այդ թվում` մամուլի իրավունքները հարգելու: «Հելսինկյան կոմիտեն հերթական անգամ կոչ է անում Ադրբեջանի կառավարությանը կատարել իր խոստումներն ու անհապաղ դադարեցնել բոլոր լրագրողների, այդ թվում` Իսմայիլովայի հետապնդումները»,- ասված է հայտարարության տեքստում:
«Լրագրողներ առանց սահմանի» հայտնի իրավապաշտպան կազմակերպությունը ևս հանդես է եկել քննադատողական հաղորդագրությամբ` անդրադառնալով ադրբեջանցի լրագրողի ձերբակալմանը: Կազմակերպության գերմանական մասնաճյուղի տնօրեն Քրիստիան Միրն անհանգստություն է հայտնել Ադրբեջանում բռնաճնշումների նոր ալիքի առնչությամբ:
«Ըստ ամենայնի` Ադրբեջանի իշխանությունները փորձում են ամեն կերպ հարկադրել լռել իրենց իսկ ավտորիտար վարչակարգի ևս մի նշանակալից քննադատի»,- հայտարարել է նա:
Հայտարարությամբ է հանդես եկել նաև սույն կազմակերպության` Արևելյան Եվրոպայի ու Կենտրոնական Ասիայի մասնաճյուղի ղեկավար Յոհան Բիրը:
«Մենք ապշած ենք այդ կեղծ մեղադրանքներից ու անարդար ազատազրկումից: Ադրբեջանում անկախ լրագրողական հետաքննությունների բնագավառում առաջատար Խադիջա Իսմայիլովայի ձերբակալությունն ապացույց է այն բանի, որ իշխանություններն ավելի վճռականորեն, քան երբևէ, ստանձնել են ողջ ընդդիմության վերացման գործընթացը»,- ասել է նա:
Նշենք, որ ադրբեջանցի հայտնի լրագրող Խադիջա Իսմայիլովային ձերբակալել են դեկտեմբերի 5-ին հարցաքննությունից հետո: Սաբայիլի շրջանի դատարանը որպես նրա նկատմամբ խափանման միջոց սահմանել է երկու ամիս ժամկետով նախնական կալանք: Լրագրողը մեղադրվում է ինքնասպանության դրդելու հոդվածով: Եթե նրա մեղքն ապացուցվի, ապա Իսմայիլովային սպասվում է 3-7 տարի ազատազրկում:
Խադիջա Իսմայիլովան բազմիցս եղել է Ադրբեջանի կառավարության թիրախն իր լրագրողական գործունեության պատճառով: Նա մի շարք լրագրողական հետաքննությունների հեղինակ է, որտեղ մերկացրել է Ադրբեջանի իշխանության բարձր օղակներում կաշառակերության մեծ չափերն ապացուցող փաստեր: Վերջին շրջանում նա թոք-շոու էր վարում «Ազատություն ռադիոկայանում»:
Նյութեր թեմայի շուրջ`
Միջազգային կազմակերպություններն ու մամուլը` ադրբեջանցի լրագրող Խադիջա Իսմայիլովայի ձերբակալության մասին
Արևմուտքը քննադատում է Ադրբեջանի իշխանություններին լրագրող Խադիջա Իսմայիլովայի ձերբակալության համար
Ադրբեջանը բացասական ուղերձ է հղում միջազգային հանրությանը». ԵԽ գլխավոր քարտուղարը` Իսմայիլովայի կալանքի մասին
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ