Ձեր վստահելի աղբյուրը

Այսօր առավոտյան ժամերից ի վեր «Ազատություն ռադիոկայանի» Բաքվի մասնաճյուղի գրասենյակում Ադրբեջանի դատախազության ներկայացուցիչներն անսպասելի խուզարկում են սկսել, ինչի հետևանքով առգրավել են գրասենյակի կարևոր փաստաթղթերը, թերթիկները, տարբեր սարքավորումներ, կրիչներ, նոութբուքեր: Բացի այդ, կոտրել են գանձապահարանը, այնտեղից դուրս բերել կնիքը, փաստաթղթեր ու բլանկներ: Այս մասին տեղեկացնում է ադրբեջանական «Թուրան» լրատվական գործակալությունը:

Ինչպես նշված է նյութում, ներկա իրավիճակում ռադիոկայանի գործունեությունն Ադրբեջանից անհնարին է, սակայն դրա ղեկավարությունը մտադիր չէ հանձնվել և լուսաբանելու է իրադարձությունները Պրահայի գրասենյակից:

Հայտնի է նաև, որ աշխատակիցներին փակել են Բաքվի գրասենյակի սենյակներից մեկում ու խստիվ արգելել դուրս գալ:

Նշենք, որ ավելի վաղ դատախազությունը մեկնաբանել էր խուզարկումը: Ինչպես «Թուրանին» ասել էր մամուլի ծառայության ղեկավար Էլդար Սուլթանովը, խուզարկումն անցկացնում են ինչ-որ ծանր հանցանքի հիման վրա հարուցված քրեական գործի շրջանակներում, սակայն հստակ տվյալներ չէր հաղորդել:

Գործակալությունը ենթադրում է, որ խոսքը տասնյակ ՀԿ-ների գործի մասին է, որոնց մեղադրում են խաբեության, արտասահմանյան դոնոր կազմակերպությունների նախագծերի իրականացման ժամանակ հարկերը չվճարելու համար:

Իր հերթին, «Ազատություն ռադիոկայանի» ադրբեջանական մասնաճյուղը հայտնում է` խուզարկումն ընթացքի մեջ է, ժամանել են նաև ոստիկաններ: Նրանցից մեկը սոսնձել է մուտքին կից երկար ու նեղ պատուհանը, որպեսզի շենքի միջանցքից հնարավոր չլինի տեսնել կամ լուսանկարել ներսում կատարվածը:

Ինչպես ասվում է նյութում, «Ազատություն ռադիոկայանի» ադրբեջանական մասնաճյուղի ղեկավար Քենան Ալիևը կատարվածի շուրջ մեկնաբանություններ է տվել Պրահայի «Մեդիաֆորում» կայքին: Դատելով սելֆի-լուսանկարներից, որոնք տարածվել են համացանցում, աշխատակիցները ներկայումս փակված են կոնֆերենց-դահլիճում:

Նշենք, որ «Ազատություն ռադիոկայանի» ադրբեջանական մասնաճյուղի աշխատակից, ադրբեջանցի հայտնի լրագրող Խադիջա Իսմայիլովային ձերբակալել են դեկտեմբերի 5-ին հարցաքննությունից հետո: Սաբայիլի շրջանի դատարանը որպես նրա նկատմամբ խափանման միջոց սահմանել է երկու ամիս ժամկետով նախնական կալանք: Լրագրողը մեղադրվում է ինքնասպանության դրդելու հոդվածով: Եթե նրա մեղքն ապացուցվի, ապա Իսմայիլովային սպասվում է 3-7 տարի ազատազրկում:

Խադիջա Իսմայիլովան բազմիցս եղել է Ադրբեջանի կառավարության թիրախն իր լրագրողական գործունեության պատճառով: Նա մի շարք լրագրողական հետաքննությունների հեղինակ է, որտեղ մերկացրել է Ադրբեջանի իշխանության բարձր օղակներում կաշառակերության մեծ չափերն ապացուցող փաստեր: Վերջին շրջանում նա թոք-շոու էր վարում «Ազատություն ռադիոկայանում»:

Նախորդիվ`
Միջազգային կազմակերպություններն ու մամուլը` ադրբեջանցի լրագրող Խադիջա Իսմայիլովայի ձերբակալության մասին
Արևմուտքը քննադատում է Ադրբեջանի իշխանություններին լրագրող Խադիջա Իսմայիլովայի ձերբակալության համար
ԵԽԽՎ նախագահը մտահոգված է Իսմայիլովայի ձերբակալմամբ