Ձեր վստահելի աղբյուրը

Փետրվարի 9-ին ինդոնեզական հանրահայտ «The Jakarta Post» պարբերականում տպագրվել է լրագրող Դիլան Ամիրիոյի հարցազրույցը Ինդոնեզիայում ՀՀ դեսպան Աննա Աղաջանյանի հետ:

Խոսելով Ինդոնեզիայում Հայաստանի ներկայությանը լիցք հաղորդելու մասին` Դեսպան Աղաջանյանը նշել է, որ այս առումով կարևոր է նախ և առաջ Ինդոնեզիայում Հայաստանի մասին իրազեկվածության բարձրացումը:

«Մենք աշխատում ենք տարբեր կառավարական մարմինների, հասարակական և գիտական շրջանակների հետ՝ ուսումնասիրելու երկկողմ կապերի զարգացման հնարավորություններն ու ձևավորելու համագործակցություն՝ այդ թվում, ապակենտրոնացված ձևաչափում», - շեշտել է Աննա Աղաջանյանը:

Խոսելով այն մասին, թե, ընդհանուր առմամբ, ինչ կարող են երկու երկրները միմյանց առաջարկել, դեսպանը նշել է, որ Ինդոնեզիայից Հայաստան արտահանվող հիմնական ապրանքներն են սուրճը և կահույքը: «Երկկողմ առևտրաշրջանառությունն այդքան էլ մեծ չէ, սակայն մենք ուսումնասիրում ենք նոր ուղություններ` հաշվի առնելով նաև այն մեծ տարածությունը, որով մեր ապրանքները պետք է տեղափոխվեն»,- փաստել է դեսպանը:

Պատասխանելով Հայաստանի զբոսաշրջային ներուժի վերաբերյալ հարցին` դեսպան Աղաջանյանն ընդգծել է, որ փոքր լեռնային երկիր Հայաստանն ունի հարուստ և բազմազան պատմամշակութային ժառանգություն և հրաշալի բնություն:

«Մեր մշակույթը պատմականորեն հենված է եղել քրիստոնեության վրա, քանզի Հայաստանն առաջին երկիրն է, որը ընդունել է քրիստոնեությունը որպես պետական կրոն 301թ.», - նշել է դեսպանը:

Անդրադառնալով երկկողմ հետաքրքրություն ներկայացնող հարցերին` դեսպան Աղաջանյանը ասել է, որ երկու երկրները փորձում են զարգացնել միջխորհրդարանական համագործակցությունը, քանզի խորհրդարանական դիվանագիտությունն առավել լայն տարածում ունի և հաճախ կարող է առավել կարևոր դեր խաղալ, քան ավանդական դիվանագիտությունը: Դեսպանը շեշտել է, որ անկախացումից ի վեր` Հայաստանը, ինչպես և Ինդոնեզիան, էական բարեփոխումներ են իրականացրել:

«Մենք նույն գործընթացում ենք ներգրավված և ունենք ընդհանուր նպատակներ: Ես ծրագրում եմ կազմակերպել մեր երկու երկրների օրենսդիրների կամ համապատասխան մասնագետների հանդիպումներ: Բացի դրանից մենք պետք է կենտրոնանանք ժողովուրդների միջև կապերի ամրապնդմանը», - իր խոսքը եզրափակել է Աննա Աղաջանյանը: