Ձեր վստահելի աղբյուրը

Վերելակը ևս տրանսպորտ է
Երևանում գրանցված 5253 վերելակից 2014-ին փորձաքննության է անցել միայն 3168-ը, որից 94-ը ստացել է բացասական եզրակացություն, 1500-ը՝ թերությունների վերացման միջոցառումների ծրագիր, որն իրագործելուց հետո նոր ստացել են դրական եզրակացություն: Panorama.am-ի հետ զրույցում այսպես ասաց տարածքային կառավարման և արտակարգ իրավիճակների նախարարության Տեխնիկական անվտանգության ազգային կենտրոնի տնօրենի տեղակալ, Երևան քաղաքի ծառայության պետ Վոլոդյա Հովսեփյանը:

Նա նշեց, որ համաձայն տեխնիկական անվտանգության ապահովման պետական կարգավորման մասին օրենքի, բոլոր վերելակ շահագործողները պարտավոր են տարեկան մեկ անգամ ներկայացնել վերելակը փորձաքննության: Փորձաքննության համար անհրաժետ է դիմել տարածքային կառավարման և արտակարգ իրավիճակների նախարարության Տեխնիկական անվտանգության ազգային կենտրոն, վճարել 2950 դրամ և ստանալ հետագա շահագործման վերաբերյալ դրական կամ բացասական եզրակացություն:

«Համատիրության նախագահը, եթե ստանում է բացասական եզրակացություն վերելակի շահագործման հետ կապված, պարտավոր է հոսանքազրկել վերելակը, պարտավոր է վերելակին փակցնել մեր տված բացասական եզրակացությունը: Դրական եզրակացության դեպքում էլ համատիրության ղեկավարը կարող է փակցնել վերելակին, որպեսզի բնակիչները համոզված լինեն, որ օգտվում են անվտանգ շահագործվող վերելակից»,- ասաց նա:

Վ. Հովսեփյանը նշեց, որ շահագործողը համատիրությություններն են, այսինքն` հենց համատիրությությունների ղեկավարները պետք է դիմեն կենտրոն: Իսկ թե ինչո՞ւ չեն դիմում հարցին ի պատասխան, կենտրոնի փոխտնօրենը կոնկրետ պատասխան չկարողացավ տալ. «Անպատասխանատվություն է: Վճարվող գումարը մեծ չէ, բաց պատասխանատվությունը լուրջ է: Նման դեպքում առաջին պատասխանատուն համատիրության ղեկավարն է: Գոնե իրենց ապահովության համար պետք է դիմել»:

Նորակառույց շենքերի վերելակների դեպքում էլ, ըստ նրա, փորձաքննության ժամանակ պահանջներն ավելի խիստ են լինում: Փորձաքննության չանցնելու դեպքում համատիրության ղեկավարը, օրենքի համաձայն, տուգանվում է 1 միլիոն դրամով. «Տուգանողը տարածքային կառավարման և արտակարգ իրավիճակների նախարարության Հրդեհային և տեխնիկական անվտանգության տեսչությունն է: Հավատարմագրման ռեեստրի գործակալությունն ամեն ամիս տվյալներ է տալիս տեսչությանը, որ շենքերի վերելակներ են անցել փորձաքննություն, որոնք չեն անցել»:

Ի դեպ` այն, որ պիտի դիմեն, նոր միայն ստուգում անցնեն, սա էլ տարօրինակ մոտեցում է, եթե իհարկե ճիշտ է: Ինչո՞ւ պիտի հատուկ դիմել, եթե տեխզննումը պարտադիր է: Մանավանդ , որ տվյալները, թե որոնք են անցել, որոնք` ոչ, հավաքվում է մի տեղ:

Երբ տուգանքը այլևս ոչինչ չի ուղղի
Ինչ վերաբերում է մարտի 21-ին Երևանում արձանագրված ցավալի դեպքին՝ Բաշինջաղյան փողոցի 2-րդ նրբանցքի թիվ 1 շենքի վերելակն ընկել էր, իսկ խցիկում հայտնաբերվել էր մոտ 35 –ամյա քաղաքացու դի, Վ. Հովսեփյանն ասաց, որ վերելակը 2014 թվականին փորձաքննություն չէր անցել: Նա տեղեկացրեց, որ այս դեպքով նշանակվել է տեխնիկական քննություն, եզրակացությունը կլինի առաջիկա օրերին:

Ինչպե՞ս կարող են տվյալ վերելակից օգտվողներն տեղեկանան` վերելակը փորձաքննություն անցե՞լ է, թե ՞ ոչ: Տրամաբանորեն` համապատասխան կտրոններ պիտի փակցվեն վերելակների վրա, տեսանելի տեղ: Այնինչ դրանք ոչ մի վերելակի վրա չկան: Ինչո՞ւ: Մեր փոքրիկ հարցումը Ֆեյսբուքում ցույց տվեց, որ մարդիկ որևէ կերպ տեղեկացված չեն իրենց վերելակը տեխզննում անցած է, թե ոչ: Մյուս կողմից էլ հնարավոր չէ պատկերացնել զանգերով դրանք ճշտելու հնարավարությունը. համատիրության ղեկավարն օրական լավագույն դեպքում 100-ից ավելի  զանգի պետք է պատասխանի:

Նոր Նորք 1/5 համանատիրության նախագահն ասաց, որ ամեն տարի իր հսկողության տակ գտնվող շենքերի վերելակները փորձաքննություն անցնում են:

«Այդ մասին տեղյակ են լինում բոլոր բնակիչները, իրենք էլ կարողանում են մասնակցել»,- ասաց նա:

Պատասխանելով հարցին, թե արդյո՞ք Տեխնիկական անվտանգության ազգային կենտրոնը տրամադրում է անհրաժեշտ փաստաթուղթ փորձաքննության վերաբերյալ և արդյո՞ք այն փակցվում է վերելակին, որպեսզի ոչ միայն շենքի բնակիչները, նաև այդ բնակիչներին այցելող հյուրերը վստահ լինեն, որ օգտվում են անվտանգ վերելակից, համատիրության նախագահն ասաց. «Այո տալիս են փաստաթուղթ, բայց չեմ փակցնում: Նման պահանջ չի եկել: Եթե լինի, կարող եմ պատճենել ու մի քանի տեղ փակցնել: Ես պատասխանատու եմ իմ բնակիչների համար, իսկ իրենք թող իրենց հյուրերին տեղյակ պահեն»:

Նոր նորք 5/3 համատիրության կառավարիչն էլ ասաց, որ եզրակացությունը տրամադրվում է իրեն, բայց չի փակցնում վերելակին. «Որպես կանոն, ինչ կպցնում ես վերելակին, պատռում են: Բայց ինչպես եք պատերացանո՞ւմ, եթե դա փակցված չի լինում, մարդ չի՞ մտնում վերելակ»:

Հարց է ծագում, թե այդ դեպքում ինչո՞ւ չեն պատռում բնակիչների պարտքերի ու վճարելիք մուծումների մասին լրիվ ավելորդ թղթերը, որոնք երդում տալու պարտաճանաչությամբ համատիրությունը փակցնում է բոլոր մուտքերում: Ի դեպ` խախտելով բնակիչների անձնական կյանքի իրավունքի մի շարք կանոններ:

Քաղաքապետարանը` «բարեգո՞րծ»
Երևանի քաղաքապետարանի հասարակայնության և լրատվության հետ կապերի վարչության պետ Արթուր Գևորգյանը Panorama.am-ի հետ զրույցում ասաց, որ քաղաքային բյուջեից տարեկան գումար են հատկացնում բազմաբնակարանների պահպանման համար:

«Քաղաքապետարանը պարտավոր չէ գումար հատկացնել, բայց քանի բազմաբնակարան շենքերի որոշ մասում անմխիթար վիճակ է, աջակցություն է ցուցաբերում: Ուզում եք անվանեք բարի կամքի դրսևորում: Պարտավորություն չունենք, բայց անում ենք»,- նշեց նա:

Այդ գումարը, ըստ նրա, փոխանցվում է վարչական շրջանների համապատասխան բաժիններ, որտեղից էլ աջակցության կարիք ունեցող շենքերին է տրամադրվում:

Ա. Գևորգյանը նշեց, որ վերելակը բաժնային սեփականություն հանդիսացող գույք է , համատիրության ղեկավարն է հետևում բաժնային սեփականությանը, իսկ նրանց վերահսկողն էլ ուղիղ բնակիչն է, քանի որ հենց բնակչի կողմից է ինքն ընտրվել:

«Օրենքի համաձայն, համատիրության ղեկավարը պարտավոր է տարեկան առնվազն երկու անգամ ժողով անել ու բոլոր բնակիչներին ներկայացնել ծախսերը: Եթե բնակիչները դժգոհ են նրա աշխատանքից, կարող են հանել ու մեկ ուրիշին ընտրել: Համատիրության ղեկավարների դեմ բնակիչները լծակ ունեն, իսկ քաղաքապետարանը դե յուրե որևէ լծակ չունի»,- նշեց Երևանի քաղաքապետարանի հասարակայնության և լրատվության հետ կապերի վարչության պետը:

Ի դեպ` սա էլ է տարօրինակ` քաղաքապետարանը բարեգործական կազմակերպություն անգամ եթե լիներ, որը գումարները իր սեփական գրպանից է աջ ու ձախ բաժանում, ԷԼԻ պարտավոր էր իր հատկացրած գումարները ու դրանց նպատակային օգտագործումը վերահսկել:

Այդպես էլ չստանալով բավարար ու պատասխանատվություն ենթադրող պատասխաններ`մենք հավանաբար փոխենք առաջին ենթավերնագիրը ու վերելակները «տրանսպորտի միջոց» գնահատականից բերենք քաղաքացիների համար ավելի հասկանալի բնորոշման` «ասֆալտ»:

Նախորդող հրապարակումներ՝

Եվս մի վտանգավոր «տրանսպորտ»՝ վերելակ
Վերելակն ընկել է. 35-ամյա քաղաքացին խցիկում հայտնաբերվել է մահացած
Փրկարարները վերելակի արգելափակումից դուրս են բերել երեխաների
Փոխքաղաքապետ. Վերելակները ֆիզիկական և բարոյական առումով մաշված են
Շենքի 7-րդ հարկից վերելակ է ընկել` քաղաքացին մեջը
Վերելակ նստելիս ուշադիր եղեք. Վերելակներում քաղաքացիներ են մնացել
Շարուրիում վերելակների մեծ մասի շահագործումն անվտանգ չէ, բայց մարդիկ օգտվում են դրանցից
Վերելակների վատ աշխատելու պատճառը ցածր ջերմաստիճանն է