Ձեր վստահելի աղբյուրը

Ադրբեջանում անցկացվող առաջին եվրոպական Օլիմպիական խաղերի կապակցությամբ Իլհամ Ալիևը ծայրաստիճան անհանգստացած է իր ժողովրդի կերպարով: Նրան այդ հարցն այնքան է հուզում, որ իշխանամետ հեռուստաընկերությունները տեղացի ադրբեջանցիներին զգեստավորում և դիմահարդարում են որպես արտասահմանցի զբոսաշրջիկների, ովքեր նավթով հարուստ կովկասյան այս երկիրը նկարագրում են բացառիկ գույներով: Այս մասին գրում է «Thedailybeast.com»-ը`Բաքվում կայացող Եվրոպական Օլիմպիական խաղերի մասին վերլուծական հոդվածում: 

Ըստ հոդվածագրի` Ալիևի հարազատներից մեկին պատկանող «Lider» հեռուստաընկերությունը հարցազրույց է հրապարակել իբր Լոնդոնից ժամանած Յեյմս Բոնար անունով ոմն մեկի հետ, ով իրականում ադրբեջանցի Սեյմուր Սաֆարովն է եղել: Նա իր կոտրատված անգլերենով պատմել է, թե որքան տպավորված է ինքը Բաքվում կազմակերպված Օլիմպիական խաղերով, և թե որքան շքեղ քաղաք է Ադրբեջանի մայրաքաղաքը:

Ադրբեջանական անկախ «Մեյդան» հեռուստաընկերության սոցիալական մեդիայի պատասխանատուները «Facebook»-ում հայտնաբերել են Սաֆարովի էջը, որտեղ նա լուսանկար է ունեցել` ճիշտ և ճիշտ հագնված այնպես, ինչպես «Lider» հեռուստաընկերության եթերում ունեցած ելույթի ժամանակ:

Պարբերականը անդրադարձել է նաև ադրբեջանական մեկ այլ` «ANS» հեռուստաընկերությամբ հեռարձակված մի ուրիշ հարցազրույցի, որտեղ իրեն ռուս զբոսաշրջիկ ներկայացնող ադրբեջանցին պատմել է, թե ինչպես է ինքը եղել Հավայան կղզիներում և կարծում է, որ Կասպիան ավազանը անհամեմատելի է Հավայան կղզիների հետ, քանզի վերջիներիս ափերը աղտոտված են արտանետումների և թափոնների հետևանքով:

Պարբերականը մեջբերել է ադրբեջանական «Մեյդան» հեռուստաընկերության գործադիր տնօրեն Էմին Միլլիի խոսքը, համաձայն որի` մարդիկ Ադրբեջանում սկսել են ծիծաղել իշխանությունների` անգամ զբոսաշրջիկներին կեղծելու մոլուցքի վրա:

Հոդվածում նշվում է, թե ադրբեջանցի ծաղրանկարիչ Գունդուզ Աղաևը նկար է հրապարակել, որտեղ պատկերված է, թե ինչպես են մոխրագույն ադրբեջանցիները մտնում կերպարանափոխությունների սենյակ և դուրս գալիս եվրոպացի ազգերի ներկայացուցիչների արտաքինով`պատրաստ հարցազրույցներ տալու:

Ըստ հոդվածագրի` առավել մասսայականություն է ստացել Ադրբեջանի ամենահայտնի ընդդիմադիր բլոգեր և լուսանկարիչ Մեհման Հուսեյնովի պարոդիան, որտեղ նա ծաղրել է կեղծ զբոսաշրջիկների հարցազրույցները` ինքը ներկայանալով որպես գերմանացի զբոսաշրջիկ, ով հենց նոր է ժամանել Բաքու, որպեսզի Ադրբեջանը որակի որպես դրախտ:

Բլոգերի տեսանյութում Հուսեյնովը պատմում է, թե ինչ ահավոր դրություն է տիրում Գերմանիայում, որտեղ ոստիկանները ծեծում են մարդկանց, իր տունը Բեռլինում ավերվել է, և պետությունը որևէ փոխհատուցում չի տալիս: Այս ամենին զուգահեռ Հուսեյնովը հոլովակում ցուցադրել է լուսանկարներ, որոնք իրականում արված են եղել Բաքվում:

Հոդվածագիրն անդրադարձել է նաև Ադրբեջանի Ազատություն ռադիոկայանի դատապարտված լրագրող Խադիջա Իսմայիլովային` որպես այս երկրում խոսքի ազատության դեմ իրականացվող բռնությունների զոհի: Նշվում է, որ Իսմայիլովան տարիներ շարունակ հետաքննել է կոռուպցիոն այն իրողությունները, որոնք կապված են Իլհամ Ալիևի ընտանիքի անդամների հետ:

Ըստ պարբերականի` Բաքուն, օգտագործում է իր լոբբիստական խմբերն ու նավթային ռեսուրսները Վաշինգտոնից մինչև Լոնդոն և Բրյուսել, որպեսզի միջազգային հանրությունը աչք փակի Ադրբեջանում տիրող ավտորիտարիզմի վրա:

Հոդվածում խոսվում է նաև Եվրոպական Օլիմպիական խաղերի կազմակերպման վրա «անհեթեթ» ծախսված 8 մլրդ. դոլարի մասին` նշելով որ ադրբեջանցի նախարարը պաշտոնապես հայտարարել է ընդամենը 1,2 մլրդ-ի մասին, ինչը, սակայն, չի համապատասխանում իրողությանը: