Ձեր վստահելի աղբյուրը

«Ես ընդհանրապես չեմ ուզում որևիցե մեկին նմանվեմ, եթե ուզենայի նմանվեի, Մալիշկայից կհասնեի ընդամենը Արարատյան դաշտավայր: Ընենց որ, եթե ես ասեի իմ ամբիցիաների մասին, կզարմանաք, ավելի լավ ա չասեմ», -այսպես արձագանքեց Ռուսաստանի հայերի միության նախագահ Արա Աբրահամյանը լրագրողի այն դիտարկմանը, թե գործարար Գագիկ Ծառուկյանն էլ փորձեց կուսակցություն ղեկավարել, բայց վերջում հրաժարական տվեց:

Ի պատասխան հարցին, թե արդյոք ճիշտ են տեղեկությունները, որ «Օրինաց երկիր» կուսակցության նախագահ Արթուր Բաղդասարյանի հետ է համագործակցելու ընտրություններին ընդառաջ, Աբրահամյանը պատասխանեց. «Իմ անցած ճանապարհը նման չէ, որևիցե մեկի անցած ճանապարհին, իմ ունեցած փորձը նման չէ որևիցե մեկին, ես չեմ ուզում որևիցե մեկին արժեքազրկել, կուզենայի, որ դուք իմ անցած ճանապարհը նայեիք, տեսնեիք` որ երկրում, ինչ հաջողության եմ հասել: Եթե ձեզ ասեմ, որ 17 երկիր պարգևատրել ա իրանց ունեցած ամենաբարձր շքանշաններով, դուք կասեք երևի Աբրահամյան Արան փողը տվելա, վերցրել ա: Շատ վախտ չեմ էլ ուզում ասեմ էդ մասին»:

Անդրադառնալով բուն հարցին, ասաց. «Արթուր Բաղդասարյանն իմ բարեկամն ա, քաղաքական գործիչ ա, ինքն ունի իր գնալու ճանապարհը: Մենք բոլորս Հայաստանում ենք գտնվում, բոլորս ուզում ենք այս երկիրը ինչ-որ մի բան կառուցնեք: Եթե ես գնում եմ ընտրության, դա չի նշանակում, որ ես Արթուր Բաղդասարյանին դեմ եմ կամ ինչ-որ մի բան այնպես չէ: Բոլորի հետ կաշխատենք, ովքեր ընդունեն մեր կուսակցությունը»:

Լրագրողը հիշեցրեց Աբրահամյանի մի հայտարարություն, երբ նա ասել էր, որ ինքը ռուս է ու հետաքրքրվեց` հիմա՞ էլ եք զգում ձեզ ռուս:

«Այո, ես ռուս եմ, դուք գիտեք` ինչ է նշանակում ռուս: Ռուս դա չի նշանակում ազգություն, դա մենթալիտետ ա, ասենք ոնց որ ամերիկացի: Ես հայ եմ, հպարտանում եմ իմ ազգությամբ, իմ ծննդավայրով: Իմ գյուղով` Մալիշկայով: Գնալու եմ իմ գյուղացիների հետ խորհրդակցեմ, տեսնեմ` գործուղում կտա՞ն մեծ քաղաքականություն գնալու: Բայց ամեն ինչ լավ ա լինելու մի անհանգստացեք», -արձագանքեց Ռուսաստանի հայերի միության նախագահը:

Լրագրողներից մեկի հարցը, թե ի՞նչն է խանգարում Արա Աբրահամյանին Ռուսաստանում քաղաքական կարիերա անել, այնտեղ կուսակցություն ստեղծել, ՌՀՄ նախագահին վրդովեցրեց.

«Հըլը դուք պատասխանեք, ի՞նչ եք կարծում` ի՞նչն ա խանգարում ինձ` Աբրահամյան Արային Ռուսաստանում քաղաքական կարիերա անել: Այնպես չի, որ ես Ռուսաստանում 4-րդական դիրքերում եմ գտնվում ու տեղ չունեմ զարգանալու, ուզում եմ գամ Հայաստանում ինչ-որ կարիերա ստեղծեմ: Ես չեմ ուզում կարիերա ստեղծեմ, այդ դուք եք ուզում, որ կարիերա ստեղծեմ: Ես ուզում եմ օգնեմ Հայաստանին: Ես բիզնեսմեն եմ: Դուք գիտեք` ի՞նչ բան ա փող ծախսելը: Աբրահամյան Արան իր անձնական բյուջեի հաշվին 147 մլն դոլար ա ծախսել Ռուսաստանի հայերի միության վրա, դուք գիտե՞ք դա ինչ բան ա: Շատ ժամանակ ինձ ասում են` պարոն Աբրահամյան ձեր ռուսերեն խոսալը ձեզ չի՞ խանգարում կամ դուք չե՞ք ամաչում, որ ռուսերեն այնպես չեք խոսում, ինչպես բոլորը: Մի անգամ էլ եմ ասում` էդ բոլորդ, էդ ռուսերեն խոսացողներդ եկեք, հավաքվեք, մի կառույց բացեք, ինձ էլ ազատեք, եկեք էս երկրի վիճակը վերցրեք ձեր վրա: Ցավոք սրտի, չկա: Գիտեք` ինչ, մկների ժողովը չի` ճառը ասեն, մեխանիզմն ասեն, զանգը չկախեն: Ես չեմ ուզում գիշերը հանգիստ քնեմ, ճոխ սեղանների մոտ նստեմ, բայց ստեղ ժողովուրդը վատ ապրի»:

Իր` բիզնեսով զբաղվելու մասին Արա Աբրահամյանի հայտարարություններից հետո լրագրողը հետաքրքրվեց, թե նա գալիս է Հայաստան կուսակցություն ստեղծելո՞ւ, թե՞ բիզնեսով զբաղվելու համար: Բայց հարցը նյարդայնացրեց Աբրահամյանին, և նա ասաց, որ դրան չի պատասխանի: Այդուհանդերձ մի քանի անգամ կրկնեց, որ «մենք ստեղծում ենք կուսակցություն, որը բիզնեսի հետ կապ չունի»:

Նախորդող հրապարակումներ`
Մենք Հայաստանում իշխանափոխության չենք անելու. Արա Աբրահամյան
Ես կմասնակցեմ խորհրդարանական ընտրություններին. Արա բրահամյան
Նոր կուսակցության գաղափարախոսության համար աշխատում ենք. Արա Աբրահամյան