ԵԽԽՎ դիտորդներ․ «Մեր ներկայությունն Ադրբեջանի ընտրություններին լեգիտիմություն չի հաղորդում»
Եվրոպայի խորհրդի խորհրդարանական վեհաժողովի՝ Ադրբեջանի ընտրություններում դիտորդական առաքելություն իրականացրած պատվիրակության անդամները միակարծիք չեն ընտրությունների գնահատականի վերաբերյալ։
ԵԽԽՎ պաշտոնական հաղորդագրության մեջ դիտորդները նոյեմբերի 1-ին Ադրբեջանում տեղի ունեցած խորհրդարանական ընտրությունները համարել են համարժեք, որը «ընդհանուր առմամաբ համապատասխանել է միջազգային չափանիշներին»։ Սակայն այս գնահատականների հետ համաձայն չեն պատվիրակության 3 անդամներ, ովքեր տարածել են առանձին հայտարարություն՝ Ադրբեջանում ընտրությունների վերաբերյալ։
ԵԽԽՎ-ում Գերմանիայի պատգամավորներ Ֆրենկ Շվաբեի և Ուտե Ֆինք-Կրամերի, Իռլանդիայի պատգամավոր Մայքլ ՄքՆամարայի ներկայացրած գնահատականում պատգամավորները նշում են, որ ցավում են, որ չեն կարող այս ընտրությունները համարել քայլ առաջ՝ դեպի ժողովրդավարական, ազատ և արդար ընտրություններ։
«Թեև ընդունում ենք այս ընտրությունների տեխնիկական և կազմակերպչական ձեռքբերումները, երկրում տիրող իրավիճակը՝ կապված քաղաքական ազատությունների, ազատ արտահայտման և լրատվամիջոցների, հավաքների ազատության հետ, չի ապահովում ազատ և ժողովրդավարական ընտրություններ անցկացնելու համար պայմաններ։
Նախընտրական շրջանը նշանավորվեց մարդու իրավունքների վատթարացմամբ, որը էական նախապայման է ազատ և ժողովրդավարական ընտրությունների համար»,-նշվում է հայտարարության մեջ։
Պատգամվորները նշում են, որ առավել ինտենսիվացել է լրագրողների և քննադատական կարծիք հայտնողների չհիմնավորված և ընտրովի քրեական հետապնդումները, մեծացել են կառավարությանը քննադատող ՀԿ-ների աշխատանքի խոչընդոտները։ Անկախ քաղաքացիական հասարակության կազմակերպությունների մի քանի ներկայացուցիչներ, ինչպիսիք են Լեյլա Յունուսը, Արիֆ Յունուսը, Ինթիգամ Ալիևը և Ռասուլ Ջաֆարովը, ներկայումս բանտարկված են։
Նշվում է, որ Ադրբեջանում խոսքի ազատությունը, ներառյալ մամուլի ազատությունը արդեն վաղուց մտահոգության առարկա են ազգային և միջազգային դիտորդների մոտ, ինչն առավել է վատացել։
Նախորդ խորհրդարանական ընտրություններից հետո մի քանի լրատվամիջոցներ փակվել են՝ ներառյալ Ազատություն ռադիոկայանի Բաքվի գրասենյակը, մինչդեռ «Azadliq» թերթին սպառնում է մեծ տուգանքներ՝ զրպարտության համար դատական հայցերով։
Մտահոգություն է հայտնվում նաև, որ կանխվեց ԵԱՀԿ Ժողովրդավարական հաստատությունների և մարդու իրավունքների գրասենյակի երկարաժամկետ դիտորդների կողմից Ադրբեջանում ընտրությունների դիտարկումը։
«Մենք չենք եկել Ադրբեջան դասեր տալու Ադրբեջանի ժողովրդին կամ նրա կառավարությանը։ Քանի որ ԵԽԽՎ Բյուրոյի մեծամասնությունը կողմ քվեարկեց Ադրբեջանում ընտրության օրը դիտորդական առաքելություն ուղարկելուն այնպիսի պայմաններում, որ հավանական է դառնում, որ նրանց ներկայությունը ընտրության օրը կարող է մեկնաբանվել որպես լեգիտմության հաղորդում հստակորեն ոչ ժողովրդավարական ընտրական գործընթացին, մենք այլընտրանք չունեինք, քան անել այս հրապարակային հայտարարությունը՝ Միջազգային ընտրական դիտարկման սկզբունքներին համապատասխան, որ մեր ներկայությունը չի ենթադրում նման լեգիտիմություն»,-նշվում է հայտարարության մեջ։
Նշվում է, որ հայտարարությունը բաց է, որին կարող են աջակցություն հայտնել նաև ԵԽԽՎ մյուս անդամները։
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում
