Ձեր վստահելի աղբյուրը

Երևանի քաղաքապետարանը համարում է, որ տոնական օրերին ձյան մաքրման աշխատանքներում «Սանիթեք» ընկերությունն անգործություն չի ցուցաբերել: Հիշեցնենք, որ դեկտեմբերի 31-ին, հունվարի 1-ին ու հետագա օրերին տեղացած առատ ձյունը երևանյան փողոցներից չէին մաքրել: 

Panorama.am-ի գրավոր հարցմանն ի պատասխան քաղաքապետարանից հայտնում են. «Երևանի քաղաքապետարանը անդրադարձել է ոչ թե «Սանիթեք» կազմակերպության պարտականությունների չկատարմանը կամ անգործությանը, այլ սկզբունքային դիտողություն է արել ընկերության կողմից իրականացված աշխատանքների կազմակերպման արդյունավետության և արդյունքների առումով, ինչի հետ կապված Երևանի քաղաքապետն իր նկատառումներն ու դիրքորոշումն է հայտնել ընկերության ներկայացուցիչներին։

Հիշեցնենք, Տարոն Մարգարյանը հայտարարել էր, որ իր դժգոհությունը հայտնել է  ընկերության սեփականատերերին ու նախազգուշացրել, որ աշխատանքների նման կերպ կազմակերպման կրկնվելու դեպքում «Սանիթեք» ընկերության նկատմամբ կկիրառվեն խիստ պատժամիջոցներ:

Թե ինչ է ասել քաղաքապետը «Սանիթեք»-ի տերերին, ու ի՞նչ արդարացումներ են գտել նրանք, քաղաքապետարանից չեն հայտնում. «Ընկերության սեփականատերերին առնչվող տեղեկատվությունն առաջարկում ենք ձեռք բերել ընկերության գրասենյակից»:

Քաղաքապետարանից Panorama.am-ը հարցրել է, թե ո՞վ պետք է ներողություն խնդրի քաղաքացիներից ու մի շարք ծառայություններից տոնական տրամադրությունը փչացնելու ու ահնարմարություններ պատճառելու համար: Քաղաքապետարանից արձագանքել են. «Երևանի քաղաքապետարանը և ընկերության ներկայացուցիչը հայտարարություններով հանդես են եկել և հայցել բնակչությանը ներողամտությունը՝ պատճառած անհարմարությունների համար»:

Ի՞նչ պատժամիջոցների մասին է խոսքը, քաղաքապետարանից պատասխանի փոխարեն նախընտրում են տրամադրել մի քանի հարյուր էջանոց երկու պայմանագրերի պատճենները:

Այսպես, 2013-ի սեպտեմբերի 17-ին քաղաքապետարանի ու «Սանիտեկ» ընկերության միջև կնքվել է պայմանագիր 10 տարի ժամկետով: Կապալառուն ստանձնում է կատարել Երևան քաղաքի արևմտյան հատվածի՝ Աջափնյակ, Դավթաշեն, Կենտրոն, Մալաթիա-Սեբաստիա, Շենգավիթ վարչական շրջանների աղբահանություն և սանիտարական մաքրում, ներառյալ ձմռան ամիսներին: Պայմանագրի կատարման 10 տարիների ընթացքում ընկերության մատուցման ենթակա ծառայության ընդհանուր գինը  կազմում է 25 մլրդ 891 մլն 381 հազար 200 դրամ: Ըստ պայմանագրի, ծառայության մատուցման գինը կայուն է, կատարողն իրավունք չունի ավելացնելու, իսկ պատվիրատուն նվազեցնելու այդ գինը:

Մյուս պայմանագիրը կնքվել է 2015-ի մարտի 27-ին, ըստ որի կապալառուն՝ «Սանիտեկ Ինթերնեյշնլ ՍՊ-ն ու Սանիտեկ SARL» Ընկերությունը (Կոնսորցիումը) ստանձնում է  Երևանի արևելյան հատվածի՝ Ավան, Արաբկիր, Էրեբունի, Նոր Նորք, Նորք Մարաշ, Նուբարեշեն, Քանաքեռ-Զեյթուն վարչական շրջանների աղբահանության ու սանիտարական մաքրման (ներառյալ ձմռան ամիսներին) ծառայությունների մատուցման  պարտավորությունը:  Այս անգամ պայմանագիրը կնքվել է 12 տարի ժամկետով:  Այդ ընթացքում ընկերության  մատուցման ենթակա ծառայության ընդհանուր գինը կազմում է 29 մլրդ 400 մլն դրամ:

Քաղաքապետարանից Panorama.am-ին հայտնեցին, որ ներկայումս իրականացնում է մայրաքաղաքի 10 վարչական շրջանների աղբահանության և սանմաքրման աշխատանքները, իսկ Էրեբունի և Ավան վարչական շրջաններում այդ աշխատանքների մեկնարկը կտրվի առաջիկայում։ 

Վստահեցրեցին, որ ձմռան ամիսներին իրականացվող աշխատանքների համար վճարումն իրականացվում է տարվա կտրվածքով ընդհանուր ծառայությունների համար նախատեսված մրցույթի արդյունքում ձևավորված բազային գումարի ամսական չափով, որն անփոփոխ է բնակլիմայական շեղումների կամ նորմայից շատ տեղումների պարագայում։

Ի դեպ, այդ ծառայությունների մատուցման համար հայտարարված մրցույթին, բացի «Սանիտեկ»-ից, քաղաքապետարանի տրամադրած տեղեկատվության համաձայն, ևս յոթ ընկերություն է մասնակցել՝ «Natioanal Cleaning Company»,  «Averda», «Կենտրոն–Մաքրություն» ՓԲ և «Էկո Սթրիթ» ՍՊ ընկերությունների կոնսորցիումը, «Ipasumu fonds»  LTD, «Pilsetas EKO Serviss» LTD, «Daugavpils Specializetis Autotransporta Uznemums» JSC, «Vides Pakalpojumu Grupa»  LTD ընկերությունների կոնսորցիումը, «M-U-T» և «EKOFIN» ընկերությունների կոնսորցիումը, «Ecoservise» LLC, «Tvar.com» LLC, «Komunaliniu imoniu kombinatas» LLC և «Specialus autotransportas» LLC ընկերությունների կոնսորցիումը, Էկոգրուպ» ՍՊ և «Zhangjiagang City Qiangsheng Plastic Machinary Co” LTD ընկերությունների կոնսորցիումը:

Քաղաքապետարանի ու մրցույթում հաղթող ճանաչված ընկերության  միջև կնքված պայմանագրերի համաձայն, քաղաքապետարանը ցանկացած ժամանակ իրավունք ունի  ստուգել ընկերության կողմից մատուցվող ծառայության ընթացքն ու որակը: Պատվիրատուն իրավունք ունի  միակողմանի լուծել պայմանագիրը,  եթե կատարողն էականորեն խախտել է պայմանագիրը՝ ծառայության մատուցման ժամկետն ու սահմանված պահանջները:

Պայմանագրերով նախատեսված են նաև տույժ ու տուգանքներ, մասնավորապես ծառայության մատուցման ժամկետը խախտելու դեպքում յուրաքանչյուր ուշացած օրվա համար գանձվում է տույժ՝  չմատուցված ծառայության գնի 0.05 տոկոսի չափով: Միաժամանակ նշվում է, որ տույժերի կամ տուգանքի վճարումը  կողմերին չի ազատում պայմանագրային պարտավորությունները լրիվ կատարելուց:

Պայմանագրի մոնիթորինգը նախատեսում է նաև  քաղաքապետարանի կամ կապալառուի կողմից ստացված բողոքների գնահատում, ինչպես նաև կապալառուի կատարողականի մոնիթորինգի ենթարկում քաղաքապետարանի կողմից, կատարվող աշխատանքների առօրյա ու պատահական ստուգումներ և այլն: Իսկ «Պայմանագրի վերանայում» մասում նշվում է, որ լիազորված պաշտոնատար անձն ու պայմանագրի ղեկավարը պետք է ունենան վերահսկողական հանդիպումներ, սովորաբար ամսական պարբերականությամբ:

Ի դեպ, ամենակարևորի մասին. «Կապալառուն չպետք է փոխանցի կամ էլ երրորդ կողմին մասնակից դարձնի  պայմանագիրն առանց քաղաքապետարանի գրավոր համաձայնության, որը քաղաքապետարանը, խելամտորեն գործելով, իրավասու կլինի չտալ»:

Ավելի վաղ կնքված պայմանագիրը  նաև սահմանում է, որ կողմերից յուրաքանչյուրը գաղտնի կպահի պայմանագրի պայմանները, երրորդ կողմին չի բացահայտի պայմաններն ու տեղակատվությունը:Պայմանագիրը սահմանում է, որ Կապալառուն, նրա աշխատակազմը, ծառայողները  պայմանագրի հետ կապված խնդիրների շուրջ՝ առանց լիազորված պաշտոնատար անձի՝ նախապես տրված գրավոր համաձայնության, չեն կարող հաղորդակցվել մամուլի, հեռուստատեսության, ռադիոյի կամ այլ լրատվամիջոցների հետ: