Ձեր վստահելի աղբյուրը

«Աբովյան-Պուշկին  փողոցներում կան հուշարձաններ և ոչ հուշարձան շենքեր, բայց և հուշարձանները պետք է պահպանվեն, և ոչ հուշարձանները, քանի որ դրանք  միասնական համալիր են»,- այս մասին այսօր կառավարության նիստից  լրագրողների հետ զրույցում ասաց ՀՀ քաղաքաշինության նախարար Նարեկ Սարգսյանը՝ անդրադառնալով Աբովյան-Պուշկին փողոցներում գտնվող հին շենքերին:

Ինչ վերաբերում է Արամի 30 շենքին, նախարարն ասաց, որ շենքը «Հին Երևան» նախագծի շրջանակում վերակագնվելու է:

Հարցին, թե բուլդոզերով քանդված շենքն ինչպե՞ս են վերականգնելու, Նարեկ Սարգսյանը պատասխանեց, որ կան դրա չափագրությունները և ըստ չափագրությունների՝ այդ տարածքում դա անպայման կվերականգվի: «Արամի 30 շենքը հուշարձանների ցանկում չի եղել, բայց մենք ունենք դրա չափագրությունը, և ըստ այդ չափագրության` այն կվերականգնվի «Հին Երևան»-ի տարածքում: Այն հուշարձան չէ, սակայն հանրության նման արձագանքի պարագայում ես ինքս առաջարկել եմ, որ այն տեղափոխվի ու վերականգնվի»,- ասաց Նարեկ Սարգսյանը:

Անդրադառնալով գինեգործների միության նախագահ Ավագ Հարությունյանի մտահոգությանը, որ «Դոլմամայի» տարածքում գինեգործների համար կարևոր նշանակություն ուենցող նկուղներ կան, նախարարն ասաց. ««Դոլմամայի» դիմաց՝ Աբովյանի անկյունում, կա ևս հուշարձան-շենք, որը նույն կառուցապատողինն է, և այնտեղ ևս կան նկուղներ, որոնք ամբողջությամբ պահպանվելու են և ես վստահ եմ, որ այստեղ ևս նկուղները չեն քանդվելու»,-ասաց նա:

Հարցին, թե երաշխավորո՞ւմ  է, որ հուշարձանը չի քանդվի, նախարարը պատասխանեց «Այո, երաշխավորում եմ»:

Լրագրողների հարցին, թե էլ ի՞նչ «սառայներ» են քանդվելու առաջիկայում, նախարարը պատասխանեց. «Հարցն ինձ այդպես մի' տվեք, տարբեր ճարտարապետներ կարող են տարբեր կարծիքներ արտահայտել, և ես ցանկություն չունեմ դա մեկնաբանելու»:

Նրա խոսքերով՝ անհեթեթ են նաև խոսակցություններն այն մասին, թե հիմա էլ Ազգային պատկերասրահի շենքն են քանդելու: «Կառավարության կամ Երևանի քաղաքապետարանի օրակարգում երբեք նման հարց չի եղել»,- նշեց Նարեկ Սարգսյանը: 

Ինչ վերաբերում է հրշեջների շենքին, նախարարն ասաց, որ այն մի քանի անգամ վերակառուցման է ենթարկվել, առաջիկայում ևս մեկ անգամ վերակառուցման կենթարկվի, սակայն լինելու է պահանջ՝ պահպանել շենքի ճարտարապետությունը:

Նարեկ Սարգսյանը անդրադարձավ նաև «Զվարթնոց» օդանավակայանի կլոր շենքի քանդմանը՝ նշելով, որ  աշխատում են ճարտարապետների հետ, որ այն ևս պահպանվի: «Ես հայտարարել եմ, որ կողմ եմ շենքի պահպանմանը: Դրանք կառույցներ են, որոնց քանդելը պետք է լինի ծայրահեղ անհրաժեշտության դեպքում, եթե  այլ տարբերակներ չկան, օրինակ այդպիսի անհրաժեշտություն էր Աֆրիկյանների շենքը»,-ընդգծեց նախրարը՝ հավելելով, որ այն ևս «Հին Երևան» նախագծում կներառվի: