Խաչատրյանական մրցույթը այս՝ դիրիժորական անվանակարգում բուռն է լինելու
Արամ Խաչատրյանի անվան միջազգային մրցույթն ունի բարձր վարկանիշ։ Մրցույթը յուրաքանչյուր տարի ոչ միայն իր աշխարհագրությունն է մեծացրել, այլև իր կատարողական վարպետության չափանիշները,-լրագրողների հետ հանդիպման ժամանակ ասաց ՀՀ մշակույթի նախարարի տեղակալ Արթուր Պողոսյանը:
Նշենք, որ այսօր մեկնարկում է Արամ Խաչատրյանի անվան 12-րդ միջազգային մրցույթը: Այն այս տարի առաջին անգամ անցկացվում է Դիրիժորություն անվանակարգում։ Մրցույթին մասնակցելու համար դիմած 57 երիտասարդ դիրիժորներից ընտրվել են 12-ը, որոնք ներկայացնում են 10 երկիր՝ Գերմանիան, Իտալիան, Լիբանանը, Լեհաստանը, Խորվաթիան, Հարավային Կորեան, Ճապոնիան, Շվեդիան, Սինգապուրը, Ռուսաստանը:
«Միջազգային ասպարեզում դիրիժորության մրցույթները քիչ են։ Եվ շատ կարևոր է, որ խաչատրյանական մրցույթը վերջին տարիներին շատ բուռն միջազգային գործունեություն է ծավալում։ Միջազգային մրցույթը սպասված երաժշտական իրադարձություն է ոչ միայն մեր տարածաշրջանում, այլև ամբողջ աշխարհում։ Սա պրոֆեսիոնալ մակարդակի մեր լավագույն միջոցառումներից մեկն է»,- նշեց փոխնախարարը։
Արամ Խաչատրյանի անվան միջազգային մրցույթի հոգաբարձուների խորհրդի նախագահ Արմեն Սմբատյանի խոսքով, շատ դժվար էր ընտրություն կատարելը, քանի որ շատ պրոֆեսիոնալ դիրիժորներ են։ Նա ասաց, որ տարեցտարի նկատելի է մրցույթն նկատմամբ հետաքրքրության աճը:
«Մեր հաշվարկներով, մրցույթի անցկացման տարիներին մոտ 400 երաժիշտ՝ դաշնակահար, ջութակահար, թավջութակահար, սովորել է Խաչատրյանի կոնցերտները և կատարում է ամբողջ աշխարհում։ Դա մեր ամենամեծ հաջողություններից մեկն է»,- նշեց մրցույթի հոգաբարձուների խորհրդի նախագահը:
«Արամ Խաչատրյան մրցույթ» մշակութային հիմնադրամի գործադիր տնօրեն Աննա Տեր-Հովակիմյանն ասաց, որ 12 տարվա պատմություն ունեցող մրցույթի ամենամեծ ձեռքբերումն այն է, որ 2013 թվականից մրցույթը Միջազգային մրցույթների համաշխարհային ֆեդերացիայի անդամ է, և իրենց համար մեծ պատիվ է, որ մրցույթի ավարտից հետո Երևանում կմեկնարկի ֆեդերացիայի 60-րդ գագաթաժողովը. «Աշխարհի ամենահեղինակավոր մրցույթների ներկայացուցիչները ժամանելու են Հայաստան, ծանոթանալու են Հայաստանի մշակույթին»։
«Մրցութային օրերի ընթացքում լինելու են բազում միջոցառումներ, մրցութային բոլոր փուլերն անցկացվելու են երեկոյան ժամերին, և յուրաքանչյուր մրցութային օր իր տեսակի մեջ առանձին համերգ է լինելու»,- նշեց Ա. Տեր-Հովակիմյանը։
Մրցույթի ժյուրիի նախագահ, ՀՀ ժողովրդական արտիստ Յուրի Դավթյանը խոսելով մրցույթի մասնակիցների գնահատման չափանիշների մասին՝ ասաց, որ առաջին հերթին կգնահատվի դիրիժորի գործի իմացությունը, որքանով է նա տիրապետում ստեղծագործությանը, այնուհետև՝ նրա ներքին ունակությունները: Ըստ նրա, դիրիժորը պետք է ունենա ուրույն, միայն իրեն հատուկ արտահայտիչ միջոցները. «Եթե իր անհատական ունակությունները կարողանա նվագախմբի առաջ ցուցադրել, ինձ թվում է, մնացած հարցերը՝ տեխնիկա, արտահայտչական այլ միջոցներ, ամեն ինչ պարզ կդառնա»:
Ժյուրիի կազմում են՝ Սան Պաուլոյի քաղաքային թատրոնի գեղարվեստական ղեկավար Թոմաս Յակսիկը (Բրազիլիա/Չիլի), արվեստի կառավարում իրականացնող «Ասկոնաս Հոլթ» ընկերության կառավարման ավագ անդամ Մարկ Հիլդրյուն (Մեծ Բրիտանիա), «Ֆիլհարմոնիա» նվագախմբի գործադիր տնօրեն Դեյվիդ Ուելտոնը (Մեծ Բրիտանիա), կոմպոզիտոր, դիրիժոր Միխալիս Իկոնոմուն (Հունաստան), դաշնակահար, դիրիժոր Վահագն Պապյանը (Իսրայել/Հայաստան), դաշնակահար, դիրիժոր Կոնստանտին Օրբելյանը (ԱՄՆ)։
Արամ Խաչատրյանի անվան միջազգային մրցույթի կազմկոմիտեն սահմանել է հետևյալ մրցանակները՝ 1-ին մրցանակ՝ 10000 ԱՄՆ դոլարին համարժեք դրամ և 2 համերգ՝ Հայաստանում 2016-2017 և 2017-2018 թվականների համերգաշրջանների ընթացքում` մրցույթի կազմկոմիտեի առաջարկած նվագախմբ(երի)ի հետ, ինչպես նաև դափնեկրի դիպլոմ։ Պարգևատրման արարողությունը և գալա-համերգը տեղի կունենան հունիսի 14-ին: Մրցույթի պաշտոնական նվագախումբն է Հայաստանի պետական երիտասարդական նվագախումբը, գլխավոր գործընկերը՝ ԱՊՀ Հումանիտար համագործակցության միջպետական հիմնադրամը։ Արամ Խաչատրյանի անվան միջազգային մրցույթն անցկացվում է Հայաստանի Հանրապետության նախագահի տիկին Ռիտա Սարգսյանի բարձր հովանավորությամբ, կազմակերպիչներն են՝ ՀՀ մշակույթի նախարարությունը, «Արամ Խաչատրյան մրցույթ» մշակութային հիմնադրամը և Երևանի Կոմիտասի անվան պետական կոնսերվատորիան: