Հուրի Գեբեշյան. «Օլիմպիական խաղերն իմ վերջին մրցումներն են»
Հայաստանի պատմության մեջ առաջին անգամ Օլիմպիական խաղերի կանանց մրցաշարում մեր երկիրը ներկայացրել է ամերիկաբնակ Հուրի Գեբեշյանը՝ բազմամարտում հավաքելով 53,748 միավոր։
Բազմամարտի երեք ենթախմբեր դեռևս չեն սկսել պայքարը, և եզրափակիչ դուրս եկած մարզիկների անունները հայտնի կլինեն ավելի ուշ։
Հուրի Գեբեշյանն Օլիմպիական խաղերի ավարտից հետո կհեռանա մեծ սպորտից։
«Հրաշալի զգացողություն ունեմ` կապված Օլիմպիական խաղերում ելույթ ունենալու հետ։ Անասելի հպարտ եմ և ոգևորված՝ Հայաստանը այս Խաղերում ներկայացնելու համար։ Կարծում եմ` գրանցած արդյունքիցս գոհ եմ, քանի որ արեցի այն ամենը, ինչ կարող էի։
Ամեն անգամ մրցելույթներիցս հետո գործիքները համբուրելը կապված էր այն բանի հետ, որ Օլիմպիական խաղերն իմ վերջին մրցումներն են։ Մարմնամարզությունը ինձ շատ բան է տվել, և ինձ մնում է միայն շնորհակալ լինել այս մարզաձևին»,- Գեբեշյանի խոսքերը մեջբերել է ՀԱՕԿ-ի պաշտոնական կայքը։
Եթե չլիներ Հուրի Գեբեշյանի համառությունը, ով օլիմպիական ուղեգրի համար գործնականում առանց ազգային ֆեդերացիայի աջակցության էր պայքարում, Հայաստանի ներկայացուցչությունը Ռիոյում բաղկացած կլիներ երկու մարմնամարզիկից։ Սակայն Գեբեշյանը որոշեց գործը վերցնել իր ձեռքը։ Իր իսկ ղեկավարությամբ պարբերական ծանր մարզումներից բացի, նա ինքնուրույն ու իր հաշվին զբաղվել է աշխարհի առաջնությանը մասնակցությամբ, որտեղ էլ նվաճել է Խաղերի ուղեգիրը։ Ապրիլին նախաօլիմպիական ընտրական փուլում նա հաստատեց իր օլիմպիական մտադրությունները՝ բազմամարտում 36 մասնակիցների շարքում գրավելով 21-րդ տեղը։
Հուրին ապրում ու աշխատում է ԱՄՆ-ում։ Մարմնամարզությունը գործնականում նրա հոբբին է։ Գեբեշյանը Քլիվլենդ քաղաքի ծննդատանը բժշկի օգնականի պարտականություններ է կատարում։ Այդ աշխատանքը նա իդեալական է անվանում, քանզի գործ ունի նորածինների հետ։
Գեբեշյանը ցանկանում էր խոշոր մրցաշարերում ներկայացնել Հայաստանը՝ հայրենիքում մարզաձևի զարգացումը խթանելու համար։ Իր կյանքում շատ չի եղել Հայաստանում, սակայն հայկական ավանդույթներին ծանոթ է ընտանիքի շնորհիվ, որն ԱՄՆ-ում հաստատվել է 1970-ականններին։
Աշխատանքի պատճառով Հուրին շաբաթական ընդամենը 16 ժամ էր մարզվում, մինչդեռ բարձրակարգ մարմնամարզուհիները դահլիճում 30 ժամ են անցկացնում։ Սակայն Գեբեշյանին ոչ միայն ժամանակը չէր բավարարում, այլև միջոցները։ 2014 թ.-ից, երբ նա իր առջև նպատակ դրեց մասնակցել Օլիմպիական խաղերին, սեփական միջոցներից 12 հազար դոլար է ծախսել՝ ճանապարհածախսի ու մրցումների ժամանակ հյուրանոցներում ապրելու համար։
«Փոքրիկ երեխան իմ մեջ ասում է. «Ես ուզում եմ օլիմպիական լինել»,- մի առիթով ասել է Հուրին։- Ես արժանի եմ այդ իրավունքին։ Երբ նպատակ եմ դնում, պետք է հասնեմ դրան։ Դա այն է, ինչ բնորոշ է ինձ»։
Հուրի Գեբեշյանը հասել է իր նպատակին ու այժմ, ըստ երևույթին, մտածում է միայն իր հիմնական աշխատանքի մասին։
Լրահոս
Տեսանյութեր
Եթե Տավուշի գյուղերի հանձնման պրոցեսը տեղի ունենա, այդտեղից կսկսվի պետականության վերջնական ավարտը