ԵԽԽՎ Վացլավ Հավելի մրցանակին արժանացավ ԻԼԻՊ-ից փախած եզդի Նադիա Մուրադը
Այսօր՝ Եվրոպայի Խորհրդի խորհրդարանական վեհաժողովի աշնանային նստաշրջանի առաջին օրը, Եվրոպայի խորհրդում տեղի ունեցավ Վացլավ Հավելի մարդու իրավունքների մրցանակի շնորհման արարողությունը։
2016թ․-ի Վացլավ Հավելի մրցանակին արժանացավ ԻԼԻՊ-ից փախած ազգությամբ եզդի Նադիա Մուրադը, ով այս տարվա ապրիլին Երևանում էր և մասնակցում էր «Ընդդեմ ցեղասպանության հանցագործության» գլոբալ ֆորումի աշխատանքներին։
Նադիա Մուրադը իր շնորհակալական խոսքում ասաց, որ մթության մեջ հույսն է, որ իրեն կապում է Վացլավ Հավելի հետ:
«Եթե կյանքն ավելի արդար լիներ, ապա Վացլավ Հավելը կապրեր ու կտեսներ ավելի երջանիկ ժամանակներ։ Սակայն երբեմն կյանքն այլ ուղով է գնում ու ստիպված ես լինում պաշտպանել մարդկությունն ու մարդու իրավունքները։ Եթե կյանքն արդար լիներ, ապա ես պետք է վերադառնայի իմ ծննդավայր, իմ փոքր գյուղ, որտեղ պետք է վարեի շատ հասարակ աղջկա կյանք, ունենայի նույնպիսի պարզ երազանքներ, ինչպիսիք ունեն իմ տարիքի աղջիկները։ Սակայն Իսլամական պետության զինյալները 2 տարի առաջ հարձակվեցին մեր գյուղերի վրա ու 2 շաբաթվա ընթացքում սպանեցին ու գերի վերցրեցին 12 000 մարդու։ Դա ցեղասպանություն էր։ ԴԱԵՇ-ը սպանում է տղամարդկանց, կանանց միջոցով ստեղծում է սեռական գերիների ցանց։ 8 տարեկանից բարձր երեխաները բռնաբարվում էին՝ անգամ չիմանալով այդ բառի նշանակությունը»,-ասաց Նադիա Մուրադը։
Նադիա Մուրադը նշեց, որ ԻԼԻՊ-ը շարունակում է կռվել եզդիների, քրիստոնյաների, ինչպես նաև մահմեդականների դեմ ու կոչ արեց, որ ողջ մարդկությունը պետք է համախմբվի ու թույլ չտա, որպեսզի ահաբեկչական խմբերը, բարբարոսները կոտորեն մարդկանց ու ոչնչացնեն քաղաքակրթություններն ու մշակույթը։
Նշենք, որ 2016թ․-ի Վացլավ Հավելի մրցանակին հավակնում էին 3 ֆինալիստներ՝ Նադիա Մուրադը, մարդու իրավունքների և մամուլի ազատության ակտիվ պաշտպան, սերբ լրագրող Գորդանա Իգրիչը և René Cassin հիմնադրամը, որը1969թ․-ից ի վեր աշխատում է ուսուցման և հետազոտությունների միջոցով մարդու իրավունքների և խաղաղության խթանման համար։
Հիշեցնենք, որ Վացլավ Հավելի մրցանակը տրվում է արդեն 4-րդ անգամ։ Առաջին մրցանակը 2013թ․-ին տրվել է Բելառուսի ակտիվիստ Ալես Բիալիացկիին, 2014-ին՝ Ադրբեջանցի իրավապաշտպան Անար Մամադլիին և 2015-ին՝ ռուս իրավապաշտպան Լյուդմիլա Ալեքսեևային։
Վացլավ Հավելի մրցանակը տրվում է քաղաքացիական հասարակության ներկայացուցիչներին՝ Եվրոպայում և նրա սահմաններից դուրս մարդու իրավունքների պաշտպանության ոլորտում ունեցած ավանդի համար։ Մարդու իրավունքների պաշտպանության համար Վացլավ Հավելի միջազգային մրցանակը հաստատվել է 2013թ․-ին ԵԽԽՎ-ի, Վացլավ Հավելի գրադարանի և «Խարտիա-77» հիմնադրամի կողմից։
Հարակից հրապարակումներ`
- Կասկածի տակ չառնել եզդիների ցեղասպանությունը. Սաիդ Ավդալյան
- Ամալ Քլունին կպաշտպանի եզդի կնոջ՝ Նադիա Մուրադի շահերը
- Օղակաձև զբոսայգում հուշարձանը նվիրված է Շանգալի զոհերին
- Եզդիները հայերի հետ միասին պայքարում են մեկ ընդհանուր թշնամու դեմ. Ազիզ Թամոյան
- Շանգալում եզդիների ցեղասպանությունը շարունակվում է. «Շանգալ» թերթի խմբագիր
- Ամո Շարոյան. Ստեղծել Շանգալի եզդիների ինքնավար Հանրապետություն՝ խաղաղապահ ուժերի հսկողության ներքո (տեսանյութ)
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին