Ձեր վստահելի աղբյուրը

«Բնական գազի սակագնի նվազման արդյունքում քաղաքացիները 13 միլիարդ 400 միլիոն դրամով քիչ կվճարեն ներկայիս գործող սակագնի համեմատությամբ: Այսինքն, մեր ընկերությունն այդքան հասույթ կստանար, եթե սակագինը չփոխեինք»,- ՀՀ հանրային ծառայությունները կարգավորող հանձնաժողովի նիստից հետո, որտեղ քննարկվեց «Գազպրոմ Արմենիա» ընկերության հայտը  ՀՀ-ում սպառողներին վաճառվող բնական գազի սակագների վերանայման վերաբերյալ և ընդունվեց,  լրագրողների հետ զրույցում ասաց ընկերության գլխավոր տնօրեն  Հրանտ Թադևոսյանը:

Հարցին, թե ինչո՞ւ նախկինում  չէին իջեցնում սակագինը, եթե նման հնարավորություն կար, նա նշեց, որ մշտապես իրենք աշխատում են այդ ուղղությամբ, ուղղակի  այս պահը համընկել է նրան, որ հնարավորություն ունեն տարանցման գնի նվազման հետ կապված որոշակի  ֆինանսական միջոցներ ակնկալել, որն էլ  հենց կուղղվեն Հայաստան ներկրվող գազի գնի իջեցմանը:

Հ. Թադևոսյանն ասաց, որ 2017 թվականի հունվարի 1-ից ավարտվում է ՀՀ բնական գազի մատակարար «Գազպրոմ էքսպորտ» ՍՊԸ-ի ու «Վրաստանի գազատրանսպորտային ընկերություն» միջև կնքված գազի տարանցման պայմանագրի ժամկետը, որտեղ ֆիքսված է՝  Վրաստանը ստանում է  ռուսական գազի Հայաստան մատակարարումների ընդհանուր ծավալի 10 տոկոսը՝ որպես տարանցման վճար։

«Փորձում ենք բանակցությունների միջոցով  հասնել նրան, որ ավելի քիչ վճարենք: Թվային արտահայտությամբ չեմ կարող ասել, քանի որ դեռ չեն ավարտվել բանակցությունները, բայց ակնկալում ենք, որ կլինեն նշանակալի միջոցներ»,- հավելեց ընկերության գլխավոր տնօրենը:

Նրա կարծիքով, գազի սակագնի նվազման հետևանքով սպառողները  կավելացնեն իրենց գազասպառումը, ինչը նույնպես կբերի որոշակի միջոցներ: Բացի այս, Հ.Թադևոսյանի խոսքով, իրականացվելու է «Գազպրոմ Արմենիա» ՓԲԸ-ի ֆինանսական ծախսերի օպտիմալացման ծրագիր, օրինակ, նախատեսվում էր գազի ստորգետնյա նոր պահեստարան-կայանի կառուցում, սակայն հետաձգում են աշխատանքները, կշահագործեն հինը, նոր ներդրումներ չեն իրականացնի:

«Հնարավորություն է ստեղծվել այս պահին առանց վտանգելու, փոխելու մեր շահագործման ծախսերը, իրականացնելով հուսալի և անխափան գազամատակարարում, կատարել այս գործարքը:  Եթե այս երեքի արդյունքում 13 միլիարդ 400 միլիոն դրամի մեր չստացված հասույթը չփակվի, այն կփակի «Գազպրոմ» մայր ընկերությունը, որը հաշվի է առնում մեր երկրում զարգացման միտումները, ինչու չէ նաև  կատարում է նոր մեխանիզմ, միջոց՝ տեսնելու թե ինչ արդյունք կստանա»,- նշեց նա:

Այսինքն, Հ. Թադևոսյանի խոսքով, ռիսկային ամբողջ դաշտը «Գազպրոմ Արմենիա»  ընկերությունը վերցնում է իր վրա. «Ոչ մեկի մոտ մտավախություն չպետք է լինի, թե այս նվազեցումը, գումարների չհավաքագրումը  հետագայում ծանրաբեռնվածություն է լինելու սպառողի վրա»:

Խոսելով սակագնի կրկին նվազման հնարավորության մասին, «Գազպրոմ Արմենիա» ընկերության գլխավոր տնօրենն ասաց. «Մենք երբևէ գերշահույթ չենք ստացել, չենք ակնկալում: Եթե սպառումն այնքան ավելանա, որը ստեղծի լրացուցիչ միջոցներ, մենք նորից հայտով կդիմենք»: