Ձեր վստահելի աղբյուրը

«Անկախ ամեն ինչից՝ ընտանեկան դիրքից, սոցիալական վիճակից, ցանկացած զինվորի  մահ, դժբախտ պատահար, ինքնասպանություն կամ ինքնասպանության հասցնելու հանցագործություն,  մեզ համար չափազանց մտահոգիչ և շատ ծանր ընդունվող լուր է, երևույթ»,-լրագրողների հետ հանդիպմանն ասաց պաշտպանության նախարար Վիգեն Սարգսյանը՝ պատասխանելով վերջերս Տավուշի մարզում զինվորի ինքնասպանության դեպքի մասին հարցին, մասնավորապես, որ նա եղել է միակողմանի ծնողազուրկ,  տան միակ երեխան, դեպքը տեղի է ունեցել մարտական դիրքում, արդյո՞ք իրավունք ունեն նման զինվորին զորակոչել հենց մարտական դիրքում ծառայության: 

Նա նշեց, որ իրեն զեկուցած  նյութերի համաձայն,  զորակոչի որևէ խախտում չի արձանագրվել. «Բայց քանի որ բարձրացրեցիք այս հարցը, ես նորից կուսումնասիրեմ: Քննությունը շարունակվում է: Յուրաքանչյուր դեպքում փորձում ենք մինչև վերջ հասկանալ դրդապատճառները, իրավիճակը:  Մենք միշտ հետամուտ ենք լինելու, հետևելու ենք գործերին»:

Նախարարի խոսքով, ընտանիքն իր զավակին վստահել է բանակին և անկախ պատճառներից, բոլոր հիմնավորումներից, բանակը պետք է պատասխանատու լինի զինվորի ծառայության պայմանների, հոգեական վիճակի, տրամադրության համար:

«Դրա համար կան բազմաթիվ պատասխանատու ստորաբաժանումներ:  Բայց ինքնասպանությունը չունի սահման և  եթե հնարավոր լինել որևէ համակագում բացառել ինքնասպանությունները, իհարկե, դա կլիներ շատ ցանկալի:  Ցավոք սրտի, ինքնասպանության խնդիրը   գոյություն ունի ինչպես Զինված ուժերում, այնպես էլ դրանից դուրս: Երբեմն մարդիկ մղվում են այդ ճանապարհին որպես իրենց թվացյալ  կամ իրական խնդիրների լուծման ուղի: Մեզ համար հսկայական ցավ է: Բայց ուսումնասիրելով տարիների վիճակագրությունը՝ տեսել եմ, որ Զինված ուժերում նույն տարիքային խմբի տղամարդկանց մեջ ինքնասպանությունների թիվը գրեթե չորս անգամ պակաս է Զինված ուժերից դուրս ինքնասպանությունների թվից»,-ասաց նախարարը:

Վ. Սարգսյանը միաժամանակ նշեց, որ թեև դրանով երևույթը չի արդարացվում, չի նշանակում, որ պետք է հանգստանալ, բայց ցույց է տալիս, որ հրամանատարական վերահսկողությունը, հոգեբանի, անձնակազմի հետ տարվող աշխատանքը որոշակի արդյունք տալիս է:

«Ես հեռու եմ նրանից, որ Զինված ուժերը պետք է լինեն  հասարակության հայելին և ինչ խնդիր կա հասարակությունում, նույնը լինի Զինված ուժերում: Չէ, որովհետև, մենք  ավելի կազմակերպված  կառույց ենք: Մենք պետք է լինենք ոչ թե հայելի, այլ հասարակության, քաղաքացու կերտման դպրոց և դարբնոց, և այդ ճանապարհին դեռ շատ անելիքներ ունենք»,-ասաց նա: Խոսելով բանակի մարտունակության մասին, նախարարն ասաց. «Ոչ միայն մեր, նաև  միջազգային փորձագետների գնահատականով, Հայաստանի Զինված ուժերը մարտունակ են: Դա ապացուցեց նաև նախորդ տարվա ապրիլը: Մեր խնդիրն այն է, որ մեր  ունեցած մարտահրավերների պարագայում պարզապես մարտունակ զինված ուժերը բավարար չեն, մենք պետք է ունենանք ռազմավարական խնդիր լուծելու ունակ, շատ ամուր զինված ուժեր, որոնք ոչ թե ուղղակի ուժեղ են, այլ գոնե տարածաշրջանում ուժեղագույնն են: Եթե դրան չձգտենք, ժամանակի մեջ կարող ենք խնդիր ունենալ: Մեր Զինված ուժերը շատ մարտունակ են, արհեստավարժ, ԶՈւ-ում ծառայում են մարդիկ, ովքեր ունեն մարտական գործողությունների հարուստ փորձ, բայց պետք է նայենք առաջ:  Զինված ուժերը  պետք է միշտ զարգանան  ավելի արագ, քան իրադարձությունները նրանց շուրջ: Հետևաբար ունենք շատ անելիքներ»: