Եթե պարզվի՝ անբարեխիղճ գործողություններ են կատարվել, մեղավորները կպատժվեն. «Հաց բերող»-ի մահվան մասին

Հասարակություն 22:00 16/03/2017 Հայաստան

Այսօր ՀՀԿ ԳՄ նիստից հետո լրագրողների հետ զրույցում ՀՀԿ խոսնակ, ԱԺ փոխնախագահ Էդուարդ Շարմազանովն իր ցավակցությունը հայտնեց «Հաց բերող» Արթուր Սարգսյանի մահվան կապակցությամբ:

«Մենք բոլորս ցավում ենք, բոլորիս անունից ցավակցություն ենք հայտնում: Ցանկացած հայ մարդու կորուստ մեզ համար ցավալի է»,- ասաց ՀՀԿ խոսնակը:

Ինչ վերաբերում է մեղադրանքներին, ՀՀԿ խոսնակն ասաց՝ ինչքանով ինքն է տիրապետում տեղեկատվությանը, որը հնարավորինս օբյեկտիվ է, Արթուր Սարգսյանի հիվանդության ժամանակ՝ հացադուլի ժամանակահատվածում, մի քանի անգամ նրան բուժող բժիշկներն առաջարկել են, որպեսզի նա տեղափոխվի քաղաքացիական հիվանդանոց, բայց Արթուր Սարգսյանը մերժել է:

«Այս ամենն իմ ունեցած ինֆորմացիայով արձանագրված է, և ցանկության դեպքում կարող եք այդ արձանագրությունը տեսնել»,- ասաց նա:

Էդուարդ Շարմազանովը նաև հայտնեց, որ տեղյակ է նրա փաստաբանների հայտարարությանը, որտեղ մահվան պատճառների, բժիշկների գնահատականների հետ կապված կասկածներ են հնչում:

«Ես բժիշկ չեմ, չեմ կարող որևէ գնահատական տալ, թե ինչ պատճառով է դեպքը տեղի ունեցել: Եթե փաստաբանները, բարեկամները կամ հասարակությունը պնդում են, որ անհրաժեշտ է փորձաքննություն անցկացնել, ապա մենք որևէ խնդիր չենք տեսնում: Եթե փորձաքննությամբ պարզի, որ անբարեխիղճ գործողություններ են կատարվել, օրենքի խախտումներ են տեղի ունեցել, ապա առանց վարանելու կարող եմ հայտարարել, որ մեղավորները կպատժվեն», - հայտարարեց Շարմազանովը։

Ինչ վերաբերում է Արթուր Սարգսյանի մահը նախընտրական քարոզարշավի շրջանակներում որոշ քաղաքական ուժերի կողմից օգտագործելուն, ապա ՀՀԿ խոսնակն ասաց, որ անթույլատրելի է դժբախտությունն օգտագործել նախընտրական նպատակներով ու քաղաքական «դիվիդենտներ» շահելու համար:

«Սա մարդկային ողբերգություն է, բայց փորձել դիվիդենտներ շահել, ես ճիշտ չեմ համարում»,- ասաց Էդուարդ Շարմազանովը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: