Ձեր վստահելի աղբյուրը

««Ազգ-բանակ» հայեցակարգը Հայասատանի ունեցած պաշտպանական, անվտանգային և մի շարք այլ մարտահրավերներին դիմագրավելու լավագույն ուղին կարող է լինել: Անշուշտ ոչ նման տեսքով, բայց այս կոնցեպտը տարբեր դրսևորումներով ուղեկցել է մեր ժողովրդին պատմության տարբեր շրջափուլերում, իսկ մեր օրերում՝ այս գաղափարը համակողմանի արդյունավետություն է ապահովել մի շարք երկրների պարագայում»,-այս մասին այսօր Երևանում կայացած «Ազգ-բանակ-2017» խորագրով համաժողովի շրջանակներում Panorama.am-ի թղթակցի հետ զրույցում նշեց փորձագետ Արմեն Պետրոսյանը:

Ըստ փորձագետի՝ «Հայ ժողովրդի պատմության հազարամյակների ընթացքն է ցույց տվել, որ մշտապես բախվելով տարաբնույթ արտաքին մարտահրավերների, անգամ կանգնելով ինքնության և գոյության պահպանման վտանգի առջև, մեր ժողովուրդը կարողացել է դիմագրավել նման սպառնալիքների նաև համազգային համախմբման, միասնական պայքարի արդյունքում. պայքար, որի ընթացքում յուրաքանչյուրն ունեցել է իր անփոխարինելի դերակատարությունը: Այսօր մեզանում շրջանառվող «Ազգ-բանակ» հայեցակարգն իր հիմքում նույնպես նման համազգային համախմբում է ենթադրում, որտեղ հայ հասարակության, մեր ժողովրդի յուրաքանչյուր ներկայացուցիչ իր յուրահատուկ ներդրումը պետք է ունենա. և ինչն է առանցքային, որ մերօրյա կոնցեպտը կոչված է լուծելու ոչ միայն Հայաստանի առջև ծառացած պաշտպանական ու անվտանգային, այլև բազմաթիվ այլ խնդիրներ՝ սոցիալ-տնտեսական, զբաղվածության, կենցաղային, կրթական և այլն»:

Անդրադառնալով այս հայեցակարգի միջազգային փորձին՝ Պետրոսյանը նշեց.«Ե՛վ աշխարհագրական, և՛ պատմական տեսանկյուններից մեզ համար ամենաընկալելի, գուցե նաև օրինակելի տարբերակը, թերևս, Իսրայելի պաշտպանության բանակի կայացման օրինակն է, որի արդյունավետությունն ապացուցվել է այդ երկրի շուրջ յոթ տասնամյակների պատմության ողջ ընթացքում: Իր հիմնդրման առաջին իսկ օրից Իսրայել պետությունը, շրջապատված լինելով թշնամական երկրներով, տարբեր ուղղություններով վարելով շուրջ մեկ տասնյակ պատերազմեր և այլ տարաբնույթ ռազմագործողություններ, մշտապես կանգնած լինելով գոյության պահպանման խնդրի առջև, կարողացել է ինքնակազմակերպվել նաև մեծամասամբ հենց «ազգ-բանակ» գաղափարի առարկայացման եղանակով, որն, ի դեպ, հաջողել է լուծել ոչ միայն երկրի պաշտպանության խնդիրը, այլև հանդիսացել է մերօրյա Իսրայելի զարգացման ու կայացման կարևորագույն գրավականներից մեկը»:

Խոսելով գաղափարի իրականացման հնարավորությունների մասին՝ փորձագետը նշեց. «Այսօր «Ազգ-բանակ-2017» խորագրով համաժողովի ընթացքում ՀՀ պաշտպանության նախարար Վիգեն Սարգսյանը հանրային քննարկմանը ներկայացրեց երկու կարևոր գաղափարներ՝ «Պատիվ ունեմ» և «Ես եմ» պայմանական անվանումներով, որոնց բովանդակությունն, ըստ էության իր խորքում ունենալով երկրի պաշտպանության հիմնանպատակն, այնուամենայնիվ ազդելու է հանրային կյանքի տարբեր բնագավառների վրա՝ սոցիալ-տնտեսականից մինչև կրթադաստիարակչական»: «Առնվազն նշված 2 գաղափարների առարկայացմանը միտված կոնկրետ գործողությունների հաջողումը, համոզված եմ, կարող է լրջագույն մեկնարկ հանդիսանալ «Ազգ-բանակ» հայեցակարգի կենսագործման, ինչի արդյունքում ունենալու ենք ոչ միայն ավելի ամուր պաշտպանված հայրենիք, այլև՝ առավել կրթված, գիտակից, հայրենասեր և սոցիալապես ապահովված նոր սերունդ, հետևաբար նաև՝ ապագա»։