«Ազգ-բանակը» մեր գոյության իրավունքը պաշտպանելու հայեցակարգ է. Արմեն Ռուստամյան
«Բոլոր տեղերում, որտեղ ազգ-բանակին բնորոշ կազմակերպվածություն է եղել, անհրաժեշտ պահի բնակչությունը վեր է ածվել բանակի, կարողացել է իր պաշտպանությունն իրականացնել ու դրա համար նախապես ռեսուրս է պատրաստել, ուղղակի ազատվել, փրկվել են»,-Երևանի Կ. Դեմիրճյանի անվան մարզահամերգային համալիրում ընթացող «Ազգ-բանակ-2017» խորագրով համաժողովի «Ազգ-բանակ. անվտանգության բանաձև» թեմայով քննարկմանն ասաց ՀՅԴ Բյուրոյի քաղաքական ներկայացուցիչ Արմեն Ռուստամյանը:
Նրա խոսքով, խաղաղությունը ոչ-ոքի չեն նվիրում, չպետք է մուրալ խաղաղությունը, այլ պետք է նվաճել, նվաճելու համար պետք է պատրաստ լինել պատերազմի:
«Ազգ-բանակ գաղափարախոսության նպատակը պետք է լինի՝ ուզում ես խաղաղություն, պատրաստ եղիր պատերազմի սկզբունքի գործնականացումը, ժողովրդի անվտանգության ու պետության արժանապատիվ գոյատևման ապահովումը»,- նշեց նա:
Ա. Ռուստամյանն ասաց, որ ազգային անվտանգության անհրաժեշտ մակարդակի ապահովմանը ծառայող բանակաշինության համալիր ծրագիր պետք է իրականացնել, պետք է ապահովել հենց ազգ-բանակ գաղափարախոսության վրա հիմնված բանակաշինության ծրագիրը:
«Այդպիսի ծրագրի արդյունքը պետք է լինի այն, որ բոլորը խաղաղ պայմաններում ընդգրկված լինեն բանակաշինության գործի, պատերազմի ժամանակ՝ պաշտպանության գործի մեջ»,- նշեց նա՝ հավելելով, որ այս հայեցակարգը պետք է նպաստի ազգային պետական բազմաշերտ խնդիրների լուծմանը, արժեհամակարգի առողջացմանը, հասարակական համերաշխության ամրապնդմանը, ընդհանուր նպատակների շուրջ հայության կազմակերպմանը, երկրի ինքնաբավության ընդհանուր մակարդակի բարձրացմանը, նյութատեխնիկական առաջընթացի խթանմանը, գիտատեխնիկական առաջընթացի խթանմանը, ռազմարդյունաբերական համալիրի լոկոմոտիվ դերակատարությամբ տնտեսության արագընթաց զարգացմանը:
Արմեն Ռուստամյանն ասաց, որ բանակի նկատմամբ հայ ժողովրդի մեջ հատուկ վստահության կա, հատկապես անցած ապրիլյան պատերազմը հստակ ցույց տվեց, որ հայ ժողովուրդը կարողանում է իրեն պաշտապնել, դա կատարվեց բանակի շնորհիվ, ինչն ավելի բարձրացրեց հարգանքը, վստահությունը բանակի նկատմամբ. «Այդ ոգին, վերելքը, որ գոյություն ուներ ապրիլից հետո, մենք պետք է հենց այս ծրագրերով ավելի բազմապետկենք: Սա բերելու է անպայման դրական արդյունքների:
Նա համոզված է, որ վերը նշված խնդիրների լուծման համար ոչ այնքան նյութական միջոցներ են անհրաժեշտ, որքան քաղաքական կամքի առկայությունը, թափանցիկ ու վստահելի գործընթացների իրականացումը:
Հարցին, թե ձեր կարծիքով ի՞նչ է ազգ-բանակը, Արմեն Ռուստամյանն ասաց. «Կենսական անհրաժեշտությունից բխած միջոց է, որը պետք է կիրարկվի: Կարծում եմ՝ վերջում սա բերելու է ազգի կենսակերպի ձևավորմանը, ամեն հայ մարդ հասկանալու է՝ որպես հայ տեսակ իր պահպանումը այս գաղափարի իրականացման հաջողությունից է կախված, այդ մթնոլորտում, միջավայրում պետք է ծնվի, մեծանա, դաստիարակվի: Այն ոչ թե ագրեսիվ ռազմականացման խնդիր է լուծելու, այլ մեր անհրաժեշտ պաշտպանության խնդիրն է լուծում:
Այստեղ ոչ թե ագրեսիա կա կամ որևէ մեկի նկատմամբ հատուկ տրամադրություններ ստեղծելու նպատակ, այլ մեր գոյության իրավունքը պաշտպանելու հայեցակարգ է, որը պետք է միս ու արյուն ստանա, մտնի ամեն մեկի տուն կենցաղ, դառնա կենսակերպ»:
Հարակից հրապարակումներ`
- Ավելի բարձր մասնագիտություն, քան սպայինն է, չկա. Լևոն Մկրտչյան
- Վիգեն Սարգսյանը հանրային քննարկման ներկայացրեց առաջնագծում զինծառայության «Ես եմ» ծրագիրը
- «Ազգ-բանակ» հայեցակարգի ներքո շրջանառության մեջ դրվեց երկու նոր նախագիծ՝ «Պատիվ ունեմ», «Ես եմ»
- ՀՀ նախագահ. Հանձնարարել եմ, անհապաղ քայլեր ձեռնարկել զոհված զինծառայողների ընտանիքներին բնակարանով ապահովելու համար
- ՀՀ նախագահ. Անհրաժեշտ են համալիր հարցադրումներ, մոտեցումներ ու լուծումներ
- Սերժ Սարգսյան. Մեզ պետք են լիարժեք մարդիկ, երկրի տերեր
- Մեկնարկել է «Ազգ-բանակ-2017» խորագրով համաժողովը
- Բագրատ Սրբազան. Մեր զինվորները ոչ թե հայրենասեր են, այլ հայրենատեր
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին
