Ձեր վստահելի աղբյուրը

Արդեն մի քանի օր է՝ սոցցանցերի օգտատերերը սկսել են նոր վիրուս տարածել, որը, որոշ փորձագետների կարծիքով, իր վտանգավորությամբ կարող է մրցել աղմկահարույց Wanna Cry-ի հետ։ НТВ-ի տեղեկացմամբ, վիրուսի զոհ են դարձել օգտատերեր ամբողջ աշխարհից։ Այն սարքավորման մեջ է հայտնվում, երբ օգտատերը վերահրապարակում է անվճար ավիատոմսերի վերաբերյալ գրառումը։ Հղումի վրա սեղմելով՝ զոհն իր համակարգիչը վարակում է տրոյանական վիրուսով, ինչի միջոցով էլ հանցագործներին են փոխանցվում նրա անձնական տվյալները, իսկ վնասակար հղումը տարածվում է օգտատիրոջ սոցցանցի ընկերների շրջանում։

Թե ինչ պետք է անեն օգտատերերը՝ հնարավորինս պաշտպանելու իրենց համակարգիչները, Panorama.am-ը զրուցեց Տեղեկատվական անվտանգության փորձագետ Սամվել Մարտիրոսյանի հետ։

Panorama.am-Պարոն Մարտիրոսյան, արդյոք չափազանցված չե՞ն փորձագետների գնահատականները, որ այն իր վտանգավորությամբ կարող է մրցակցել աղմկահարույց Wanna Cry-ի հետ։
Սամվել Մարտիրոսյան- Կարծում եմ՝ չափազանցված են, առնվազն այն առումով, որ տվյալ վտանգը միայն մարդկային գործոնի վրա է հիմնված։ Այսինք, մարդ պետք է խաբվի։ Իսկ իրազեկումը թույլ է տալիս նվազեցնել վտանգը։ Իսկ Wanna Cry-ի վտանգը նրանում է, որ համակարգիչը կարող է վարակվել առանց գործողության՝ պարզապես ինտերնետին միացնելու պատճառով։ Վտանգված են հատկապես այն համակարգիչներւ, որոնց վրա օպերացիոն համակարգը թարմացված չէ։

Panorama.am- Վիրուսը համակարգիչների մեջ է հայտնվում, երբ, փաստորեն, օգտատերը վերահրապարակում է անվճար ավիատոմսերի վերաբերյալ գրառումը։ Ի՞նչ պետք է անեն օգտատերերը՝ վիրուսից հնարավորինս զերծ մնալու համար։ Միայն հղման վրա չսեղմելը բավարա՞ր է։
Սամվել Մարտիրոսյան- Իրականում սա վիրուս չէ, ավելի շուտ խաբեություն է։ Մարդուն խաբելով ստիպում են աննկատ բաժանորդագրվել վճարովի ծառայության։ Չնայած, կան զեկույցներ, որ այցելուների մի մասը նաև պարզապես այդ կայքը մտնելուց վիրուսով վարակվել են, սակայն սա դեռ ուսումնասիրված չէ։

Panorama.am- Առկա՞ են արդյոք տվյալներ՝ մոտավորապես քանի՞ համակարգիչ է Հայաստանում այսօրվա դրությամբ վարակված։
Սամվել Մարտիրոսյան-Հայաստանի վերաբերյալ հստակ տվյալներ չկան։ Հայտնի է, որ տարածումը եղել է աշխարհով մեկ։ Ընդ որում, հաքերները մի շարք լեզուներով են տարածել սա։ Բայց, հաշվի առնելով ֆեյսբուքյան աժիոտաժը, կարելի է համարել, որ Հայաստանում բավական տարածված է։