Որպեսզի պետության կողմից տրամադրված սայլակն անպետք չդառնա
«Ունիսոն» ՀԿ նախագահ Արմեն Ալավերդյանը պետությունից սայլակ է ստացել մոտ երկու տարի առաջ: Մի քանի ամիս անց այն կոտրվել է, իր միջոցներով երկու անգամ վերանորոգել է, սակայն սայլակը երրորդ անգամ է կոտրվել:
«Երրորդ անգամ այնպես ջարդվեց, որ մտածեցի վնասվածք կստանամ: Ենթադրում եմ, որ որակն այն չէր: Մետաղի հաստությունից էլ երևում էր: Հիմա վերանորոգման ենթակա էլ չէ»,-Panorama.am-ի հետ զրույցում ասաց կազմակերպության նախագահը:
Եղել է նաև դեպք, որ պետության կողմից հատկացված սայլակը չի կարողացել օգտագործել՝ իր չափերին անհամապատասխան է եղել կամ անհարմար:
«Սայլակը, ինչպես օրինակ կոշիկը, չի կարող լինել միջին: Չեն կարող բոլոր մարդիկ հագնել 40 համարի կոշիկ: Կա համարների, լայնքի, ոճի տարբերություն: Հիմա եթե խոսքը վերաբերում է սայլակին, սրանց նաև այլ բաներ են ավելանում»,-նկատեց Ալավերդյանը:
Նա ստիպված արտասահմանից է ձեռք բերել սայլակը, որով հիմա տեղաշարժվում է: Ասում է՝ սայլակ է ունեցել, որ տասը տարուց ավելի օգտագործել է, դրանով թենիս է խաղացել, բասկետբոլ:
«Ստացում է՝ պետական գումարները ծախսվում են, մարդիկ ստանում են սայլակը, որովհետև իրենց հասնում է անվճար, բայց շատ անգամ չեն կարողանում օգտվել»,-ասաց նա:
Որպեսզի պետական միջոցների ծախսումն արդյունավետ լինի, ՀԿ նախագահն աշխատանքի և սոցիալական հարցերի նախարարությանն առաջարկել է սայլակի փոխարեն դրա կարիք ունեցող մարդկանց տրամադրել հավաստագիր՝ որոշակի գումարի չափով:
Կազմակերպության ղեկավարի առաջարկին դրական են արձագանքել, նախարարի հրամանով ստեղծվել է աշխատանքային խումբ, որում ընդգրկված են ՀԿ-ների՝ հաշմանդամություն ունեցող անձինք:
Եթե հավաստագիրն իրականություն դառնա, Panorama.am-ի զրուցակցի խոսքով, շահառուն կկարողանա ընտրություն կատարել՝ վերցնելով իրեն առավել հարմար սայլակը: Խմբի անդամներն առաջարկել են, եթե հավաստագրով նախատեսված գումարը չբավականացնի, շահառուն կարող է ավելացնել իր գրպանից, եթե ավելանա, ապա դրա փոխարեն պետական մարմինը սայլակի որոշ դետալաներ կտրամադրի՝ օրինակ անիվներ, բարձիկներ կամ էլ այլ պարագաներ:
«Այս դեպքում նաև մրցակցություն կառաջանա, գները կիջնեն, որակը կբարձրանա»,-հնարավոր դրական հետևանքները ներկայացրեց ՀԿ նախագահը:
Աշխատանքի և սոցիալական հարցերի նախարարության հաշմանդամների հիմնահարցերի բաժնի պետ Աննա Հակոբյանը Panorama.am-ի հետ զրույցում հայտնեց, որ նախագիծը մշակվել է, լրամշակման փուլում է, դեռ շրջանառության մեջ չի դրվել:
«Կարծում եմ, որ 2-3 ամիս կտևի, մինչև նախագիծն ուղարկվի նախարարություններ եզրակացության համար: Դրանից հետո նոր կներկայացվի կառավարություն»,-ասաց բաժնի պետը:
Առայժմ հայտնի չէ, թե հավաստագրով ինչ գնի սայլակ կարելի է ձեռք բերել:
«Գնի հարցը քննարկվում է»,-ասաց Հակոբյանը:
Ալավերդյանի խոսքով, իրենք առաջարկում են սահմանել 120 հազար դրամ մեկ միավոր սայլակի համար: Պետական բյուջեի հատկացված միջոցներով մեկ միավոր սայլակը միջինը գնահատվում է 93 հազար դրամ, դրանց գինը սկսում է 65 հազարից հասնում մի քանի հազար դոլարի: Տարիների ընթացքում նախարարությունը մրցույթ է հայտարարել, հաղթող ընկերությունը սայլակներ է ներկրել: Անցած տարի օրինակ, 9 տեսակի սայլակ է ներկրվել, սակայն դժգոհություններ անհարմարությունների ու որակի վերաբերյալ էլի են եղել:
«Հիմա առաջարկվում է կիրառել նաև բոնուսային համակարգ: Եթե մարդը երրորդ տարում չի ստանում սայլակ, այլ դիմում է այն ստանալու 4-րդ կամ 5-րդ տարում, ապա հավաստագրին որոշակի գումար կավելանա, ինչը նշանակում է, որ շահառուն կարող է ավելի լավ սայլակ ձեռք բերել: Նախատեսվում է, որ հավաստագրով սայլակ կարելի է ձեռք բերել միայն Հայաստանից»,-ասաց նա:
Մինչ այսօր պետական միջոցներով տարեկան ձեռք է բերվել 450-600 սայլակ: Օրինակ, այս տարվա բյուջեից մոտ 57 մլն դրամ է հատկացվել սայլակներ ձեռք բերելու համար:
«Շուկան բավականին արձագանքող է, ի տարբերության պետական բյուրոկրատիայի: Խանութները ճկուն են, չեն ուզում իրենց հաճախորդին բաց թողնել: Հիմա շուկան չի զարգանում, որովհետև մատակարարները գիտեն, որ հաշմանդամություն ունեցող մարդիկ վճարունակ չեն: Բայց հավաստագիրը կփոխի այս վիճակը»,-ասաց նա:
«Ունիսոն» ՀԿ նախագահ Արմեն Ալավերդյանը չի շտապում ոգևորիչ խոսքեր ասել:
«Շատ հարցերում ընթացքից գոհ ենք լինում, իսկ արդյունքից՝ չէ: Ես դրա համար կզգուշանամ կանխատեսում անել: Ամեն դեպքում ես լավատեսորեն եմ տրամադրված, որովհետև կա նախարարության, անձամբ նախարարի՝ բավականին լուրջ մտադրություն դա կյանքի կոչել: Բայց օրը կգա, բարին էլ՝ հետը»,-ասաց նա:
Հարակից հրապարակումներ`
- «Չնայած պարբերաբար կատարվող փոփոխություններին, դժգոհողներ լինում են». Պետության կողմից տրամադրվող սայլակների մասին
- «Ունիսոն» ՀԿ. Պետության կողմից տրամադրվող սայլակների որակն ահավոր է
- Ինչպե՞ս ստանալ սայլակներ և լսողական սարքեր
- ՄԻՊ. Հաշմանդամություն ունեցող անձանց համար սայլակների տրամադրման գործընթացում առաջ են եկել խոչընդոտներ
- Ինչո՞ւ 6 ամիս է ՀՀ սայլակ չի ներկրվում. Ն.Զոհրաբյանը խնդրի լուծումը խոստացավ մայիսի 5-ից հետո
- ԱՅՍ ՏԱՐՎԱ ԸՆԹԱՑՔՈՒՄ ՍԱՅԼԱԿ ՈՒ ԼՍՈՂԱԿԱՆ ՍԱՐՔ Է ՍՏԱՑԵԼ 1261 ՄԱՐԴ