Ձեր վստահելի աղբյուրը

«Ֆրանսիահայ համայնքը ուրախ է, որ երկրի նորընտիր խորհրդարանում հայազգի երեք պատգամավոր է լինելու։ Սակայն չպետք է մոռանալ, որ նրանք նախևառաջ ֆրանսիացի պատգամավորներ են՝ առաջադրված և ընտրված ֆրնասիական կուսակցությունների կողմից։ Հետևաբար, քիչ հավանական է, որ կարողանան նպասել ֆրանասիահայ համայնքի խնդիրների բարձրաձայմանը և լուծումներ տալուն»,- Panorama.am-ի թղթակցի հետ զրույցում նման տեսակետ հայտնեց «Հայկական վերածնունդ» համահայկական կազմակերպության Փարիզի մասնաճյուղի համակարգող Շանթ Ոսկերչյանը։

«Այդ մարդիկ պարտավոր են իրացնելու իրենց հարազատ կուսակցությունների դավանած քաղաքական կողմնորոշումները։ Պարզ է, որ ֆրանսիահայ պատգամավորներն ինքնագլուխ ոչինչ չեն կարող անել։ Այսինքն՝այդ մարդկանց ծագումով հայ լինելը ֆրանսիական քաղաքականության մեջ շատ բան չի կարող փոխել»,- ասաց մեր զրուցակիցը։

Շանթ Ոսկերչյանի խոսքով, անգամ այն ժամանակ, երբ Ֆրանսիայի խորհրդարանում հայազգի պատգամավորներ չեն եղել, համայնքային  կյանքը ընթացել է իր բնականոն հունով։ Որպես ասվածի օրինակ՝ «Հայկական վերածնունդ» համահայկական կազմակերպության Փարիզի մասնաճյուղի համակարգողը բերեց Հայոց ցեղասպանության ճանաչումը և Ցեղասպանության ժխտողականության քրեականացան մասին օրենքի ընդունումը՝ արդեն իսկ հայազգի նախկին պատգամավոր Պատրիկ Դևեջյանի գործուն մասնակցությամբ։

Հարցին, որո՞նք են ֆրանսիահայ համայնքի առաջնային խնդիրները, Շանթ Ոսկերչյանը պատասխանեց՝ մեր հայրենակիցները եվրոպական այդ երկրում ընդհանուր առմամբ լուրջ խնդիրներ չունեն։ Կրթական և մշակութային խնդիրներ, որպես այդպիսիք, կարելի է ասել՝ գոյություն չունեն։

Հիշեցնենք, որ խորհրդարանական ընտրությունների արդյունքում ֆրանսիական խորհրդարան է անցել հայազգի 3 պատգամավոր՝ Ժակ Մարիլոսյանը, Գիյոմ Կասբարյանը և Դանիել Կազարյանը։