Ձեր վստահելի աղբյուրը

«Անհրաժեշտ է ձեռնարկել հնարավոր բոլոր քայլերը՝ մեր երկրում կլիմայի փոփոխության ազդեցության մեղմմանը նպաստելու համար»,-նման կարծիք հայտնեց ՀՀ գյուղատնտեսության փոխնախարար Աշոտ Հարությունյանը՝ ՄԱԿ-ի Պարենի և գյուղատնտեսության կազմակերպության կողմից այսօր հրավիրված աշխատաժողովի ժամանակ։

Կազմակերպությունն, աջակցելով ՀՀ բնապահպանության և գյուղատնտեսության նախարարություններին, սկսել է մի գործընթաց, որով աջակցելու է «Կանաչ կլիմայի հիմնադրամ»-ին ծրագրային առաջարկ ներկայացնելու հարցում:

Գլոբալ կլիմայական փոփոխությունների ազդեցությանը և Հայաստանում այդ ուղղությամբ անհրաժեշտ քայլերի ձեռնարկմանն առնչվող աշխատաժողովում, գյուղնախարարության պաշոնյան հույս հայտնեց, որ «Կանաչ կլիմայի հիմնադրամ»-ի հայեցակարգում տեղ կգտնեն այնպիսի հարցեր, ինչպիսիք են հանրապետությունում անտառապատ տարածքների ավելացումը և ագրոբիզնեսի զարգացումը:

Աշոտ Հարությունյանը նաև նշեց, որ միասնական ուժերով հնարավոր է ավելի նպատակային և արդյունավետ աշխատել կլիմայի փոփոխության հետևանքով առաջ եկած մարտահրավերների ուղղությամբ:

Աշխատաժողովին ներկա ՀՀ բնապահպանության նախարարի խորհրդական Արայիկ Ղարաբեկյանը ևս հույս ունի, որ ծրագիրը կօգնի կլիմայի փոփոխության ազդեցության մեղմմանը:

«Հայանտառ» ՊՈԱԿ-ի տնօրենի տեղակալ, ՀՀ գլխավոր անտառապետ Ռուբեն Պետրոսյանն էլ իր հերթին նկատեց, որ ծրագիրը վերաբերում է միանգամից 3 հիմնախնդիրների՝ հողերի, անտառների և ջրերի կառավարմանը:

«Խիստ կարևոր է, որ ծրագիրը երկարատև է՝ 10 տարուց ավելի: Ծրագրի իրականացման մեջ հավասարապես շահագրգռված ենք ինչպես մենք, այնպես էլ մեր դրսի գործընկերները: Հույս ունեմ, որ մեծ հաջողություն կունենանք»,- ասաց նա:

Նշենք, որ աշխատաժողովի ընթացքում առաջարկված փոփոխությունների և վեր հանված խնդիրների հիման վրա փորձագետների թիմը կմշակի ծրագրի վերջնական տարբերակ, որը կներկայացվի «Կանաչ կլիմա»-ի հիմնադրամին՝ հետագա ֆինանսավորման համար: