Ձեր վստահելի աղբյուրը

«Իմ՝ ոչ մասնագիտական հաշվարկներով, լավագույն դեպքում, չորս ամսից նոր կսկսվի Մնջախաղի թատրոնի շենքի շինաշխատանքները»,- այսօր լրագրողների հետ հանդիպմանն այս մասին հայտնեց Մնջախաղի թատրոնի գեղարվեստական ղեկավար Ժիրայր Դադասյանը։

Ինչ վերաբերում է նրան, թե երբ կսկսվեն բուն շինարարական աշխատանքները, Դադասյանը մանրամասնեց. «Մինչ հիմնական աշխատանքները պետք է որոշակի ընթացակարգ անցնել։ Փետրվարի 15-ին նախարարը մեզ հանձնեց տարածքի «ոսկե բանալին», բայց սեփականության վկայականը ստացել ենք օրերս։ Նախ մրցույթ էր հայտարարվել ճարտարապետաշինարարական պատրաստելու համար, դրա ժամկետը մետ երկու ամիս էր և ավարտվեց օրերս, հիմա այդ կազմակերպությունը պետք է կատարի տարածքի ամբողջական նախագիծը, որպեսզի այն դառնա թատրոն։ Այս պրոցեսի ավարտումից հետո, որը մի երկու ամիս կտևի,  նոր մրցույթ պետք է հայտարարվի շինարարի համար, սա նույնպես մի երկու ամիս կտևի ու սրանից հետո նոր կսկսվի շինարարությունը։ Գալիս է արդեն ձմռան շրջանը, որը շինարարական աշխատանքների համար հնարավոր է խնդիրներ առաջացնi։ Այնուամենայնիվ, մի պորցես է սկսվել, որը մեզ շատ հաճելի է, քանի որ մեկ տարի առաջ մենք տեղյակ չէինք, որ կլինենք մի այսպիսի պրոցեսի մեջ ու կունենանք թատրոնի գեղեցիկ շենք»։

Նա նաև հայտնեց, որ թատրոնի նոր շենքի նախագիծը պատրաստ լինելուց հետո այն դրվելու է համընդհանուր քննարկման, որպեսզի կարծիքներ հավաքվի և ձևավորվի վերջնական տարբերակը:

Հիշեցնենք, որ փետրվարի 15-ին ՀՀ մշակույթի նախարարությունը Երևանի մնջախաղի պետական թատրոնին գործունեություն ծավալելու նպատակով տրամադրել էր Ազգային գրապալատի շենքը, իսկ գրապալատը միացել է Ազգային գրադարանին: Թատրոնին հարմարեցված չլինելու պատճառով՝ շենքում պետք է կատարվեն շինարարական աշխատանքներ:

Հանդիպմանը ներկա Մնջախաղի թատրոնի տնօրեն Արամ Խոջոյանն անդրադառնալով այս ընթացքում թատրոնի ստեղծագործական աշխատանքին, նշեց, որ իրենք այս տարի ակտիվ կերպով մասնակցել է «Մշակութային կանգառ» նախագծին, ներկայացումներ են ունեցել Եղվարդում, Աբովյանում, Մարալիկում և Արթիկում»։

«Տեխնիկական հարցերով ահագին բարդությունների ենք հանդիպում, բայց մարդկանց ոգևորությունը ստիպում է հաղթահարել դրանք։ Արթիկում մի լույով ներկայացում ենք խաղացել, դա այնքան բարդ է խաղալ, ասելիքը փոխանցել հանդիսատեսին։ Բայց դա մեջ հաջողվեց, ինչի մասին էր վկայում արթիկցիների արձագանքը»,- ասաց նա։

Թատրոնի տնօրենը հանտնեց նաև, որ սեպտեմբերին նախագծի շրջանակներում կայցելեն Վայոց Ձորի երկու համայնքներ՝ Արտաբույնք և Եղեգնաձոր:

Երևանի Մնջախաղի պետական թատրոնը տեղծվել է 1974 թվականին և պետական թատրոնի կարգավիճակ է ստացել 1983 թվականին։ Չունենալով սեփական տարածք, թատրոնի բեմադրությունները ներկայացվում են Երևանի պատանի հանդիսատեսի թատրոնում՝ վարձակալության հիմունքներով։