Ձեր վստահելի աղբյուրը

«Վստահ չեմ, որ 12-ամյա կրթությունը պարտադիր դարձնելով՝ կրթական մակարդակը կբարձրանա»,- Panorama.am-ի հետ զրույցում այսպիսի տեսակետ հայտնեց կրթության փորձագետ Սերոբ Խաչատրյանը։

«Միջազգային ցուցանիշներով եթե նայենք, կրթության երկար տևողությունը դրական ազդեցություն ունի ընդհանրապես, բայց միայն այդ դրույթը բավարար չէ, որպեսզի հիմնավորենք, որ այս քայլն անելով լավ արդյունք կունենանք։ Շատ կարևոր է, թե ինչպե՞ս պետք է իրականացվի այս ամենը, ինչպե՞ս ենք նախապատրաստվում և արդյոք կարողանալու ենք լուծել ի հայտ եկող խնդիրները»,- ասաց նա։

Խաչատրյանը ուշադրություն հրավիրեց երկու փաստի վրա, թե ովքեր են 9-րդ դասարանից դուրս գալիս և ինչ պատճառներով. «Դուրս են գալիս ծայրահեղ աղքատ ընտանիքների երեխաները՝ աշխատելու նպատակով և նրանք, ովքեր կրթությունը ձախողել են։ Հիմա ուզում եմ հասկանալ, որքանո՞վ է 12-ամյա պարտադիր կրթությունը լուծելու այս երեխաների խնդիրները։ Նախարարությունը ի՞նչ է անելու, որպեսզի այս երեխաներն այդ հաջորդ երեք տարում ունենան ավելի լավ կրթություն, քան ունեցել են նախորդ 9-ում, և ի՞նչ է անելու, որպեսզի նրանք նաև չունենան աշխատելու խնդիր։ Սրա հիմքում սոցիալական փաթեթ պետք է դրվի, քանի որ այս որոշումը երեխաների համար կարող է դառնալ նաև լրացուցիչ ծախսերի պատճառ։ Տասնյակ գյուղերում տրանսպորտի խնդիր կա՝ ավագ դպրոց, արհեստագործական կամ միջին մասնագիտական հաստատություն հասնելու հետ կապված»։

Մի հարց ևս մտահոգիչ համարեց Սերոբ Խաչատրյանը՝ արդյոք ուսուցիչները պատրաստ են այդ երեխաների հետ ավագ դասարաններում աշխատելու. «Եթե 9-րդ դասարանից հետո երեխաներն ուղղակի պետք է ձևի համար գնան գան, այս պարագայում ուղղակի ոչ մի լավ արդյունք չեն ստանա, միակ լավը կլինի այն, որ դպրոցները մի քիչ ավելի փող կստանան այս երեխաների համար»։

Ինչ վերաբերում է կրթության ոլորտում շարունակ կատարվող փոփոխություններին, մեր զրուցակիցն ասաց, որ փորձ է արվում ինչ-որ բան ցույց տալ դրանով։

Մասնագետը կարծում է, որ շատ հաճախ այդ փոփոխություններն ավելի իմիտացիոն բնույթի են, քանի որ և ֆինանսական, և նյութական, և մարդկային ռեսուրսը չի մոբիլիզացվում, որպեսզի այդ ամեն ինչը լավ արվի, արդյունքում ստանում են ինչ-որ դեկլարատիվ փոփոխություններ։

«Օրինակ՝ Հայաստանը կարող է հայտարարել՝ մենք հիմա ունենք 12-ամյա պարտադիր կրթություն, համընդհանուր ներառական կրթություն, սրանք որպես լոզունգներ սիրուն են հնչում, բայց որքանով է այն փոխում աղքատ երեխայի կյանքը։ Վստահ չեմ, որ այս որոշման արդյունքում նրանց կրթական մակարդակը կբարձրանա, նրանք ձևի համար գնալու են գան»,- հավելեց Սերոբ Խաչատրյանը։

Հիշեցնենք, որ սեպտեմբերի 1-ից ուժի մեջ է մտնում «Հանրակրթության մասին» օրենքի այն պահանջը, որի համաձայն՝ հանրապետությունում 12-ամյա կրթությունը դառնում է պարտադիր։