Ձեր վստահելի աղբյուրը

Ադրբեջանն արգելել էր Կանադայի Պահպանողական կուսակցության երկու խորհրդարանականներին՝ Ռաքել Էարդրին (Rachael Harder) և Թոնի Կլեմնտին (Tony Clement) այցելել Լեռնային Ղարաբաղ։ Այս մասին տեղեկացնում է «The Globe and Mail» պարբերականը։

Ադրբեջանի ԱԳՆ-ն կանադացի խորհրդարանականներին մեղադրել է հայկական կողմին աջակցություն ցուցաբերելու և ՄԱԿ ԱԽ չորս բանաձևերը արհամարհելու մեջ։

Նշենք, որ օգոստոսի 28-ին, Երևան է ժամանել Կանադայի խորհրդարանական պատվիրակությունը, որի ղեկավարն է «Մեկ ազատ աշխարհ» ՀԿ ղեկավար Մաջեդ էլ Շաֆին։ Պատվիրակության կազմում են կանադական խորհրդարանի ստորին պալատի Պահպանողական կուսակցության պատգամավորներ Ռաքել Էարդրը և  Թոնի Կլեմնտը (Tony Clement)։ Պատվիրակությանը ընկերակցում է Կանադայի Հայ Դատի Հանձնախմբի Օտտավայի գրասենյակի գործադիր տնօրեն Սևակ Պելեանը։

Պարբերականը նշում է, որ Ադրբեջանը խորհրդարանականների ճամփորդության վերաբերյալ բողոքի նոտա է  հեղել Կանադայի կառավարությանը և  նրանց դասել է անցանկալի անձանց ցուցակում։

Պարբերականի հետ զրույցում Ադրբեջանի ԱԳՆ մամուլի խոսնակ Հիքմեթ Հաջիևը հայտարարել է, որ խորհրդարանականների այցը Կանադայի իշխանությունների և հասարակության արժեքների դեմ է։
«Այն անընդունելի է»,-հավելել է  վերջինս։

Երևանում գտնվող խորհրդարանական Կլեմնտը պարբերականի հետ զրույցում  իր հերթին նշել է. «Ես որևէ կողմի քայլերին հավանություն չեմ տալիս։ Ես ցանկանում եմ, որ կողմերը բանակցությունների միջոցով կարգավորման հասնեն։ Ես, Ռաքել Էարդրի հետ մասին  այստեղ եմ փաստահավաք և մարդասիրական առաքելության նպատակով»։

Այնուամենյնիվ, նա ընդունել է հայկական կողմի այն պնդումները, որ ադրբեջանական զինված ուժերը վայրագություններ են իրականացրել՝  հայ զինվորներին գլխատել են և ականջները կտրել։

«Ես անձամբ եմ տեսել ադրբեջանական զորքերի կողմից իրականացված վայրագությունները։ Ինչ վերաբերվում է  քաղաքական իրավիճակին,  երբ ասում եմ, որ ավելի լավ է բանակցությունների միջոցով հասնել կարգավորման, ոչ թե շարունակել պատերազմը, ապա ես հավատարիմ եմ Կանադայի համաշխարհային քաղաքականությանը»,-հավելել է  վերջինս։
Կանադայի ԱԳ նախարար Խրիստյու Ֆրիլենդին մամուլի քարտուղար Ադամ Օսթինը   հստակ նշել է, որ Կանադայի կառավարությունը չի ցանկանում տարածքային առճակատման հարցում որևէ կողմին աջակցություն ցուցաբերել։

«Մենք լիովին աջակցում ենք ԵԱՀԿ-ի ջանքերին՝ Հայաստանի և Ադրբեջանի  առճակատման հարցում խաղաղ և համապարփակ կարգավորման  հասնել։  Ռազմական կարգավորումը պատասխան չէ։ Սա այն դիրքորոշումն է, որ մենք հայտնել ենք և՛ Հայաստանի, և՛ Ադրբեջանի իշխանություններին»,-նշել է Օսթինը։