Եթե եկամուտները չեն ավելանում, աշխատատեղեր չեն բացվում, մարդիկ ինչպես պետք է զգան տնտեսական աճի ազդեցությունը. տնտեսագետ
«Կառավարության գործունեության մեջ ոչ մի տրամաբանություն չկա, հիմնականում իրավիճակային լուծումներ են գտնում, իսկ ռազմավարական ծրագրերն ուշադրությունից դուրս են մնում»,- այս մասին այսօր լրագրողների հետ հանդիպման ժամանակ ասաց տնտեսագետ Վահագն Խաչատրյանը՝ հավելելով, որ այս տարիների ընթացքում երբ ուզում է հասկանալ Կառավարության գործողությունների տրամաբանությունը՝ պարզում է, որ իրականում ոչ մի տրամաբանություն չկա:
Տնտեսագետը անտրամաբանական գործողություններ է նկատել օրինակ՝ աղբահանության, վճարովի ավտոկայանատեղիների ոլորտներում, Սննդամթերքի անվտանգության պետական ծառայության գործողություններում՝ կապված հացի տեղափոխման հետ: «Ստացվում է, որ Հայաստանի քաղաքացու գրպանը դատարկելու մեծ ցանկություն կա»,- նշեց տնտեսագետը:
Վահագն Խաչատրյանը նաև անտրամաբանական է համարում այս ֆոնի վրա ներդրումներ ներգրավելու հարցը: Ըստ նրա՝ կառավարությունը բազմաթիվ խոստումներ է տալիս, թվեր է ներկայացնում, բայց արդյունքում պարզվում է, որ ոչինչ էլ չի փոխվել: Նրա խոսքերով՝ այդ մասին են վկայում Ազգային վիճակագրական ծառայության հրապարակած տվյալները:
Ըստ նրա՝ ներդրումներ ներգրավելու համար նախ պետք է նպաստավոր պայմաններ ստեղծել, բայց այդ նպաստավոր դաշտը չկա: Տնտեսագետը կարծում է է, որ ներդրումների մասին խոստումներն իրականությանը չեն համապատասխանում, իսկ եթե ներկայացված թվերը իրական լինեին, ապա մեծ թվով աշխատատեղեր բացված կլինեին: «Մինչդեռ, ըստ պաշտոնական վիճակագրության, հունվար-հուլիս ամիսներին հանրապետությունում բացվել է 189 աշխատատեղ: Օրինակ՝ հունվարին բացվել է 14 աշխատատեղ, մարտին՝ 49, ապրիլին՝ 40, հունիսին՝ 30, հուլիսին՝ 9: Իհարկե պաշտոնապես հայտարարվում է, որ ստեղծվել է 2500 աշխատատեղ, բայց կցանկանայի տեսնել, թե որ բնագավառում է այդքան աշխատատեղ ստեղծվել»,- նշեց Վահագն Խաչատրյանը:
Ինչ վերաբերում է տնտեսական աճին` տնտեսագետն ասաց, որ կան մի շարք հանգամանքներ, որոնք կարող են տնտեսական աճ ապահովել: Մասնավորապես, համաշխարհային տնտեսությունում ստեղծված բարենպաստ պայմանները, ՌԴ-ի տնտեսական աճը, տրանսֆերտների աճը` 17 տոկոսով: «Այս ամենը ազդեցություն է ունեցել տնտեսական ակտիվության գործում»,- ասաց տնտեսագետը:
Նա միաժամանակ նշեց, որ եղանակային պայմանները ևս ազդեցություն ունեն տնտեսական աճի վրա. «Շոգի կամ ցրտի հետևանքով շատ էլեկտրաէներգիա է սպառվում: Այս տարվա հունվար-հունիսին բնակչության կողմից էլեկտրաէներգիայի սպառումը նախորդ տարվա նույն ժամանակահատվածի համեմատ աճել է 10, 3%-ով, արդյունաբերությունում՝ 4,7%-ով: Այսինքն՝ տաքանալու կամ հովանալու համար օգտագործվող էներգիայի ծավալները դրական ազդեցություն են ունենում տնտեսական աճի վրա»:
Վահագն Խաչատրյանը նաև կոռեկտ չի համարում պաշտոնյաների հայտարարությունները, թե մարդիկ իրենց մաշկի վրա զգում են տնտեսական աճը: «Եթե եկամուտները չեն ավելանում, աշխատատեղեր չեն բացվում, ապա մարդիկ ինչպես պետք է զգան տնտեսական աճի ազդեցությունը: Եթե ինչ-որ տեղ կա, ապա այն մարդիկ են զգում, որոնք միշտ օգտվում են ցանկացած իրավիճակից: Այսինքն՝ մարդկանց 5-10 տոկոսը, որոնք տիրապետում են Հայաստանի ազգային եկամտի մոտ 60-70 տոկոսին», - ասաց տնտեսագետը:
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ