Ձեր վստահելի աղբյուրը

«Երբ ՀՀԿ-ն իր որոշումը կայացնի և վարչապետի իր թեկնածուին առաջարկի, այդ ժամանակ էլ «Ծառուկյան» դաշինքը կհայտնի իր դիրքորոշումը»,-այսօր ԱԺ-ում լրագրողների հետ զրույցում ասաց «Ծառուկյան» խմբակցության ղեկավար Գագիկ Ծառուկյանը՝ հավելելով, որ Խորհրդարանական ընտրությունների ժամանակ ՀՀԿ-ն տարել է առավելագույն ձայներ, հետևաբար առաջարկողն ու որոշողն ինքն է, այդ իրավունքը տրված է ՀՀԿ-ին:

Հարցին՝ իրենց խմբակցությունը վարչապետի թեկնածու ունի՞, վերջինս պատասխանեց. «Երբ որ կասեն, այն ժամանակ ինձնից պատասխան կլսեք»:

Ճշտող հարցին՝ տեսնո՞ւմ է արդյոք ՀՀ վարչապետի պաշտոնում Սերժ Սարգսյանին, Գագիկ Ծառուկյանը պատասխանեց. «Մեր տեսնել-չտեսնելը խնդիր չի լուծում, քանի որ որոշողը Հանրապետականն է: Այսօր այդ կուսակցությունը դեռ չի որոշել, չի քննարկել, իսկ դուք պատգամավորներին անհարմար վիճակի մեջ եք դնում»:

Լրագրողները հետաքրքրվեցին՝ չե՞ն փորձելու վարչապետի առաջադրման գործում որևէ կերպ խոչընդոտել ՀՀԿ-ին, ինչին ի պատասխան՝ Գագիկ Ծառուկանն ասաց. «Խոչընդոտը պետք է լիներ ժողովուրդը, որն իր ձայնը տվել է ՀՀԿ-ին, ՀՀԿ-ն էլ պատասխանատու է ժողովրդի առաջ»:

Իսկ եթե ժողովուրդն ընդվզի Սերժ Սարգսյանի վարչապետության դեմ, «Ծառուկյան» դաշինքը կկանգնի՞ ժողովրդի կողքին, հետաքրքրվեցին ԶԼՄ ներկայացուցիչները: Ի պատասխան՝ քաղաքական գործիչն ընդգծեց. «Ժողովուրդը ընտրություններին պետք է տար նրան, ում հավատում էր: Ես ժողովրդին ասում էի՝ պատրաստ եմ փրկելու, տվեք 50+1, փրկեմ: Ասում էի գումարի բերման աղբյուրը, ասում էին՝ Ծառուկյանը բլեֆ է անում»:

«Ծառուկյան» խմբակցության  ղեկավարն անդրադառնալով վարչապետի գործունեությանը, նշեց՝ վերջինս իր ընկերն է, և կոռեկտ չի համարում ընկերոջ մասին կարծիք հայտնել. «Երբ որ իրար հետ հանդիպում ենք, ես ասում եմ բացասականն էլ, դրականն էլ: Այսօր դրականը նկատելի է, որ բանկերի 25-30 տոկոսը դարձել է 8-10 տոկոս, Հայաստանում տուրիստների քանակի աճը 25 տոկոսից ավել է»:

Իսկ ներդրումները, որ խոստացել էր բերել Հայաստան, արդյո՞ք կբերվեն, հետաքրքրվեցին լրագրողները: «Այդ խնդիրը տրված է ՀՀԿ-ին: Իսկ եթե մեզ հնարավորություն չեք տվել, ինչպես բերեմ: Ենթադրենք՝ մեկն ուզում է աստղ դառնալ: Բայց պետք է այդ հնարավորությունը տրվի, որ դառնա: Ծառուկյանը ներդրումներ էլ է բերելու,  անում ենք էլ, կառուցում ենք էլ: Ինչ անում ենք, անում ենք լավը»,- ասաց նա:

Ինչ վերաբերում է կոալիցիա կազմելու հարցին, ապա նման քննարկումներ, Ծառուկյանի հավաստմամբ, չեն եղել: «Ես կյանքում ոչ մի բան չեմ բացառում, բայց իմ պարտքը ժողովրդի առաջ պետք է կատարեմ»,- ասաց խորհրդարանականը:

Անդրադառնալով Հայաստանի՝ ԵԱՏՄ անդամակցության հարցին՝ խմբակցության ղեկավարը չբացառեց, որ կառույցի հնարավորությունները ճիշտ չեն օգտագործվում: Ինչ վերաբերում է ԵՄ-Հայաստան նոր համաձայնագրին, ապա այդ թեմայի շուրջ Գագիկ Ծառուկյանը չշտապեց կարծիք հայտնել՝  ասելով, որ մանրամասներ առայժմ չեն ներկայացվել:

Քաղաքական գործիչն ընդգծեց նաև սպորտի ոլորտում առկա ձեռքբերումները՝ առանձնացնելով հատկապես ըմբշամարտի աշխարհի առաջնությունը, որտեղ ութ ոսկե մեդալից երկուսը նվաճեցին հայ մարզիկները: