ԱՄՆ-ն, ՄԲ-ն ողջունում են Մեհման Ալիևի ազատ արձակումը, սակայն չեն դադարում Ադրբեջանին քննադատել
Միացյալ Նահանգների Պետքարտուղարության խոսնակ Հիթեր Նաուերթը կոչ է արել Ադրբեջանի իշխանություններին «Թուրան» լրատվական գործակալության տնօրեն Մեհման Ալիևի դեմ հարուցված մնացած մեղադրանքները չեղյալ հայտարարել։ «ԱՄՆ-ն դրական է որակում սեպտեմբերի 11-ին Մեհման Ալիևի նախնական կալանքից ազատ արձաումը։ Մենք կոչ ենք անում իշխանություններին չեղյալ հայտարարել նրա դեմ հարուցված մնացած մեղադրանքները և թույլ տալ նրան իր կարևոր աշխատանքն անխոչընդոտ իրականացնել։ Մենք նաև կոչ ենք անում իշխանություններին այս դրական քայլի վրա հիմնվելով, Ադրբեջանում ազատ արտահայտվելու և մարդու իրավունքների պաշտպանության ամրապնդման հարցում քայլեր ձեռնարկել։ Մենք շարունակում ենք կոչ անել Ադրբեջանի իշխանություններին ազատել բոլոր նրանց, ովքեր իրենց հիմնարար իրավունքները իրականացնելու համար ձերբակալվել են»,-նշված է հայտարարության մեջ։
Մեծ Բրիտանիայի արտաքին քաղաքական գերատեսչությունը նույնպես ողջունել է Մեհման Ալիևի ազատ արձակումը։ «Մեծ Բրիտանիան ողջունում է «Թուրան» լրատվական գործակալության տնօրենի ազատ արձակման վերաբերյալ որոշումը։ Սա դրական քայլ է և Մեծ Բրիտանիան կշարունակի հետևել այս դեպքի հետ կապված հետագա զարգացումներին։ Մենք կոչ ենք անում Ադրբեջանի իշխանություններին այս պահի վրա հիմնվելով անկախ ԶԼՄ-ների հարցում դադարեցնել բոլոր սահմանափակումները»,-նշված է հայտարարության մեջ։
ԵԽԽՎ մոնիթորինգային հանձնաժողովի անդամներ, Ադրբեջանի հարցերով համազեկուցողներ Ստեֆան Շեննաքն ու Ցեզար Ֆլորին ողջունել են Մեհման Ալիևի ազատ արձակումը։ «Մեհման Ալիևի ազատ արձակումը դրական ազդանշան է, սակայն նա դեռ տնային կալանքի տակ է գտնվում և նրա դեմ հարուցված մեղադրանքները, ոչ էլ «Թուրան» լրատվական գործակալության դեմ սահմանափակող միջոցառումները չեն չեղարկվել։ Հույս ունենք, որ դրանք շուտով կվերացվեն»,-հայտարարել են վերջիններս։
Հիշեցնենք, որ լրագրողի ձերբակալությունը տեղի է ունեցել օգոստոսի 24-ին: Նրան կալանավորել են հարկերից խուսափելու և պաշտոնական լիազորությունների չարաշահման մեղադրանքով: Սակայն օրերս Ադրբեջանում Յասամալի շրջանային դատարանը Մեհման Ալիևի նկատմամբ որպես խափանման միջոց ընտրել էր երեք ամսով կալանքը: Մեհման Ալիևը նախագահի որոշմամբ ազատ է արձակվել: Վերջինիս նկատմամբ որպես խափանման միջոց ընտրվել է տնային կալանքը:
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում