Ֆլեշմոբ. «Հայկական գորգը ազգային հպարտությունն է»
Վաղ առավոտից մինչ ուշ երեկո Երևան քաղաքի տարբեր հատվածների բնակելի շենքերի պատուհաններից, տարբեր հաստատությունների պատշգամբներից երևում էին հայակական գորգեր: Ինչպես տեղեկացնում են SPRING PR-ընկերությունից, տեղի է ունեցել «Հայկական գորգը ազգային հպարտությունն է» ֆլեշմոբ։ Այս յուօրինակ ձևաչափով ֆլեշմոբի մեկնարկը տրվել է Շառլ Ազնավուրի անվան հրապարակում՝ «Մոսկվա» կինոթատրոնի հարակից տարածքում:
Յուրաքանչյուր անձ, ով հայկական գորգ կամ ձեռագործ կարպետ ուներ, միացել է ֆլեշմոբին` իր պատուհանը կամ պատշգամբը զարդարելով հայկական գորգերով և կարպետներով:
«ՀԱՅԿԱԿԱՆ ԳՈՐԳԸ ԱԶԳԱՅԻՆ ՀՊԱՐՏՈՒԹՅՈՒՆՆ Է» ֆլեշմոբի՝ որպես զանգվածային միջոցառման նպատակն է՝ ազգային գորգի և գորգարվեստի արժևորումը, գորգագործության ավանդույթների պահպանման հիմնախնդրի բարձրաձայնումը, լայն հանրության իրազեկումը հայկական գորրգի ինքնատիպ մշակույթի առանձնահատկությունների վերաբերյալ։
Միջոցառման գաղափարի և իրականացման հեղինակն ու նախաձեռնողն է հայկական գորգի ազգային կենտրոնը՝ ՀՀ Մշակույթի նախարարության աջակցությամբ: Հայկական գորգի ազգային կենտրոնի նպատակն է յուրօրինակ ձևաչափով, ազգային ֆլեշմոբի միջոցով վերականգնել ազգային ավանդույթները, պահպանել հայկական ժառանգությունը, ինչպես նաև հայկական գորգը ճանաչելի դարձնել ամբողջ աշխարհին: