Մարդուն Սահմանադրությանը պետք է ծանոթացնել դեռ մանկապարտեզից. Վարդան Այվազյան
Անկախությունն ինքնիշխանության բաղադրատարրերից մեկն է։ Միայն անկախ լինելը բավարար չէ, որպեսզի տվյալ պետությունը կարողանա ներդաշնակորեն զարգանալ։ Այսօր կայացած մամուլի ասուլիսի ժամանակ այս մասին ասաց սահմանադրական իրավունքի մասնագետ Վարդան Այվազյանը։
«Այսօր մենք տեսնում ենք, որ Երկիր մոլորակն ինչպես է դինամիկ առաջընթաց ապրում դեպի գլոբալիզացիա և ինտեգրում։ Այս ճանապարհին բազում երկրներ զրկվում են իրենց ինքնիշխանությունից, մյուսներն՝ ավելի զարգանում։ Ինչ վերաբերում է Հայաստանին, ապա Սահմանադրությունը ոչ պետության, ոչ էլ հասարակության կողմից չպետք է դիտարկել որպես տեխնիկական, իրավական փաստաթուղթ։ Անկախությունն ամրագրելու համար հետևողական աշխատանք է անհրաժեշտ»,- ասաց բանախոսը։
Վարդան Այվազյանի խոսքով, պատահական չէ, որ ՀՀ անկախության 26-ամյակին ընդառաջ՝ ականատես եղանք Հայաստան-Սփյուռք 6-րդ համաժողովին և ՄԱԿ-ի գլխավոր վեհաժողովի 72-րդ նստաշրջանին։
«Բոլորն էլ գտնում են, որ անդամ երկրների ինքնիշխանության ապահովման առումով ՄԱԿ-ն արդեն արդյունավետ չէ։ Անհրաժեշտ է ձևավորել միջազգային իրավունքի մի համակարգ, որը կներդաշնակեցնի ՄԱԿ-ի անդամ բոլոր երկրների ինքնիշխանությունը՝ հաշվի առնելով դրանց պետական շահերը»,- ընդգծեց սահմանադրագետը։
Վարդան Այվազյանը նաև շեշտեց՝ ինքնիշխանության ամրապնդումից հետո ազգովի պետք է լծվենք համահայկական քաղաքակրթության ձևավորման գործին, ինչի արդյունքում ամբողջ աշխարհը կճանաչի Արցախը՝ կամ որպես ինքնիշխան միավոր, կամ որպես Հայաստանի անքակտելի մաս։
Սահմանադրագետը ուշադրություն հրավիրեց այն հանգամանքի վրա, որ ՀՀ Սահմանադրությունը գոյության տարիների ընթացքում փոփոխվել է միայն տեքստային-տեխնիկական առումով, սակայն որպեսի արդյունքը շոշափելի լինի, փոփոխությունները պետք է ներդրվեն նաև մարդկանց մտածողության մեջ։
«Հայաստանում շատ դեպքում անգամ մտավորականությունը տարրական գիտելիքներ չունի Սահմանադրության մասին, էլ ուր մնաց շարքային քաղաքացին։ Մարդուն Սահմանադրությանը պետք է ծանոթացնել դեռ մանկապարտեզից։ Սա համապարփակ ազգային ծրագիր պետք է լինի»,- ամփոփեց մասնագետը։
Հարակից հրապարակումներ`
- ՀՀ անկախության 26-րդ տարեդարձի առթիվ Նախագահը այցելել է «Եռաբլուր» պանթեոն
- Հայաստանը տոնում է անկախության 26-ամյակը