Ադրբեջանի կողմից «սպանենք, ջարդենք» տոնայնությունը գուցե մի փոքր նվազի. Վիգեն Հակոբյան
Հայաստանի և Ադրբեջանի նախագահների ժնևյան հանդիպումը ի տարբերությունը նախորդների՝ մի քիչ այլ էր։ Այսօր լրագրողների հետ հանդիպմանը նման կարծիք հայտնեց քաղտեխնոլոգ Վիգեն Հակոբյանը։
«Եթե մենք նայում ենք այն հայտարարության տեքստը, որը տրվեց հանդիպումից հետո, ապա տպավորությունն այնպսիսին էր, որ հերթական հանդիպումն էր, բայց այնուամնեայնիվ կան որոշակի դրվագներ, որոնք թույլ են տալիս ասել, որ այս հանդիպումը մի քիչ այլ էր։ Երկար ընդմիջումից հետո այս համատեղ հայտարարությունը ստորագրեցին ոչ միայն համանախագահող երկրների ներկայացուցիչները, այլև երկու երկրների արտգործնախարարները։ Այսինքն`սա նշանակում է, որ այս փաստաթղթում չկան կետեր, որոնք հակասում են այս կամ այն կողմի շահերին՝ այսինքն երկու կողմերն էլ համաձայն են այդ փաստաթղթին»,- մանրամասնեց քաղտեխնոլոգը։
Նրա խոսքով՝ հայտարարությունում հիմնական մեսիջն այն է, որ եղել է կառուցողական խոսակցություն. «Այսինքն` կողմերը պատրաստ էին իրար հետ զրուցելու, և հիմնական թեզը, որ կար այդ փաստաթղթում այն էր, որ պայմանավորվել են շփման գոտում լարվածությունը նվազեցնելու շուրջ։ Եթե այս թեզը վերցնենք որպես հիմք, ապա դա երևի թե հայկական կողմի հիմնական օրակարգային հարցն էր։ Ամբողջ խնդիրը միայն նրանում է, թե ինչպես է դա լինելու, Վիեննայի և Պետերբուգի պայմանավորվածությունների շրջանակու՞մ, թե՞ այլ ձև»։
Վիգեն Հակոբյանի կարծիքով՝ երկրորդ մեսիջը Սերժ Սարգսյանի հայտարարությունն էր, որ այնուամենայնիվ կողմերը լուծման տարբերակի վրա դուրս չեն եկել. «Սա նշանակում է, որ այն փաստաթուղթը (Մադրիդյան սկզբունքներ), որը դրված է սեղանին, դրա շուրջ որևէ լուրջ համաձայնություն չկա։ Հիմնականում կարելի է ենթադրել, որ խոսքը գնում է առայժմ լարվածության նվազեցման մասին։ Երրորդ մեսիջը, որը հնչեց Սերժ Սարգսյանի կողմից այն էր, որ հայկական կողմը մնում է իր դիրքերի վրա»։
Քաղտեխնոլոգի կարծիքով՝ Ադրբեջանի կողմից «սպանենք, ջարդենք» տոնայնությունը գուցե մի փոքր նվազի։
«Նայում էի ադրբեջանական այն կայքերը, որոնք սովորաբար բավականին ակտիվ են լինում նամ պրոցեսներից հետո, քար լռություն էր, հիմնականում կամ ցիտում են մեր մամուլը, կամ միջազգային էքսպերտներին»,-հավելեց նա։
Հարակից հրապարակումներ`
- ՄԱԿ-ի գլխավոր քարտուղարը կոչ է արել ԼՂ հարցում հասնել խաղաղ կարգավորման
- Սերժ Սարգսյան. Մեզ համար միակ լուծումն այն է, որ Ղարաբաղը լինի Ադրբեջանից դուրս
- Սարգսյան-Ալիև հանդիպումն անցել է կառուցողական մթնոլորտում. հայտարարություն
- Այս պահին ընթանում է Սերժ Սարգսյանի ու Իլհամ Ալիևի առանձնազրույցը