Ձեր վստահելի աղբյուրը

Բարեփոխումների ճանապարհին միմյանցից սովորելու և մարտահրավերներին միասին դիմակայելու մեծ հնարավորություն է ստեղծված»,- այս մասին նշել էՀՀ արդարադատության նախարար Դավիթ Հարությունյանն՝ այսօր Թբիլիսիում մեկնարկած վրաց-հայկական իրավական երկրորդ ֆորումի ժամանակ։

«Իրավական դաշտում ունեցած խնդիրները նույնն են, և նման ֆորումները, ավանդույթ դառնալով, կնպաստեն մեր երեք նախարարությունների առջև ծառացած խնդիրների արդյունավետ լուծմանը»,- ԱՆ մամուլի ծառայության փոխանցմամբ՝ նշել է նախարար Հարությունյանը:

Վրաստանի արդարադատության նախարար  Տեա Ծուլուկիանիի խոսքով, այսօրվա հանդիպումը իրավական ոլորտում երկու երկրների արդյունավետ և կառուցողական համագործակցության վկայությունն է: Տեա Ծուլուկիանին նաև համոզմունք է հայտնել, որ այս ֆորումը շարունակական կլինի, իսկ խնդիրների լուծմանն ուղղված համատեղ պայքարը՝ արդյունավետ:

Վրաց-հայկական ֆորումի ընթացքում քննարկվելու են երկու երկրների դատական բարեփոխումներին, քաղաքացիական և քրեական գործերով իրավական համագործակցությանը, երկու նախարարությունների աշխատակազմի Վերահսկողության ծառայությունների իրավասություններին, անչափահասների արդարադատության ոլորտում լավագույն փորձին վերաբերող մի շարք հարցեր, ինչպես նաև ներկայացվելու են Հայաստանում քաղաքացիական կացության ակտերի գրանցման ոլորտում ներդրված միասնական էլեկտրոնային համակարգը, հակակոռուպցիոն քաղաքականությունը, Պրոբացիայի ծառայության զարգացմանն ու քրեաատարողական ոլորտի բարեփոխմանն ուղղված աշխատանքները:

Առաջին հայ-վրացական իրավական ֆորումը տեղի էր ունեցել 2015 թ-ի հունիսին, Երևանում, որի ընթացքում քննարկվել էր իրավական և դատական հարցերի լայն շրջանակ: