Ձեր վստահելի աղբյուրը

ՀՀ նախագահ Սերժ Սարգսյանի՝ երեկ ոստիկանության կոլեգիայի նիստում ունեցած ելույթը կառուցողական, ռեալ իրողությունը ներկայացնող խոսք էր: Այսօր Աժ-ում լրագրողների հետ զրույցում այս մասին ասաց նախկին ոստիկանապետ Ալիկ Սարգսյանը:

«Ե՞րբ է ոստիկանությունը բացարձակ գովասանքի արժանացել կամ ե՞րբ է ոստիկանության գնահատականը միանշանակ գերազանց եղել: Նման բան ես երբևիցե չեմ հիշում: Ոստիկանությունն իր գործառույթներն իրականացնելիս, բնականաբար, պետք է նաև ունենա բացթողումներ՝ ոչ իր կամքից ելնելով: Ոստիկանության աշխատանքը շատ բարդ է և հարյուր տոկոսով իրագործել բոլոր գործառույթները հնարավոր չէ: Բնականաբար, նախագահն էլ ճիշտ ներկայացրեց թերությունները, ինչու ոչ նախազգուշացրեց, որ ոստիկանությունը հետագա գործունեության ընթացքում բացթողումները գոնե նվազագույնի հասցնի»,- նշեց նա:

Լրագրողների դիտարկմանը, որ երկրի ղեկավարի ելույթը կարծես նման էր ՀՀ ոստիկանապետ Վլադիմիր Գասպարյանի հրաժարականի նախապատրաստման, հանրապետական գործիչը չհամաձայնեց՝ նկատելով, որ նման տպավորություն չի ստացել, նման նախադրյալ այս պահին չի տեսնում:

Անդրադառնալով ՀՀ նախագահի ելույթի այն հատվածին, ուր խոսվում էր զենքի ապօրինի կիրառման պայքարի անարդյունավետության մասին, խորհրդարանականը նշեց, որ օրեր առաջ այդ մասին խոսել է նաև ինքը:

«Հանցագործությունների թվաքանակի աճն ինքնին խոսում է այն մասին, որ ժողովրդի ձեռքին զենք-զինամթերք կա: Դրա դեմ պետք է ավելի արդյունավետ պայքար տարվի: Այն զգուշավորությամբ, ինչով ոստիկանությանն այսօր ստիպում են չստուգել, սա մեծ աղմուկի առարկա կդառնա, և շատ ոստիկաններ կզրկվեն իրենց աշխատանքից: Ոստիկանությունը կամա թե ակամա որդեգրել է զգուշավորությունը՝ ամեն տեղ զենք-զինամթերք չփնտրելու:

Վերջին անգամ ե՞րբ եք տեսել, որ գիշերային ժամի ոստիկանությունը ստուգայցեր կազմակերպի զենք-զինամթերքի հայտնաբերման ուղղությամբ: Մոտեցումները փոխվել են: Հետո քաղաքի կենտրոնում կրակոցներ են լինում, ասում եք՝ մեքենայի բեռնախցիկում զենք է եղել: Հանցագործությունների դեմ պայքարելու լիազորություններ պետք է լինեն, այդ լիազորությունները պետք է ավելացվեն»,- ընդգծեց նախկին ոստիկանապետը՝ հավելելով, որ առաջիկայում փորձելու է այդ հարցի շուրջ քննարկումներ կազմակերպել:

Ալիկ Սարգսյանը համոզմունք հայտնեց՝ ոստիկանության լիազորությունները ոչ մի դեպքում չպետք է կրճատել, այն որևէ կառույցի չպետք է միացնել: Ինչ վերաբերում է ոստիկանների թվաքանակի կրճատմանը, ՀՀԿ խմբակցության պատգամավորը այս հարցով քննարկումներին դեմ չէ:

«Որպես նախկին ոստիկանապետ՝ մի քիչ նեղվում եմ, որ ոստիկանությանը փորձում են ամեն կերպ սահմանափակել: Հակառակը, պետք է այն ուժեղացնել: Ես գտնում եմ, որ ոստիկանության լիազորությունները էլ ավելի պետք է շատացվեն: Ուզո՞ւմ եք հանգիստ ապրեք, ուզո՞ւմ եք ցերեկով կրակոցներ չլինեն, թողեք ոստիկանությունը տեղը-տեղին իր գործառույթներն իրականացնի»,- կրկին շեշտեց նախկին ոստիկանապետը՝ սուր քննադատության չարժանացնելով ակցիաների ժամանակ ոստիկանների կողմից շարքային քաղաքացիներին ծեծի ենթարկելու պրակտիկան: