Իրանը պատրաստ է իր ռազմական ներկայությունը հաստատել Սիրիայում. իրանագետ
Եթե Իրանը Սիրիայի տարածքում ռազմաբազա ստեղծի, դրանից կուժեղանան երկուսն էլ, սակայն միանշանակ է, որ Իրանի օգուտն ավելի մեծ կլինի։ Այդ երկրի տարածաշրջանային ազդեցությունն ավելի կմեծանա։ Panorama.am-ի թղթակցի հետ զրույցում նման տեսակետ հայտնեց իրանագետ Արմեն Իսրայելյանը։
«Սիրիական հակամարտության ընթացքում Իրանը Սիրիայում ոչ բացահայտ ռազմական ներկայություն է ունեցել։ Իրանի աշխարհազորն ինչպես Լիբանանում, այնպես էլ Իրաքում և Սիրիայում մշտապես աջակցել է շիիական խմբավորումներին։ Ներկայումս էլ Սիրայում Իրանի իսլամական հեղափոխության պահապանների կորպուսի «Ղոդս» ուժերի հրամանատար Ղասեմ Սոլեյմանին անմիջականորեն համակարգում է տեղի շիիական ռազմական խմբավորումները։
Վերջիններս պայքարում են ահաբեկիչների դեմ։ Այս համատեքստում Իրանը և ֆիաննսական, և ռազմական աջակցություն է ցուցաբերում Սիրիային։ Ավելին, հայտարարում է, որ շարունակելու է այնքան աջակցություն ցուցաբերել, միչև երկիրն ամբողջովին ազատագրվի ԻՊ-ի ներկայությունից»,- նշեց իրանագետը։
Արմեն Իսրայելյանի խոսքով, եթե Սիրիայի տարածքում իրանական մշտական ռազմաբազա գործի, ակնհայտ է, որ Իրանի դերակատարությունը տարածաշրջանում զգալի կուժեղանա։ Սակայն դրանից միաժամանակ կշահի նաև Սիրիան։
«Ամեն դեպքում կարծում եմ, որ Սիրիայում Իրանը ռազմական ներկայություն կարող է ունենալ սիրիական հակամարտության ավարտից հետո։ Երբ քաղաքական բանակցություններն ավարտվեն և Սիրիայի կարգավիճակիը որոշվի, Իրանը գուցե որոշակի ռազմական տեխնիկա տեղակայի այդ երկրում՝ հետևելու Սիրիայում անվտանգային միջավայրի բարելավմանը։ Եվ ռազմական, և քաղաքական առումներով Իրանը պատրաստ է իր ներկայությունը հաստատելու Սիրիայում»,- ասաց իրանագետը։
Հիշեցնենք, որ «Բի-Բի-Սի» լրատվական գործակալության տվյալներով Իրանը Սիրիայում մշտական ռազմաբազա է կառուցում։ Իրանը ռազմական բազան ստեղծում է այն տարածքում, որը գտնվում է սիրիական բանակի հսկողության տակ, Դամասկոսից մոտ 14 կմ դեպի հարավ:
Գործակալության խնդրանքով արբանյակի կողմից արված լուսանկարները հաստատում են այս տարածքում կառուցման աշխատանքները։
Հարակից հրապարակումներ`
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին