ԿԸՀ-ն փաստում է, որ Պ. Հայրիկյանինը ոչ թե հացադուլ էր, այլ կեսժամյա այց
«Ազգային ինքնորոշում միավորում» կուսակցության նախագահ Պարույր Հայրիկյանը հայտարարել է հացադուլն ավարտելու և ԿԸՀ նախագահ Տիգրան Մուկուչյանի դեմ դատական հայց ներկայացնելու մասին: Panorama.am-ը ԿԸՀ նախագահ Տիգրան Մուկուչյանին դիմեց՝ հարցով՝ իրավական առումով որքանո՞վ է հիմնավորված այդ հայցը:
ԿԸՀ նախագահը նշեց, որ ԿԸՀ-ն Պարույր Հայրիկյանից ստացել էր դիմում, որը վերաբերում էր սահմանադրական բարեփոխումների ստորագրահավաք սկսելու նպատակով պաշտոնաթղթի օրինակներ տրամադրելուն: Դիմումատուն նաև առաջարկում էր, որպեսզի ներկայացվեին գործողությունների ցուցակ և ժամանակացույց: Դիմումը ԿԸՀ էր ներկայացվել նոյեմբերի 3-ին, դրա վերաբերյալ ԿԸՀ-ն մանրամասն պատասխան էր տվել:
ԿԸՀ-ից արձագանքել էին, որ նման ձևաթղթեր ընդհանրապես չեն կարող տրամադրվել՝ հաշվի առնելով այն հանգամանքը, որ քաղաքացիների նախաձեռնությամբ հանրաքվեի անցկացման ինստիտուտ չկա:
«Մենք սահմանադրական դրույթներին չէինք անդրադարձել, որովհետև յուրաքանչյուր պատասխան տրվում է այն դիմումի համատեքստում, ինչ որ ներկայացված է: Հետագայում ստացանք ևս մեկ գրություն, այն մի փոքր դժվար է դասական ատումով դիմում կոչել: Մենք այդ երկրորդ գրության հետ կապված ավելի մանրակրկիտ պարզաբանումներ տվեցինք, որովհետև ընկալելի դարձավ, որ վերջինս նկատի ունի Սահմանադրության մեջ ամրագրված իրավադրույթը»,- ասաց Մուկուչյանը՝ մանրամասնելով, որ Սահմանադրության 202 հոդվածում ուղղակի կար ձևակերպում, համաձայն որի՝ Սահմանադրություն ընդունելու կամ փոխելու նախաձեռնության իրավունք ունեն, ի թիվս մի շարք սուբյեկտների, նաև ընտրական իրավունք ունեցող 200 հազար քաղաքացի:
Նշված հոդվածը զետեղված է Սահմանադրության 15-րդ գլխում, իսկ Սահմանադրության «Եզրափակիչ կամ անցումային դրույթներ» գլխում զետեղված 209-րդ հոդվածն ուղղակիորեն սահմանում էր, որ Սահմանադրության՝ 12-15-րդ գլուխների հոդվածներն ուժի մեջ են մտնում հանրապետության նորընտիր նախագահի կողմից՝ իր պաշտոնի ստանձնման օրը, մինչ այդ շարունակում են գործել 2005 թվականի փոփոխություններով Սահմանադրության դրույթները:
«Կարծում եմ՝ շատ հստակ է ձևակերպումը, և որևէ տարակարծության հնարավորություն չի տալիս: 2005 թվականի սահմանադրության մեջ ուղղակի ամրագրված է՝ 8-րդ գլխի 111-րդ հոդվածում, որ Սահմանադրությունն ընդունում կամ նրանում փոփոխություններ կատարում են հանրաքվեի միջոցով Հանրապետության նախագահի կամ ԱԺ նախաձեռնությամբ: Իրավական առումով՝ կարծում եմ շատ հստակ է և որևէ տեղ անգամ չկա տարակարծության, տարամեկնաբանության»,- ասաց նա:
Մուկուչյանի խոսքով՝ երրորդ անգամ ԿԸՀ-ին փոխանցված փաստաթղթերը միջազգային կոնվենցիաներից դրույթներ էին՝ լուսապատճենված, որոնց ԿԸՀ-ն ծանոթ է, ուստի դրանց փոխանցման անհրաժեշտությունը չկար: Ըստ ԿԸՀ նախագահի՝ դրանք սույն վեճի հետ անգամ փոքրիկ առնչություն չունեին:
Մուկուչյանը համոզված է՝ որևէ մեկի իրավունքների սահմանափակման մասին խոսք լինել չի կարող. եթե չկա որևէ իրավունք, այդ իրավունքը որոշ ժամանակ հետո է միայն ի հայտ գալու, այսօր չի կարելի խոսել այն մասին, որ ինչ-որ մեկը ոտնահարել է գոյություն չունեցող իրավունքը, դա աբսուրդների շարքից է:
«Ես չգիտեմ՝ դա ոչ հետևողական աշխատանքի արդյու՞նք է արդյոք, սակայն տեղեկատվական աղբյուրներից արդեն որերորդ անգամ լսում ենք՝ այսօր դադարեցվել է ԿԸՀ առջև 5 օր տևած հացադուլը: Մեկ անգամ ևս ուզում եմ հստակեցնել, որ վերջին հինգ օրերի ընթացքում յուրաքանչյուր օր պարոն Հայրիկյանն ընդամենը ոչ ավել, քան կես ժամով այցելել է ԿԸՀ՝ մի քանի համախոհների հետ, հանձնել իր դիմումը, հանդիպել կամ իր խոսքը փոխանցել ներկա գտնված ԶԼՄ-ներին և հեռացել, այսինքն՝ ԿԸՀ դիմաց դասական պատկերացմամբ հացադուլ չի էլ եղել, որ պետք է դադարեցվեր»,- ասաց նա: