Հայաստանում առողջապահական ծառայությունների հասանելիության ոլորտում բազմաթիվ խոչընդոտներ կան
Հայաստանում առողջապահական ծառայությունների հասանելիության բազմաթիվ խոչընդոտներ կան: Այս մասին այսօր «Մեդիա կենտրոնում» լրագրողների հետ հանդիպման ժամանակ ասաց «Իրավունքի զարգացման կենտրոն» ՀԿ նախագահ Վիոլետա Զոփունյանը:
Նրա խոսքով՝ բուժծառայությունները պետք է հասանելի լինեն բնակչության տարբեր խմբերի համար և որևէ խտրականություն չպետք է դրվի, սակայն մեր երկրում այդպես չէ: «Բացի առողջության մատչելիության և հասանելիության ֆինանսական բաղադրիչից, շատ կարևոր է տարածքային մատչելիությունն ու հասանելիությունը: Եթե մենք խոսում ենք ընդհանրապես բժշկական ծառայությունների մասին, ապա դրանք նույն որակով պետք է հասանելի լինեն թե Երևանում, թե մարզերում: Սա ոչ թե վերացական գաղափար է, այլ պարզապես իրավական ակտերում ամրագրված հիմնարար իրավունք: Ուստի պետք է այս մասին ևս մեկ անգամ հիշեցնել պաշտոնյաներին»,- ասաց նա:
«Հյումն Րայթս Հաուս»-ի ներկայացուցիչ Հովհաննես Մադոյանն անդրադառնալով Հայաստանում առողջապահության համընդհանուր հասանելիության ոլորտում առկա խոչընդոտներին, նշեց, որ դրանք առաջին հերթին ֆինանսական խոչընդոտներն են: «Կառավարությունը, ցավոք սրտի, չի էլ փորձում կատարել այն օպտիմալ պարտավորությունները, որոնք մեր երկրի նման տնտեսություն ունեցող երկրները կատարում են, որպեսզի առողջապահությունը լինի քիչ թե շատ տանելի մակարդակի վրա»,- ասաց նա:
Ըստ Հովհաննես Մադոյանի՝ Հայաստանի առողջապահական համակարգի կառուցվածքային մարտահրավերներից մեկը առողջապահության ոլորտին հատկացված պետական ծախսերի ցածր մակարդակն է՝ ՀՆԱ-ի 2%-ից ցածր։ «ՀՆԱ-ի 4-5 տոկոս ծախսերը պետք է ուղղել առողջապահության ոլորտին, մինչդեռ Հայաստանում դա կազմում է 2 տոկոս, իսկ Կառավարության միջնաժամկետ ծախսերի ծրագրով նախատեսվում է նվազեցնել 1,8 տոկոսի: Այսինքն պետությունը ռեգրեսիվ է կատարում իր պարտավորությունը: Դրա համար առաջանում են բազմաթիվ խնդիրներ»,- նշեց նա:
Նրա խոսքով՝ Հայաստանում 1 մլն-ից ավելի մարդ, ըստ պաշտոնական տվյալների, ապրում են աղքատության շեմից ցածր մակարդակում, իսկ սա նշանակում է, որ նրանք զրկված են առողջապահության մատչելիությունից:
Երկրորդ խոչընդոտն, ըստ նրա, խտրականությունն է: Հովհաննես Մադոյանն ասաց, որ խտրական վերաբերմունքը իրենց վրա հատկապես զգում են ՄԻԱՎ-ով հիվանդ մարդիկ:
Հարցին, թե արդյոք բժշկական պարտադիր ապահովագրությունից հետո իրավիճակը կփոխվի, Վիոլետա Զոփունյանն ասաց՝ դեռ վաղ է այդ մասին խոսել: «Հատկապես ֆինանսական մատչելիության ապահովման առումով խնդիրներն առաջանում են ճիշտ բաշխման մասով: Օրինակ, եթե նոյեմբերից ուզում ես պետպատվերով բուժում ստանալ, ապա պատասխանը միանշանակ նույն է՝ գումար չկա և ծառայություն չեն կարող մատուցել: Այսինքն՝ պարզ չէ, թե ներդրումից հետո այս խնդիրն ինչպես կլուծվի»,- ընդգծեց նա:
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ