Ձեր վստահելի աղբյուրը

Հայ հասարակությունն ավելի ուշադիր է դարձել իր առողջության նկատմամբ: Դեկտեմբերի 12-ին լրագրողների հետ հանդիպմանը նման կարծիք հայտնեց Հայ-ամերիկյան առողջության կենտրոնի տնօրեն Խաչանուշ Հակոբյանը: Նա նշեց, որ իրենց կենտրոնի այցելուների մեկ երրորդը երիտասարդ է: Հակոբյանը հիշեցրեց, որ ավելի հեշտ է հիվանդությունները կանխարգելել, քան բուժել, ուստի անհրաժեշտ է պրոֆիլակտիկ զննումներ անցնել:

«Լուրջ գործիքային զննությամբ են հիվանդությունները բացահայտվում, պետք է ժամանակ առ ժամանակ գնալ բժիշկի: Մենք ախտորոշումից բացի նաև բուժում ենք: Այս տարիների ընթացքում մոտ 530 000 այցելու ենք ունեցել, 7500 կնոջ կյանք ենք փրկել»,- ասաց նա:

Հակոբյանի խոսքով՝ երբ իրենց կենտրոնը նոր էր հիմնադրվել, այցելուների թիվը 10-ը չէր գերազանցում, այժմ օրվա մեջ մոտ 200 այցելու են ունենում: Կենտրոնի տնօրենի գնահատմամբ՝ սա վկայում է այն մասին, որ քաղաքացիների գիտակցությունն է ավելացել և վստահությունը բժիշկների հանդեպ: Կենտրոն դիմողների 40 տոկոսը գյուղական վայրերից են: Հակոբյանը տեղեկացրեց, որ տղամարդիկ ևս ունենում են կրծքագեղձի քաղցկեղ, ուստի գոյացություն շոշափելիս նրանք ևս պետք է անհապաղ դիմեն բժիշկի:

Հայ-ամերիկյան առողջության կենտրոնի ճառագայթային ախտորոշման բաժանմունքի վարիչ Հովհաննես Վարդևանյանը նշեց, որ հիվանդացության առումով Հայաստանի և միջազգային ցուցանիշները գործնականում համընկնում են: Նրա խոսքով՝ բոլոր վնասակար գործոնները, որոնք հայտնի են, ունեն իրենց վնասակար ազդեցությունը օրգանիզմի վրա:

«Կրծքագեղձի և վահանաձև գեղձի քաղցկեղների դեպքում պատճառները շատ են ՝առողջ ապրելակերպի բացակայությունից սթրեսներ, ժառանգական գործոն: Տվյալ պարագայում միանշանակ կարող ենք նշել, որ անգամ 25 և ավելի երիտասարդ տարիքում հայտնաբերվում է քաղցկեղ: Պրոֆիլակտիկ այցը բժիշկին՝ քաղցկեղի հայտնաբերման և բուժման առաջին գործոնն է»,- ասաց նա:

Վարդևանյանը նշեց, որ ավելացել է վահանաձև գեղձի հայտնաբերելիությունը՝ նորագույն սարքավորումների շնորհիվ: Նախնական փուլում հայտնաբերման դեպքում, ըստ բժիշկի, գործնականում հնարավոր է հասնել բացարձակ արդյունքի. տվյալ պացիենտը հասարակություն է վերադառնում լիարժեք բուժված, պարզապես պետք է ժամանակին դիմել բժիշկի և անցնել սոնոգրաֆիկ հետազոտություն:

Հայ-ամերիկյան առողջության կենտրոնի գինեկոլոգիայի բաժանմունքի վարիչ Մարինա Ոսկանյանը նշեց, որ կրծքագեղձի քաղցկեղից հետո հիվանդացության թվով երկրորդը արգանդի պարանոցի քաղցկեղն է, որի դեպքում բոլոր հնարավորությունները կան ռիսկերը զրոյացնելու: Դրա համար անհրաժեշտ է գնալ պրոֆիլակտիկ ստուգման:

«Հետազոտությունը կատարվում է ընդամենը 5000 դրամով: Սեռական կյանք սկսելուց հետո այդ հետազոտությունը պարտադիր է: Կան կանայք, որ մահանում են այս հիվանդությունից, չնայած սա «լավ» քաղցկեղներից է, այսինքն՝ մի օրգան է, որ բավական հեշտ կարելի է հետազոտել: Այս քսուքը թույլ է տալիս անգամ զրոյական փուլում ախտորոշել հիվանդությունը»,- ասաց նա:

Ոսկանյանի խոսքով՝ տարին մեկ կամ երկու տարին մեկ ստուգվող կանայք արգանդի պարանոցի քաղցկեղ չեն ունենում, նախաքաղցկեղը 100 տոկոսով հնարավոր է բուժել: Նա նշեց, որ սա վերականգնողական տարիքի կանանց հիվանդություն է: