Տեղեկատվությունն ամբողջությամբ մտացածին է. Դատախազության պարզաբանումը
ՀՀ գլխավոր դատախազությունից պարզաբանում են տարածել «Թուֆենկյան» հյուրանոցի մոտ տեղի ունեցած սպանության մեջ մեղադրվողներին ՀՀ–ին չհանձնելու լուրերի մասին։
Պարզաբանման մեջ ասված է. «Այսօր զանգվածային լրատվամիջոցներում տարածվել են տեղեկություններ, թե իբր Վրաստանի իրավապահ մարմինները հայկական կողմին չեն հանձնում «Թուֆենկյան» հյուրանոցի մոտ տեղի ունեցած սպանության կատարման մեջ մեղադրվող ՀՀ երկու քաղաքացիներին, ինչի պատճառով հարուցված քրեական գործի շրջանակներում իրավապահ մարմինները հայտնվել են փակուղում:
Տեղեկատվությունն ամբողջությամբ մտացածին է: Նախ՝ հենց հատկապես Հայաստանի Հանրապետության և Վրաստանի Հանրապետության իրավապահ մարմինների միջև սերտ, համագործակցված աշխատանքի արդյունքում են այդ անձինք հայտաբերվել և կալանավորվել հարևան երկրի տարածքում:
Երկրորդ՝ վերոնշյալ անձանց քրեական հետապնդման ենթարկելու նպատակով ՀՀ իրավասու մարմիններին հանձնելու վերաբերյալ ՀՀ դատախազության կողմից միջնորդությունը վրացական կողմին սահմանված կարգով ներկայացվելուց սկսած՝ Էքստրադիցիոն ընթացակարգերը լիարժեքորեն պահպանվում են: Գործընթացը թույլատրելի և նախատեսված ժամկետների սահմաններում է: Այս պահին էլ երկու երկրների դատախազությունները, գտնվելով ակտիվ աշխատանքային շփումներում, իրականացնում են հանձնման գործընթացի կազմակերպման համար անհրաժեշտ բոլոր միջոցառումները»:
Հարակից հրապարակումներ`
- Թուֆենկյանի մոտ տեղի ունեցած սպանության գործով հետախուզվողները հայտնաբերվել են
- Վերնիսաժի մոտ տեղի ունեցած սպանության գործով մեղադրանք է առաջադրվել
- Վերնիսաժի մոտ տեղի ունեցած սպանության մեջ կասկածվողները փախել են Վրաստան. «Փաստ»
- Նոր մանրամասներ Վերնիսաժի սպանության գործից