Ձեր վստահելի աղբյուրը

Երևանի պետական համալսարանում դեկտեմբերի 18-ին տեղի ունեցավ խոհրդաժողով՝ ՄԱԿ-ի ԱԽ Կանանց, խաղաղությանը և անվտանգությանը նվիրված 1325 բանաձևի կիրառման մասին: ՆԱՏՕ-ի գլխավոր քարտուղարի տեղակալ Ռոզ Գոթեմոլերը կարևորեց գիտաժողովին նաև քաղհասարակության ներկայությունը, որ գնահատեց իբրև օրակարգն առաջ տանելու կարևոր գործոն: Նա գենդերային հավասարությունը կարևորեց բոլոր ոլորտներում, ընդգծեց՝ դա կարևոր է պատասխանատվության բարձրացումից մինչև ԶՈՒ մարտունակության ավելացում:

«Ես միշտ իմ երիտասարդ գործընկերներին խորհուրդ եմ տալիս՝ խոսեք հստակ, վստահությամբ, ներողություն մի խնդրեք, և եթե ինչ-որ մեկը ձեզ վերաբերվի որպես ոչ խելացիի, հստակ աչքերի մեջ նայեք, ու վստահ կրկնեք ձեր ասածը: Եթե անգամ նա միանգամից չհասկանա, բայց գոնե ուրիշներին՝ սենյակում գտնվողներին, կհամոզեք, որ գիտեք՝ ինչի մասին եք խոսում»,- ասաց նա:

Գոթեմոլերը կանանց խորհուրդ տվեց ռիսկի գնալ կարիերայում. եթե հնարավորություն լինի դասընթացի մասնակցելու, որպեսզի մասնագիտական որակներ, ցուցանիշներ բարելավեն, չնայած դժվարություններին, թող գնան՝ չնայած դժվարություններին: ՆԱՏՕ-ի գլխավոր քարտուղարի տեղակալը կոչ արեց չվախենալ մարտահրավերներից:

«Պետք է ինքդ քեզ ձեռնոց նետելով՝ բարդ խնդիրներ լուծել, զուգընկերոջը պետք է խնդրել՝ օգնի: Գիտեմ, որ հեշտ չէ, բայց իմ կարիերայում էլ է եղել, երբ մարդիկ մտածել են՝ ես լավ մասնագետ չեմ, չգիտեմ՝ ինչի մասին եմ խոսում, բայց ստիպված եմ եղել հաղթահարել»,- ասաց նա:

ՀՀ արտաքին գործերի նախարարության Միջազգային կազմակերպությունների վարչության պետ Վահրամ Կաժոյանը նշեց՝ իրականում կանայք ավելի դիմացկուն են, համառ են իրենց նպատակների իրականացման հարցում, սակայն մեզանում դա կարծես ստվերված է եղել: Ըստ Կաժոյանի՝ խնդիրը միայն Հայաստանում չէ. ՄԱԿ-ի 1325 բանաձևն ընդունեց այն ժամանակ, երբ աշխարհում եկավ այդ ըմբռնողությունը, որ առանց կանանց և տղամարդկանց իրավահավասարությունն ապահովելու՝ ամեն ինչ չի կարող առաջ շարժվել:

Նրա խոսքով՝ այդ ժամանակ հասկացան, որ կանանց հավասար ներգրավվածությունը կարող է մի շարք խնդիրների լուծման գրավական լինել, առավել ևս՝ ինչ վերաբերում է խաղաղության ապահովման միջհամայնքային, միջազգային փոխըմբռնման խնդիրներին, կանայք շատ ավելի արդյունավետ կարող են լինել բանակցային գործընթացներում, հենց այդ ժամանակ էր, որ անվտանգության խորհրդի երկար ամիսներ բանակցելուց հետո 2000 թ կարողացավ այս բանաձևն ընդունել և սկիզբ դրեց այս ամբողջ գործընթացին:

Կաժոյանը ղեկավարում է ՀՀ վարչապետի հրամանագրով ստեղծված միջգերատեսչական հանձնաժողովը, որի կազմում ներգրավված են պետական բոլոր այն կառույցները, որոնք այս կամ այն ձևով առնչվում են գենդերային հավասարության խնդիրներին, հատկապես՝ ուժային կառույցների ներկայացուցիչներ: Կաժոյանը նշեց՝ քանի որ իրենց վարչության գործառույթների մեջ են մտնում նաև գենդերային հավասարության խնդիրները, ինքնաբերաբար համակարգումը դրվել է իրենց վարչության վրա, բայց բնական է՝ իրենք միայնակ, առանց գործընկերների, չէին կարողանա այդ գործը միայնակ անել:

«Մենք ունենք հստակ գիտակցում, որ առաջին քայլերից հետո կմշակվի գործողությունների ծրագիրը, դրա վրա կսկսեն աշխատել ՀԿ-ները, որովհետև առանց նրանց ներգրավման, ովքեր այս բնագավառում երկար տարիների աշխատանքի փորձ ունեն, անհնար կլինի լիարժեք պատկերն ունենալ: Մենք մի կարևոր քայլ արեցինք՝ իրականացման հաշվետվություններ, Հայաստանը այս բանաձևի իրականացման շրջանակներում զեկույց պատրաստեց, որտեղ ներկայացված էին այն բոլոր քայլերը, որ մեր երկրի տարբեր ներկայացուցիչներ իրականացնում էին կանանց ներգրավվածության ապահովման ուղղությամբ»,- ասաց նա:

Կաժոյանը նշեց, որ զեկույցը տրամադրվել է բոլոր միջազգային կազմակերպություններին՝ ՄԱԿ-ին, ՆԱՏՕ-ին, ԵԽ-ին, ԵԱՀԿ-ին, Նյու-Յորքում այն տարածվել է իբրև ՄԱԿ-ի գլխավոր ասամբլեայի և անվտանգության խորհրդի գլխավոր փաստաթուղթ: Այն, ըստ ԱԳՆ ներկայացուցչի, շատ բարձր գնահատական է ստացել ՀՀ միջազգային գործընկերների կողմից: