Ձեր վստահելի աղբյուրը

«ՀՀ կառավարության ծրագրի համաձայն՝ խոշորացման գործընթացն ավարտվելու է 2019 թվականին: Արդյունքում համայնքների թիվը մոտավոր հաշվարկով կլինի 120-140»,-Panorama.am-ի հետ զրույցում ասաց ՀՀ տարածքային կառավարման և զարգացման նախարարության աշխատակազմի տեղական ինքնակառավարման վարչության տեղական ինքնակառավարման հարցերի համակարգման բաժնի պետ Կարեն Բակոյանը:

Հիշեցնենք, որ անցնող տարում՝ նոյեմբերի 5-ին տեղի ունեցած ՏԻՄ ընտրությունների արդյունքում  34 փնջերում ընդգրկվել է թվով 325 համայնք: Բակոյանի խոսքով, վերջին խոշորացումից հետո Հայաստանում կա  502 վարչատարածքային միավոր:

«Առաջիկայում խոշորացվելու են 8 մարզերի (բացի Սյունիքի և Վայոց ձորի) դեռևս չխոշորացված համայնքները: Փնջերի կազմը դեռևս քննարկման փուլում է. մշակված նախագիծ չկա»,-ասաց բաժնի պետը:

Խոշորացումը բացասաբար է անդրադարձել տեղական ինքնակառավարման մարմիններում կանանց ներկայացվածության վրա: Այսպես, մինչ խոշորացումը  2016-ի տվյալներով Հայաստանի 793 համայնքներից 17-ը կանայք էին ղեկավարում, նոյեմբերի 5-ից հետո 502 համայնքներից միայն 7-ի ղեկավարներն են կանայք: Կանանաց թիվը նվազել է նաև ավագանիների կազմում: Այսպես, ավագանու 983 թեկնածուներից  49-ը կանայք էին, նրանցից 24-ն են ընտրվել:

Հարցին, թե նախարարությունն ինչ քայլեր է պատրաստվում իրականացնել ՏԻՄ ընտրություններում կանանց մասնակցության խթանման համար, Բակոյանը պատասխանեց.

«Բացատրական և կազմակերպչական: Այդ ուղղությամբ ավելի արմատական փոփոխություններ ակնկալվում է իրականացնել ավագանու՝ համամասնական ընտրակարգով ձևավորմանն անցման ընթացքում, ինչը նախատեսվում է խոշորացման գործընթացի ավարտից հետո»: