Ձեր վստահելի աղբյուրը

Ադրբեջանը փոփոխել է Եվրոպայի խորհրդի խորհրդարանական վեհաժողովում իր պատվիրակության կազմը: Պատվիրակությունից հեռացվել են Էլհան Սուլեյմանովը, Մուսլում Մամմադովն ու Էլշան Մուսաևը, որոնց փոխարեն ընդգրկվել են Ուլվիյա Ագաևան, Էլշադ Հասանովն ու Ասիմ Մոլազադան:

Պրոցեդուրալ առումով պատվիրակության կազմի փոփոխությունը տարեսկզբին նորմալ երևույթ է, սակայն առավել հետաքրքիր է պատվիրակությունից այս անձանց հեռացնելը, որը կարելի է դիտարկել որպես Ադրբեջանի կողմից փորձ՝ մաքրել ԵԽԽՎ-ում կոռուպցիոն հետքերը:

Ինչպես հայտնի է, Էլհան Սուլեյմանովի ու Մուսլուն Մամմադովի անունները կապված են ԵԽԽՎ-ում տարածված կոռուպցիոն սկանդալների, «Խավիարային դիվանագիտության» հետ: Սուլեյմանովն էր ԵԽԽՎ նախկին պատգամավոր Լուկա Վոլոնտեին փոխանցել 2.39մլն եվրո, ինչը խոստովանել էր Վոլոնտեն:

Ինչ վերաբերում է Մուսլուն Մամմադովին, ապա վերջինս երկար տարիներ աշխատում էր որպես Ադրբեջանի լոբբիստ, ով «բաց չէր թողնում» ԵԽԽՎ ոչ մի նստաշրջան: Մամմադովի անունը ևս կապված է Վոլոնտեի «գործի» հետ: Վոլոնտեն Ադրբեջանի իմիջը բարձրացնելու, Ադրբեջանում մարդու իրավունքների վիճակի շուրջ ԵԽԽՎ-ում քննադատությունները մեղմելու համար կապի մեջ է եղել ոչ միայն Սուլեյմանովի, այլ նաև Մամմադովի հետ:

Դեռևս 2012թ.-ի դեկտեմբերին, ԵԽԽՎ-ում Ադրբեջանի քաղբանտարկյալների վերաբերյալ գերմանացի պատգամավոր Շտրասերի զեկույցի քվեարկությունից շաբաթներ առաջ, Վոլոնտեն նամակ է գրել այդ ժամանակ ԵԽԽՎ լոբբիստ Մամմադովին՝ մանրամասնելով, թե ԵԽԽՎ-ում որ «ընկերները» կարող են աջակցել իրենց՝ Շտրասերի զեկույցը տապալելու հարցում, ինչն էլ իրականություն դարձավ:

Կարող ենք ասել, որ Մամմադովը կապված է նաև ԵԽԽՎ-ում  բրիտանացի պատգամավոր Ռոբերտ Ուոլտերին կաշառելու հետ, ով «Բռնության աճը Լեռնային Ղարաբաղում և Ադրբեջանի այլ օկուպացված տարածքներում» տապալված զեկույցի հեղինակն էր: Զեկույցի նախապատրաստական ու քննարկման շրջանում Մամմադովը բացահայտ «բանակցություններ» էր վարում Ուոլտերի հետ ԵԽ կենտրոնակայանի միջանցքներում:

«Լավ աշխատանքի» շնորհիվ՝ Ադրբեջանում 2015թ.-ի նոյեմբերին կայացած խորհրդարանական ընտրություններում Մուսլում Մամմադովը դարձավ պատգամավոր ու 2016թ.-ի հունվարից ընդգրկվեց ԵԽԽՎ-ում Ադրբեջանի պատվիրակության կազմում՝ արդեն պաշտոնապես գործունեություն ծավալելու համար, ինչը, փաստորեն, երկար չտևեց:

Եթե մինչ 2017թ.-ը ԵԽԽՎ-ում կոռուպցիայի ու Ադրբեջանի կողմից պատգամավորին կաշառելու մասին բարձրաձայնում էին միայն ԵԽԽՎ-ում ՀՀ պատվիրակության անդամները, ապա Միլանի դատախազության կողմից Վոլոնտեին փոխանցված գումարների պատճառով գործ հարուցելուց հետո այն արդեն հայտնվեց Եվրոպայի խորհրդի ու ԵԽԽՎ-ի առաջնային օրակարգում: ԵԽԽՎ-ում ստեղծվեց արտաքին հետաքննության մարմին՝ ԵԽԽՎ-ում պատգամավորների շրջանում կոռուպցիոն պնդումներն ուսումնասիրելու համար։ Մարմինը գաղտնիության պայմաններում կգործի մինչև 2018թ.-ի ապրիլ, որից հետո այն իր բացահայտումներն ու պատրաստած զեկույցը կներկայացնի Վեհաժողովին: