Ձեր վստահելի աղբյուրը

Հայաստանյան շուկայում լայն տարածում ունեցող 10 արտադրողի թթվասեր փորձաքննության է ենթարկվել: «Հետք»-ը գրում է՝ դրանցից  միայն 3-ն են համապատասխանել սահմանված նորմերին։ Մնացած 7-ի մեջ հայտնաբերվել են աղիքային ցուպիկ, հակաբիոտիկ, բուսական յուղ և խմորասնկերի բարձր քանակ։

Սննդամթերքի անվտանգության ոլորտում վերահսկողություն իրականացնող պետական մարմինը մինչ այս պահը լուռ է: ՍԱՊԾ պաշտոնական հրապարակման վերաբերյալ մեկնաբանություն չկա:

Panorama.am-ի հետ զրույցում «Իրազեկ և պաշտպանված սպառող» ՀԿ նախագահ Բաբկեն Պիպոյանն ասում է՝  հավատում է փորձաքննության արդյունքներին: «Դրանք կասկածի տակ առնելու հիմքեր չունենք, քանի որ հանրային վերահսկողության շրջանակում կատարված փորձաքննություններից հետո մինչ օրս որևէ մեկը, որևէ տնտեսվարող չի փորձել դատական կարգով բողոքարկել դրանք: Քանի դեռ որևէ մեկը փաստացի չի ապացուցել, որ իր հանդեպ կա միտումնավոր պատվեր, զրպարտիչ հայտարարություն, որևէ մեկը դատարանով չի ապացուցել իր անմեղությունը,  մենք չենք կարող այդ արդյունքները կասկածի տակ առնել»,-բացատրում է նա:

Նշենք, որ «Հետք»-ի փոխանցմամբ, փորձաքննությունն իրականացվել է «Ստանդարտ դիալոգ» լաբորատորիայում:

Պիպոյանը ցավ է հայտնում, որ նոր տարում առաջին խախտումները բացահայտվեցին ու բարձրաձայնվեցին հանրային հսկողության արդյունքում, իսկ փորձաքննության արդյունքները խոսում են այն մասին, որ ոլորտում որևէ առաջընթաց չի գրանցվել:

«2016-ի դեկտեմբերի վերջին, երբ մեր կազմակերպությունն իրականացրեց մոնիտորինգ թթվասերի ու կաթնաշոռի շուկայում, նմանատիպ խախտումներ այն ժամանակ էլ կային: Ավելի քան մեկ տարի անց, խախտումները կրկնվում են: Սա պետք է ահազանգ լինի, որպեսզի լիազոր մարմինը վերանայի վերահսկողության մեխանիզմները, իր կողմից ընտրված քաղաքականությունն ու մեթոդաբանությունը, քանի որ ևս մեկ անգամ ապացուցվեց, որ նման գործիքակազմով ու մեթոդաբանությամբ իրական արդյունքներ հնարավոր չէ ձևակերպել»,-կարծիք է հայտնում ՀԿ նախագահը:

Հայտնաբերված խախտումներից առավել մտահոգիչ նա համարում է անտիբիոտիկների մնացորդների առկայությունը թթվասերում:

«Եթե մանրէաբանական խնդիրները կարող էին ի հայտ գալ իրացման ցանցում կամ այնտեղ տեղափոխելիս, ապա հակաբիոտիկներն ու բուսայուղի առկայությունը, ինչը խոսում է մթերքի կեղծված լինելու մասին, արտադրության փուլում են եղել»,-բացատրում է նա՝ միաժամանակ չբացառելով, որ մանրէաբանական խնդիրները, մասնավորապես աղիքային ցուպիկը կաթնամթերքում հայտնվել է արտադրողի մոտ:

Պիպոյանը նկատում է, որ մանրէաբանական խնդիրները կարող են փորձաքննության ենթարկված խմբաքանակում լինել, հաջորդում չլինել, ինչ վերաբերում է անտիբիոտիկներին ու բուսական յուղին, ապա այստեղ հատկապես մեծ ուշադրության անհրաժեշտություն կա:

«Հետք»-ը գրել էր, որ հրապարակման պահին փորձաքննված խմբաքանակն այլևս առկա չէ. թթվասերի պահպանման ժամկետը 6-10 օր է։

Պիպոյանի խոսքով, պետական վերահսկողության մարմինը պետք է դասեր քաղի սխալներից, որպեսզի ժամանակի ընթացքում ոչ թե անընդհատ փաստեն սխալները, այլ արձանագրեն իրական աճեր: