Ձեր վստահելի աղբյուրը

Մյունխենի անվտանգության համաժողովը վերջին շրջանում հանդիսանում է այն հարթակներից մեկը, որտեղ տարբեր երկրների քաղաքական ղեկավարությունները ներկայացնում են սեփական պատկերացումներն իրենց երկրների անվտանգային քաղաքականության վերաբերյալ: Համաժողովը ներկայանում է որպես հարթակ, ուր ոչ միայն հանդիպումներ են տեղի ունենում, այլ նաև ելույթների շնորհիվ կարելի է ներկայացնել վերլուծություն այն գերակա ուղղությունների վերաբերյալ, որ ունեն այս կամ այն պետություններն իրենց արտաքին քաղաքական օրակարգում: Panorama.am-ի թղթակցի հետ զրույցում նման տեսակետ հայտնեց քաղաքագետ Ալեքսանդր Մարկարովը՝ անդրադառնալով ՀՀ նախագահ Սերժ Սարգսյանի՝ երեկ Մյունխենի անվտանգության համաժողովում ունեցած ելույթին:

Քաղաքագետի խոսքով, ՀՀ նախագահի երեկվա ելույթը հստակ ցույց տվեց, որ մեր երկիրը հաջողությամբ կարող է համագործակցել ինչպես եվրոպական, այնպես էլ եվրասիական ուղղությունների հետ:

«Համաժողովում ՀՀ առաջնորդի ելույթը կարելի է դիտարկել տվյալ պրիզմայում: Մենք տեսանք համապատախան հետևողականություն այն դիրքորոշումներում, որոնք ներկայացված են մեր երկրի արտաքին գերակա ուղղությունների մեջ: Դրանցից մեկը Հայաստանի մասնակցությունն է ինտեգրացիոն տարբեր նախագծերին և պատրաստակամությունը՝ համագործակցություն իրականացնել տարբեր բևեռների հետ:

Այս տեսակի համագործակցությունները փոխշահավետ է ոչ միայն անմիջական մասնակիցների, այլ նաև երրորդ կողմի համար: Հայաստանը ցույց է տալիս, որ նույնսիկ այն պարագայում, երբ տարբեր բևեռների միջև առկա է որոշակի առճակատում, ինքն ի վիճակի է քաղաքականություն իրականացնել ՝ հաշվի առնելով սեփական շահերը և արտաքին դերակատարների հետաքրքրությունները»,- նշեց մեր զրուցակիցը:

Անդրադառնալով ՀՀ նախագահի ելույթի՝ ղարաբաղյան հիմնահարցի կարգավորման վերաբերյալ հատվածին՝ Ալեքսանդր Մարկարովն ընդգծեց, որ Ադրբեջանի ռազմատենչ հայտարարությունների ֆոնին բանակցային գործընթացն անհնար է հասցնել իր տրամաբանական խաղաղ ավարտին:

«Խոսքը գնում է այն մասին, որ անհրաժեշտ է վերադառնալ իրականություն և բանակցային սեղանի շուրջ հասնել նրան, ինչին ձգտում են կողմերը՝ խաղաղության, որը լինելու է երկարատև և նպաստելու է տարածաշրջանային զարգացմանը»,- նշեց քաղաքագետը:

Ինչ վերաբերում է իր ելույթում հայ-թուրքական արձանագրություններին Սերժ Սարգսյանի կատարած անդրադարձին, Մարկարովի համոզմամբ, հատկանշական էր հատկապես կատարված համեմատությունը՝ Բեռլինի պատի անկումից շուրջ երեսուն տարի անց Թուրքիան շարունակում է փակ պահել Հայաստանի հետ սահմանը: 
«Ըստ էության՝ Թուրքիան այսօր հիշեցնում է Սառը պատերազմի վատ օրինակները, երբ աշխարհը բաժանվում էր երկու մասերի: Թուրքիայի դիրքորոշումը տվյալ պարագայում չի բխում անվտանգային դրույթներից, այլ ընդամենը պայմանավորված է իր իսկ կողմից խեղաթյուրված պատմական պատկերացումներով և Ադրբեջանի հետ ունեցած փոխհարաբերություններով: Հայաստանն իր հերթին չի պատրաստվում հետևել այն փաստաթղթին, որը նախաստորագրված է Շվեյցարիայում: Եթե հայ-թուրքական հարաբերությունների նոր էջ է լինելու, ապա արդեն լինելու է այլ փաստաթղթի հիման վրա: Հայաստանը երբեք չի ընդունել վերջնագրերի և նախապայմանների մոտեցումը»,- ամփոփեց քաղաքագետը: