Պայթյունի հետքերով. Այդ բնակարանում մարդիկ չեն ապրել
Վրացական փողոցի թիվ 10 շենքի 4-րդ մուտքում պայթյունը տեղի է ունեցել առաջին հարկի բնակարաններից մեկում: Բնակիչների կարծիքով, հավանական պատճառը գազի արտահոսքն է եղել:
«Այնտեղ մարդ չի ապրում, վերանորոգման աշխատանքներն են իրականացվում»,-Panorama.am-ի հետ զրույցում պատմեց շենքի բնակիչներից Սարո Ծատուրյանը:
Նրա խոսքով, ինքն աշխատանքից 5:05 է վերադարձել, հասել է իր բնակարան ու պայթյունի ձայնը լսել: Առաջինն է հասել դեպքի վայր, ահազանգել է 911: Ներս է մտել, ճշտելու՝ արդյո՞ք տուժած կա: Բարեբախտաբար, պայթյունի հետևանքով զոհեր ու վիրավորներ չկան:
Վնասվել են բնակարաններ ու բակում կայանած ավելի քան մեկ տասնյակ մեքենաներ:
«Տան դռները թռել են, խայտառակ վիճակ է: Հարևան բնակարանների ապակիներն են վնասվել»,-ասաց նա:
ԱԻՆ-ից մանրամասնում են, որ պայթյունի հետևանքով փլուզվել են բնակարանի պատշգամբն՝ ամբողջությամբ (մոտ 12 քմ), ամբողջությամբ վնասվել են միջնապատերը, մեկ արտաքին պատ, հյուրասենյակի առաստաղը, թեքվել է մեկ հենասյուն, պոկվել մուտքի դուռը և ամբողջությամբ վնասվել պատուհանները:
Վնասվել է առաջին հարկում գտնվող թիվ 43 բնակարանի մուտքի դուռը, միջնապատերին առաջացել են ճաքեր՝ մոտ 2 քմ, 2-րդ հարկում գտնվող թիվ 45 բնակարանի պատուհանները և մուտքի դուռը, թիվ 46 բնակարանի միջնապատերը՝ մասամբ, վնասվել՝ հյուրասենյակի առաստաղը, թիվ 47 բնակարանի հատակը՝ մոտ 0,5 քմ: Ամբողջությամբ վնասվել են 4-րդ հարկում գտնվող թիվ 51, 52, 53 բնակարանների պատուհանները: Փրկարարները 1-ին մուտքից տարհանել են 14 բնակչի և տեղում իրականացրել բնակարանների պատուհանների վնասված ապակիների հեռացման աշխատանքներ:
Պայթած տան տերերի հետ խոսել չհաջողվեց, հարևաններն ասացին, իմանալով պատահածի մասին, տանտերերից մեկի ինքնքզգոցողությունը վատացել է, հիվանդանոց են տարել:
Այս պահին դեպքի վայրում է փոխքաղաքապետ Կամո Արեյանը:
Հարակից հրապարակումներ`
Լրահոս
Տեսանյութեր
Մեր կյանքը դրամատուրգիա է դարձել՝ ամեն օր նոր պիեսի հարուստ թեմաներով լեցուն. հարցում